اتاپ ايتقاندا, بيومەتريالىق دەرەكتەردىڭ كومەگىمەن ەلەكتروندى ۇكىمەت پورتالىندا تىركەلۋگە بولادى. وسىلايشا, ەلەكتروندى ۇكىمەت قوسىمشاسىندا تىركەلۋ ءۇشىن سمارتفونداعى كامەرا جەتكىلىكتى. تۇلعانى بيومەتريالىق سايكەستەندىرۋ پايدالانۋشىنى تەكسەرۋ سۇراقتارىن قويۋ ارقىلى دەربەس انىقتايدى جانە تىركەيدى. اتالعان تەتىك ەلەكتروندى-تسيفرلى قولتاڭبا جانە ءموبيلدى ازاماتتار بازاسىندا تىركەلۋ قاجەتتىلىگىن بولدىرماي, تىركەۋ پروتسەسىن ايتارلىقتاي جەڭىلدەتەدى. «بۇعان دەيىن مەن مەملەكەت باسشىسىنا بيومەتريانىڭ كومەگىمەن جىل سوڭىنا دەيىن تىركەۋ جوباسىن ىسكە اسىرۋعا ۋادە بەرگەن ەدىم, بۇگىن ءبىز ونى العاش رەت تانىستىرىپ وتىرمىز. ەندى ءاربىر قازاقستاندىق ءبىر مينۋت ىشىندە ءموبيلدى ازاماتتار بازاسىندا, Egov پورتالىندا تىركەلىپ, ەتسق الا الادى. بۇل پروتسەستى ءبىر قادامعا دەيىن جەڭىلدەتۋمەن قاتار, جەرگىلىكتى جەرلەردە سىبايلاس جەمقورلىق تاۋەكەلدەرىن ازايتۋعا مۇمكىندىك بەرەدى. ويتكەنى, ءبارىمىز بىلەتىندەي, جەمقورلىق تومەننەن باستالادى», دەدى مينيستر.
سونداي-اق مەملەكەتتىك ورگانداردىڭ اقپاراتتىق جۇيەلەرىن وڭتايلاندىرۋدا جانە ەكونوميكا سالالارىن تسيفرلاندىرۋدا پلاتفورمالىق ءتاسىل تانىستىرىلدى.
سونىمەن قاتار مينيستر اقتوبە قالاسىندا جەر قاتىناستارى سالاسىن تسيفرلاندىرۋعا باعىتتالعان قاناتقاقتى جوبانىڭ ىسكە قوسىلعانى تۋرالى ايتتى. قازىر اقتوبە تۇرعىندارى ەلەكتروندى ۇكىمەت پورتالىنداعى اۋكتسيوندار ارقىلى جەر تەلىمدەرىن ساتىپ الا الادى. بولاشاقتا بۇل جوبانى بۇكىل ەلگە تاراتۋ جوسپارلانۋدا.
باعدات مۋسين ەكىنشى دەڭگەيلى بانكتەرمەن جانە باسقا كومپانيالارمەن بىرلەسكەن جوبالاردى ۇسىندى. مينيستر تسيفرلاندىرۋعا مونوپوليا جوق ەكەنىن جانە قازىر جەكە بيزنەس حالىققا مەملەكەتتىك قىزمەتتەردى ۇسىنۋعا قاتىسىپ جاتقانىن اتاپ ءوتتى.
كەڭەس بارىسىندا تۇرمىستىق سىبايلاس جەمقورلىقتى جويۋ, قولايلى جاعداي جاساۋ, سونداي-اق مينيسترلىكتىڭ اشىقتىعى مەن ەسەپتىلىگىن قامتاماسىز ەتۋ ماقساتىندا وتكەن جىلدان باستاپ اشىلعان ءتسدياوم «ادالدىق الاڭى» جوبالىق كەڭسەسىنىڭ جۇمىسىن اتاپ ءوتتى.
ءوز كەزەگىندە اگەنتتىك وكىلدەرى سىبايلاس جەمقورلىققا قارسى باستامالار جانە ءاربىر قىزمەتكەردىڭ ەلىمىزدىڭ يگىلىگى ءۇشىن ادال جانە پاراساتتى ەڭبەگىنىڭ ماڭىزدىلىعى تۋرالى ايتىپ بەردى.
«مەملەكەتتىك قىزمەتشىلەردىڭ پاراساتتىلىق يدەولوگياسىنا ەنىپ, شىنشىلدىق پەن ادىلدىك سياقتى قاعيداتتارعا ادالدىعىن ءىس جۇزىندە كورسەتە باستاۋى ماڭىزدى. ەڭ باستىسى – وڭ وزگەرىستەرگە دەگەن نيەت پەن ەرىك», دەدى اگەنتتىك توراعاسى اليك شپەكباەۆ. ونىڭ ايتۋىنشا, مينيسترلىك – تسيفرلاندىرۋ سالاسىنداعى سىبايلاس جەمقورلىق تاۋەكەلدەرىن جويۋعا ءتيىس ۋاكىلەتتى ورگان عانا ەمەس, سونىمەن قاتار ءتيىمدى تسيفرلى قۇرالداردى ەنگىزۋ ارقىلى سىبايلاس جەمقورلىق تاۋەكەلدەرىن بولدىرماۋ تۇرعىسىنان بارلىق مەملەكەتتىك ورگانداردىڭ ستراتەگيالىق سەرىكتەسى.
مينيسترلىكتىڭ بارلىق مەملەكەتتىك قىزمەتتەردى تسيفرلاندىرۋ ەسەبىنەن ادامي فاكتوردى الىپ تاستاۋ جونىندەگى مىندەتىن ەسكەرە وتىرىپ, ۆەدومستۆونىڭ ءوزىنىڭ قاعاز فورماتتا مەملەكەتتىك قىزمەتتەر كورسەتۋىنە جول بەرمەۋى اسا ماڭىزدى. مينيسترلىك باسقا مەملەكەتتىك ورگاندار ءۇشىن ونىڭ اشىقتىعى مەن ايقىندىلىعى بويىنشا ەتالون بولۋى ءتيىس.
كەڭەس سوڭىندا مينيسترلىككە قوعامنىڭ پىكىرلەرى مەن ۇمىتتەرىن ەسكەرە وتىرىپ, تۇرمىستىق سىبايلاس جەمقورلىقتى جويۋدىڭ, پاراساتتىلىق قاعيداتتارىن ناسيحاتتاۋدىڭ جانە حالىقتىڭ تسيفرلى ساۋاتىن ارتتىرۋدىڭ ناقتى جوسپارىن قۇرۋ ۇسىنىلدى.
ەستەرىڭىزگە سالا كەتەيىك, بۇعان دەيىن وسىنداي كەزدەسۋلەر باسەكەلەستىكتى قورعاۋ جانە دامىتۋ اگەنتتىگىنىڭ, دەنساۋلىق ساقتاۋ, قارجى, قورعانىس, اۋىل شارۋاشىلىعى, ەكولوگيا, ءبىلىم جانە عىلىم, توتەنشە جاعدايلار مينيسترلىكتەرىنىڭ ۇجىمدارىمەن وتكەن بولاتىن.
