«نۇرلى جەر» باعدارلاماسىنىڭ ساپالى ورىندالۋى وبلىس باسشىلىعى تاراپىنان قاتاڭ باقىلاۋعا الىنعان. باعدارلاما اياسىندا مەملەكەتتىك بيۋدجەت ەسەبىنەن 158 نىساننىڭ قۇرىلىسىنا 36,6 ملرد تەڭگە ءبولىندى. قارجى 40 ارەندالىق تۇرعىن ءۇي, 30 ينجەنەرلىك ينفراقۇرىلىم نىسانى, 89 كرەديتتىك تۇرعىن ءۇيدىڭ قۇرىلىسىنا باعىتتالدى.
جىل قورىتىندىسى بويىنشا 69 نىسان پايدالانۋعا تاپسىرىلادى. ناتيجەسىندە 2430 وتباسى باسپانامەن قامتاماسىز ەتىلىپ, 3604 جەكە جەر ۋچاسكەلەرىنە ينفراقۇرىلىم جۇيەلەرى جۇرگىزىلەتىن بولادى. مەملەكەتتىك بيۋدجەت ەسەبىنەن 1778 پاتەرلى ساتىپ الۋ قۇقىعىنسىز ارەندالىق 40 كوپ قاباتتى تۇرعىن ۇيلەردىڭ قۇرىلىسى جۇرگىزىلۋدە. ال ارەندالىق 14 تۇرعىن ءۇي پايدالانۋعا تاپسىرىلدى.
سونداي-اق وبلىس اۋماعىندا الەۋمەتتىك كرەديتتىك تۇرعىن ءۇيدى دامىتۋ ماقساتىندا 7 قاباتتى 24 تۇرعىن ءۇي سالىنۋدا. ناتيجەسىندە 1452 وتباسى قونىس تويىن تويلايتىن بولادى.
سونىمەن قاتار تۇركىستان قالاسى اكىمشىلىك ىسكەرلىك ورتالىعىندا جاڭادان 7, 9 جانە 12 قاباتتى 64 تۇرعىن ءۇي سالىنۋدا. وبلىس اكىمدىگى ءباسپاسوز قىزمەتىنىڭ مالىمەتىنە جۇگىنسەك, ەلىمىزدە باسپانامەن قامتاماسىز ەتۋ بويىنشا ەڭ جوعارى كورسەتكىش تۇركىستان وبلىسىنا تيەسىلى.
