«باۋكەڭنىڭ ەسىمى حالقىمىز ءۇشىن قاشاندا باتىرلىقتىڭ, قايسارلىقتىڭ جانە ەرجۇرەكتىكتىڭ سيمۆولى بولىپ سانالادى. ونىڭ سوعىس جىلدارىنداعى ەرلىگى مەن اتاق-داڭقى بىرقاتار ەلدەرگە تارادى. سول كەزدە باتىر اتامىز دارىندى قولباسشى, اسكەري ستراتەگ, شەبەر ۇيىمداستىرۋشى رەتىندە مويىندالدى.
باۋىرجان مومىش ۇلىنىڭ سوعىستان كەيىن اسكەري-عىلىمي قىزمەتپەن جانە ادەبيەتپەن اينالىسقانى بارشامىزعا بەلگىلى. ونىڭ قالامىنان مايدان دالاسىن شىنايى سۋرەتتەگەن كەسەكتى شىعارمالار تۋدى. سول دۇنيەلەر قازاق ادەبيەتىندەگى اسكەري تاقىرىپتىڭ نەگىزىن قالاۋعا ۇلكەن ۇلەس بولىپ قوسىلدى.
باۋكەڭ – باتىرلىعىمەن قوسا دانالىعىمەن دە دارالانعان تۇلعا. ول سوڭىنا ۇرپاققا ۇلگى بولار ونەگەلى ويلار مەن ناقىل سوزدەر قالدىردى. قازىرگى تاڭدا باۋىرجان مومىش ۇلىنىڭ «وتان ءۇشىن وتقا ءتۇس – كۇيمەيسىڭ», «تارتىپكە باعىنعان قۇل بولمايدى» دەگەن قاناتتى سوزدەرىن كۇللى قازاق بىلەدى دەسەك, قاتەلەسە قويماسپىز. باتىردىڭ وسىنداي وسيەتتەرى ءاردايىم جاس بۋىندى مىنەزدى, جىگەرلى جانە وتانشىل ەتىپ تاربيەلەۋدىڭ وزەگى بولىپ قالا بەرەتىنى ءسوزسىز.
شىن مانىندە, قازاق دالاسى – باتىرلار ينستيتۋتى قالىپتاسقان جەر. ءبىز – اسقاق رۋح پەن ءور نامىستى تۋ ەتكەن سول بابالاردىڭ ۇرپاعىمىز. سوندىقتان بولار, باۋىرجان مومىش ۇلىنا دەگەن حالىقتىڭ قۇرمەت-قوشەمەتى ەشقاشان تومەندەگەن ەمەس. قازاقتا باۋىرجان ەسىمدى ازاماتتاردىڭ كوپ بولۋى سونىڭ ءبىر دالەلى. مۇنداي ءۇردىستى ۇلت باتىرلارىن ۇمىتپاۋدىڭ جانە ۇلىقتاۋدىڭ ونەگەلى ءداستۇرى دەۋگە ابدەن بولادى.
كەشە وسى مەرەيتويعا وراي «Egemen Qazaqstan» گازەتىندە حالىق قاھارمانى, تاعى ءبىر باتىر اعامىز باقىتجان ەرتاەۆ پەن عالىم بولات سايلاننىڭ «قاھارماندىق ونەگەسى» اتتى ماقالاسى جارىق كوردى. بۇل ەڭبەكتە باۋىرجان مومىش ۇلىنىڭ ەرلىككە تولى ءومىر جولى دالەلدى دەرەكتەرمەن كورسەتىلگەن ەكەن. باس باسىلىمنىڭ بۇگىنگى نومىرىنە دە «باۋىرجانتانۋدىڭ تۇنىعى مەن تۇڭعيىعى» اتتى كولەمدى سۇحبات جاريالانعانىن اتاپ وتكەن ءجون.
وسىنداي مازمۇندى دۇنيەلەردى كەڭىنەن دارىپتەۋ ارقىلى ۇلى تۇلعالارىمىزدى ودان ءارى تاني تۇسەمىز. ءبىز ۇلتىمىزدىڭ ايبىنى مەن ايبارىن اسقاقتاتقان قاھارماننىڭ رۋحىنا تاعزىم ەتىپ, ەسىمىن ەل جادىندا ماڭگى ساقتاۋىمىز كەرەك. بۇل – بۇگىنگى بۋىننىڭ دا, بولاشاق ۇرپاقتىڭ دا پەرزەنتتىك بورىشى.
ەندەشە, كەڭەستىك كەزەڭنىڭ وزىندە تەگىن «مومىش ۇلى» دەپ جازدىرىپ, وتاندى ءسۇيۋدىڭ وزىق ۇلگىسىن كورسەتىپ كەتكەن باتىر اماناتىنا ادال بولايىق», دەلىنگەن جازبادا.
