قوعامداعى تۇيتكىلدى ماسەلەلەردىڭ ءتۇيىنىن تارقاتۋ ءۇشىن جىل سايىن مەملەكەتتىك بيۋدجەتتەن قىرۋار قاراجات بولىنەدى. ايتسە دە وتە وزەكتى الەۋمەتتىك پروبلەمالار شەشىمىن تابار ەمەس: بيۋدجەتتى يگەرۋ, جوسپارلاۋ جانە ت.ب. جايتتار رەتتەلمەي وتىر.
ەلىمىزدەگى كاسىبي جانە اۋەسقوي كاريكاتۋراشىلار وسى تاقىرىپ اياسىنداعى, رەسپۋبليكا كولەمىندەگى نەمەسە وڭىرلەردەگى ماڭىزدى ماسەلەلەردى كاريكاتۋرا تىلىمەن سويلەتىپ كوردى.
قايرات جايىربەكتىڭ «قۇراق كورپە» جۇمىسى – ءى ورىن:
بايقاۋعا 31 كاريكاتۋراشى ءوز جۇمىسىن جولدادى. ونىڭ 3-ەۋى كونكۋرس تالاپتارىن ورىنداماعاندىقتان جانە تاقىرىپقا قاتىسى جوق سۋرەتتەر جىبەرگەندىكتەن باعالاۋ كەزەڭىنە جىبەرىلمەدى. 28 cۋرەتشىنىڭ ونەر تۋىندىسى قازىلار القاسىنىڭ باعالاۋىنا جولداندى.
«بيۋدجەت مول – ماسەلە سول» اتتى بايقاۋدىڭ جەڭىمپازدارى:
ءى ورىن (300 000 تەڭگە) – «قۇراق كورپە» جۇمىسى, اۆتورى – قايرات جايىربەك (نۇر-Cۇلتان);
ءىى ورىن (200 000 تەڭگە) – «لرت-ستوۋنحەندج» جۇمىسى, اۆتورى – تالعات جەڭىس ۇلى (تالدىقورعان);
ءىىى ورىن (100 000 تەڭگە) – «بيۋدجەتتى باسقارۋ» جۇمىسى, اۆتورى – مۇرات ءدىلمانوۆ (الماتى);
ءىىى ورىن (100 000 تەڭگە) – «اقبۇلاق 2011-2020» جۇمىسى, اۆتورى – پاۆەل ۋكولوۆ (سەمەي);
ءىىى ورىن (100 000 تەڭگە) – «لرت: كوزدەن بۇلبۇل ۇشتى» جۇمىسى, اۆتورى – ءادىل زاكەنوۆ (الماتى).
تالعات جەڭىس ۇلىنىڭ «لرت – ستوۋنحەندج» جۇمىسى – ءىى ورىن
اسقار بەكوۆ: «بايقاۋدى ۇيىمداستىرۋداعى ماقساتىمىز – ەلىمىزدەگى كاريكاتۋرا جانرىنىڭ جاندانۋىنا تيىتتەي دە بولسىن ءوز ۇلەسىمىزدى قوسۋ بولدى. كاريكاتۋرا – باعزىدان بەرى الەۋمەتتىڭ وزەكتى ماسەلەلەرىن كوتەرە بىلەتىن, ونى قالىڭ كوپشىلىككە كورسەتە الاتىن بىردەن ءبىر قۇرال. بۇل جانردىڭ حالىقارالىق دەڭگەيدە وزىندىك ورنى بار. وكىنىشكە قاراي, وسى جوبانى جۇزەگە اسىرۋ بارىسىندا ەلىمىزدە كاسىبي كاريكاتۋراشىلاردىڭ كوپ ەمەس ەكەنىن كۋا بولدىق. دەسەك تە, بۇل جانردىڭ ءتۇپ-تامىرىمەن جوعالىپ كەتپەۋىنە سەپتىگىن تيگىزىپ جۇرگەن كاسىبي سۋرەتشىلەر بار. سول قىلقالام شەبەرلەرىنە قولداۋ كورسەتۋ ماقساتىندا وسىنداي بايقاۋ ۇيىمداستىردىق», دەيدى.
بايقاۋعا بارلىعى 148 جۇمىس كەلدى, ونىڭ ىشىندە 35 جۇمىس بايقاۋ شارتتارىن ورىنداماعانى ءۇشىن (كوشىرمە, قايتالاۋ جانە ت.ب.) كونكۋرسقا جىبەرىلمەدى, ال قالعان 113 جۇمىستىڭ ىشىندە نەگىزگى تاقىرىپ – 75, ال ەركىن تاقىرىپ بويىنشا 38 جۇمىس باعالاندى. بايقاۋدىڭ جالپى جۇلدە قورى – 1 350 000 تەڭگە.
پاۆەل ۋكولوۆتىڭ «اقبۇلاق 2011-2020» جۇمىسى – ءىىى ورىن:
«سوروس-قازاقستان» قورىنىڭ «اشىقتىق جانە ەسەپتىلىك» باعدارلاماسى ازاماتتىق قوعامنىڭ قالىپتاسۋىنا, ونداعى مەملەكەتتىك بيۋدجەت ماسەلەسىنىڭ اشىق ءارى ەسەپتى بولۋىنا زور ماڭىز بەرەدى. وسى تاقىرىپتى قالىڭ بۇقاراعا كەڭىنەن تۇسىندىرۋگە, ناسيحاتتاۋعا ءھام ونىمەن بايلانىستى وزەكتى پروبلەمالاردى كوتەرۋگە مۇددەلى جوبالاردى ۇنەمى قولدايمىز. ءبىزدىڭ سەرىكتەسىمىز – «مەديا وردا» قوعامدىق قورى وسى ەسەپ-قيساپقا تولى ءارى قارجى-قاراجات توڭىرەگىندەگى پروبلەمالاردى شىعارماشىلىق تىلمەن سويلەتىپ كورۋ تۋرالى تىڭ يدەيا ۇسىنعان بولاتىن, ءبىز قولدادىق», – دەدى «سوروس-قازاقستان» قورىنىڭ ۇيلەستىرۋشىسى اسقار كوشكىنباەۆ.
ۇيىمداستىرۋشىلار وسى بايقاۋ اياسىندا «قىلقالام ۇشىنداعى شىنايى قوعام» اتتى ەركىن تاقىرىپقا جۇمىستار قابىلداندى. بۇل تاقىرىپ بويىنشا كاسىبي كاريكاتۋريست بەرىك شادىعاليدىڭ (ورال قالاسى) جۇمىستارى ۇزدىك دەپ تانىلدى. ول 100 000 تەڭگە سىياقىعا يە بولدى.
ءادىل زاكەنوۆتىڭ «لرت: كوزدەن بۇلبۇل ۇشتى» جۇمىسى – ءىىى ورىن
بۇدان بولەك, كاريكاتۋراشىلارعا ىنتالاندىرۋ سەرتيفيكاتتارى بەرىلدى: 7 جۇمىس – 50 000 تەڭگەلىك, 5 جۇمىس – 20 000 تەڭگەلىك سىيلىق الدى.
ەلىمىزگە بەلگىلى كاريكاتۋريست, وسى بايقاۋدىڭ نەگىزگى ساراپشىسى ءارى ءادىل-قازى مۇشەسى عالىم سماعۇل ۇلى: «بايقاۋعا ۇسىنىلعان جۇمىستاردىڭ تاقىرىبى, ياكي نىسانىنا, يدەياسى, ياعني تاپقىرلىعىنا جانە تەحنيكاسى, ياعني ۇسىنۋ شەبەرلىگىنە ەرەكشە ماڭىز بەردىك. رەسپۋبليكا كولەمىندە بىرقاتار كاريكاتۋراشىدان جاقسى جۇمىستار كەلدى. باس جۇلدەلەردى العان سۋرەتشىلەر بايقاۋعا جاقسى دايىندالعان: تاپقىر, شەبەر ءارى وزەكتى تۋىندىلار كەلدى. ءالى دە بولسا جەتىلدىرۋ كەرەك جۇمىستار دا بولدى, ولارعا ىنتالاندىرۋ سەرتيفيكاتتارى بەرىلدى», دەپ اتاپ ءوتتى.
بۇل بايقاۋعا جينالعان ۇزدىك سۋرەتتەر كورەرمەنسىز قالمايدى. ۇيىمداستىرۋشىلار «بيۋدجەت مول – ماسەلە سول» اتتى البوم-جيناق شىعارۋدى, سونداي-اق, كونكۋرسقا كەلگەن ونەر تۋىندىلارىن ونلاين كەڭىستىكتە كەڭىنەن تاراتۋ ماقساتىندا لونگريد فورماتىندا دەرەكتى-ماقالا ۇسىنۋدى جوسپارلاپ وتىر. سونداي-اق, Aiqyn رەسپۋبليكالىق قوعامدىق-ساياسي گازەتىنىڭ «ارا» ساتيرالىق قوسىمشاسىمەن سەرىكتەسىپ, اتالمىش باسىلىمعا ۇزدىك سۋرەت سەرياسى جاريالانباق.
مۇرات ءدىلمانوۆتىڭ «بيۋدجەتتى باسقارۋ» جۇمىسى – ءىىى ورىن:
تالعات جەڭىس ۇلى, ءىى ورىن يەگەرى: – بارلىق جۇمىستى ىسىرىپ قويىپ, 3 اپتا كولەمىندە وسى بايقاۋعا سۋرەت سالدىم. كونكۋرس تاقىرىبىن اشۋعا تىرىستىم, ءتۇرلى تەحنيكالاردى قولداندىم. بايقاۋدىڭ تاقىرىبى, تالاپتارى ۇنادى, جۇلدەسى دە تۇرارلىق. بۇل ءبىزدىڭ جۇمىسىمىزعا قۇرمەتپەن قاراۋدىڭ بەلگىسى دەپ ءتۇسىندىم.
مۇرات ءدىلمانوۆ, ءىىى ورىن يەگەرى: – قازاق تىلىندەگى كاريكاتۋرا جوعالۋدىڭ از اق الدىندا تۇر. بۇل ورايدا بۇگىنگى بايقاۋعا قاتىسقان ءاربىر كاريكاتۋراشىنىڭ ەڭبەگى ەرەن. ويتكەنى بۇل جانردى قايتا جانداندىرۋدىڭ ماڭىزى زور. كاريكاتۋرانىڭ, ونداعى كوتەرىلگەن ماسەلەنىڭ سالماعى اۋىرلاپ, ساپاسى ارتقان سايىن, قابىلداۋشىنىڭ ساناسى وسەدى. سۋرەتشىلەرگە وسىنداي مۇمكىندىك بەرگەن باستاماشىلارعا العىس ايتامىن, – دەيدى ول.
ايتا كەتەيىك, بۇل بايقاۋ «كاريكاتۋرانى قوعامداعى وزەكتى ماسەلەلەردى كورسەتۋدىڭ قولجەتىمدى قۇرالى رەتىندە قايتا جانداندىرۋ» جوباسى اياسىندا ۇيىمداستىرىلدى. جوبانىڭ ماقساتى – ەلىمىزدەگى كاسىبي جانە اۋەسقوي سۋرەتشى-كاريكاتۋراشىلارمەن جانە ولاردىڭ جۇمىسىمەن تانىسۋ, سەرىكتەستىك ورناتۋ; كاريكاتۋرا ارقىلى رەسپۋبليكالىق دەڭگەيدەگى نەمەسە وڭىرلەردەگى وزەكتى پروبلەمالاردى كورسەتۋ ەلىمىزدەگى كاسىبي جانە اۋەسقوي سۋرەتشى-كاريكاتۋراشىلاردىڭ جۇمىسىن جانە سول ارقىلى رەسپۋبليكا كولەمىندەگى نەمەسە جەرگىلىكتى دەڭگەيدە اكتۋالدى ماسەلەلەردى قالىڭ بۇقاراعا كورسەتۋ بولدى.
بۇل جوباعا بەلگىلى كاريكاتۋريست عالىم سماعۇل ۇلى, بيۋدجەت تاقىرىبىنىڭ ساراپشىسى شولپان ايتەنوۆا جانە جۋرناليست باۋىرجان سابىربەكوۆ ەكسپەرت رەتىندە تارتىلدى.
