سۋ رەسۋرستارى كوميتەتى توراعاسىنىڭ ورىنباسارى سەمباي سەيسەنوۆ سۋدى كوپ قاجەت ەتەتىن داقىلدار ەگىستىگىن ازايتۋ كەرەكتىگىن العا تارتتى.
«قازاقستاندا سۋارمالى جەرلەرگە قاجەتتى سۋدىڭ كوپ بولىگى ترانسشەكارالىق وزەندەرگە بايلانىستى. جىل سايىن كورشىلەس ەلدەردەن كەلەتىن سۋلاردىڭ ازايۋىنا بايلانىستى مەملەكەتتىك باعدارلامالار اياسىندا جۇيەلى جۇمىس اتقارۋىمىز كەرەك»,- دەدى ول.
«جەرگىلىكتى اتقارۋشى ورگاندار كۇرىش ەگەتىن شارۋالارعا سۋ تاپشىلىعى ماسەلەسىن ءتۇسىندىرۋى كەرەك. سۋ تاپشىلىعىن بولدىرماۋ ماقساتىندا كۇرىش ەگىسىن 29 مىڭ گەكتارعا, اتاپ ايتقاندا قىزىلوردا وبلىسىندا - 15 مىڭ , الماتى وبلىسىندا 10 مىڭ , تۇركىستان وبلىسىندا 4 مىڭ گەكتارعا ازايتۋ قاجەتتىلىگى تۋىپ تۇر. باسقا داقىلداردى ەگۋگە كوشۋ قاجەت. بۇل ءبىر كۋب كيلومەتر سۋدى ۇنەمدەۋگە مۇمكىندىك بەرەدى»,- دەيدى سەمباي سەيسەنوۆ.
«قازسۋشار» رەسپۋبليكالىق مەملەكەتتىك كاسىپورنى قىزىلوردا فيليالى ديرەكتورىنىڭ ورىنباسارى جورابەك ەرنازاروۆ وڭىردە ەگىستىككە ارنالعان 178 مىڭ گەكتار جەردىڭ 159 مىڭ گەكتارىن كۇرىش القاپتارى الىپ جاتقانىن ايتادى. ونىڭ سوزىنشە, وبلىستا ءتيىستى شارالار جەدەل اتقارىلماسا, سۋ پروبلەماسى جىل وتكەن سايىن كۇردەلەنە بەرەدى.
«وتكەن جىلى 89 مىڭ 500 گەكتارعا كۇرىش ەگىلگەن. بيىل سونى 84 مىڭ 400 گەكتارعا ازايتۋدى جوسپارلاپ وتىرمىز. مەموراندۋم بويىنشا 75 مىڭ گەكتارعا دەيىن قىسقارۋ كەرەك ەدى. سونىمەن قاتار سۋ تاپشىلىعىنىڭ الدىن الۋ ماقساتىندا جاڭبىرلاتىپ سۋارۋ, تامشىلاتىپ سۋارۋ ماسەلەلەرىن قولعا الىپ جاتىرمىز. جاڭبىرلاتۋ ادىسىمەن 67 مىڭ گەكتارعا جۇگەرى, 10 مىڭ گەكتارعا جوڭىشقا, تامشىلاتۋ ادىسىمەن 3 مىڭ گەكتارعا قىزاناق ەگۋ جوسپارى بار»,- دەدى ول.
«قازسۋشار» رمك جامبىل فيليالىنىڭ ديرەكتورى قازىبەك بەدەباەۆ وبلىستا تامشىلاتىپ سۋارۋ ادىسىندەگى ەگىستىكتەر القابىن بيىلعى 20 مىڭ گەكتاردان 50 مىڭ گەكتارعا جەتكىزۋ جوسپارلانىپ جاتقانىن جەتكىزدى.
ەفير بارىسىندا سۋ رەسۋرستارى كوميتەتىنىڭ توراعاسى اتالعان شارالاردان بولەك ەلدەگى 119 سۋ ماگيستارلدىك كانالدارىن قايتا جوندەۋدەن وتكىزىپ, تسيفرلاندىرۋ تەحنولوگياسىن ەنگىزۋ جوسپارى بار ەكەنىن دە ايتتى.
ەسكە سالايىق, 22 جەلتوقساندا قر ۇكىمەتىنىڭ وتىرىسىندا ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ 2020 جىلدىڭ ۆەگەتاتسيالىق كەزەڭىنىڭ قورىتىندىلارى تۋرالى بايانداما جاساپ, سۋ تاپشىلىعىن بولدىرماۋدىڭ ناقتى امالدارىن ۇسىنعان.
