قازاقستان حالىق پارتياسىنىڭ اتىنان قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا كانديداتتار جامبىل احمەتبەكوۆ پەن يرينا سميرنوۆا شىعىس قازاقستان وبلىسىنىڭ ورتالىعى وسكەمەن قالاسىنداعى قارجى-ەكونوميكالىق كوللەدجدىڭ ۇجىمىمەن جانە وقۋشىلارىمەن كەزدەسۋ وتكىزدى. كەزدەسۋدە پارتيانىڭ باعدارلاماسىندا قامتىلعان ماسەلەلەر تالقىلاندى ءارى كۇن تارتىبىنە جاس وتباسىلاردى قولجەتىمدى يپوتەكامەن قولداۋ ماسەلەسى قويىلدى.
سپيكەرلەردىڭ پىكىرىنشە, قازىر مەملەكەت جاستاردىڭ دامىپ, جەتىلۋى ءۇشىن ولاردىڭ بارلىق الەۋمەتتىك-تۇرمىستىق ماسەلەلەرىن شەشىپ, تۇرعىن ۇيمەن قامتاماسىز ەتۋى كەرەك.
يرينا سميرنوۆا قازاقستانداعى جاستاردىڭ ۇلەسى حالىقتىڭ ەداۋىر بولىگىن قۇراپ وتىرعانىن ايتتى.
– سوڭعى رەسمي مالىمەتتەرگە سايكەس, ەلدەگى 15 پەن 34 جاس ارالىعىنداعى جاستاردىڭ سانى 5 ميلليوننان اسادى جانە وسىنشاما مولشەردە 14 جاسقا دەيىنگى بالالار بار. ۇكىمەتتىڭ الدىندا جاس قازاقستاندىقتارعا ءبىلىم الۋعا, جۇمىس ورنىن تابۋعا جانە جەكە تۇرعىن ءۇي ساتىپ الۋعا كومەكتەسۋ مىندەتى تۇر, – دەدى يرينا سميرنوۆا.
تومەنگى پالاتا دەپۋتاتتىعىنا كانديداتتار قازىرگى جاستاردىڭ نەگىزگى ەكى پروبلەماسى بار ەكەنىن اتاپ ءوتتى. ولار – جۇمىسقا ورنالاسۋ جانە جەكە تۇرعىن ۇيمەن قامتاماسىز ەتۋ.
– ءبىز ازاماتتاردىڭ بارلىق ساناتى ءۇشىن, ونىڭ ىشىندە جاستار مەن جاس وتباسىلار ءۇشىن جىل سايىن جەڭىلدەتىلگەن تۇرعىن ءۇي سالۋعا زاڭنامالىق كەپىلدىك بەرىلگەن كۆوتالاردى بەكىتۋ قاجەت دەپ سانايمىز. قازاقستان حالىق پارتياسى ەلىمىزدىڭ بارلىق مۇقتاج ازاماتىنا لايىقتى ءومىر ءسۇرۋ دەڭگەيىن قامتاماسىز ەتۋ ءۇشىن مەملەكەتىمىزدىڭ جەتكىلىكتى رەسۋرستارعا يە ەكەندىگىنە سەنىمدى, – دەدى جامبىل احمەتبەكوۆ.
كەزدەسۋ سپيكەرلەرى قازاقستانداعى قولدانىستاعى تۇرعىن ءۇي باعدارلامالارى جاستار ءۇشىن قولجەتىمسىز ەكەنىن, ولاردى جاستار مەن جاس وتباسىلاردىڭ پايداسىنا قاراي وزگەرتۋ قاجەت ەكەنىن ەسكە سالدى.
بۇعان قوسا, پارلامەنت ءماجىلىسىنىڭ دەپۋتاتتىعىنا قازاقستان حالىق پارتياسىنىڭ اتىنان كانديداتتار جامبىل وبلىسىنا باردى. وندا تارازداعى 2019 جىلدىڭ 27 اقپانىندا جارىلىس بولعان تۇرعىن ءۇي تۇرعىندارىمەن كەزدەسۋ ءوتتى.
ەسكە سالا كەتەيىك, اتالعان جارىلىستان ءۇش پاتەر تۇگەلدەي قيراپ, 4 ادام قايتىس بولعان. ءۇي تۇرعىندارى اكىمدىك وكىلدەرىنىڭ پاتەرلەردى قالپىنا كەلتىرۋدى موينىنا العانىن جەتكىزدى. الايدا پاتەرلەرگە جۇرگىزىلگەن جوندەۋ جۇمىستارىنىڭ ساپاسى ناشار.
پارتيا وكىلدەرى سونىمەن قاتار شىمكەنت قالاسىنداعى اپاتتى جاعدايدا تۇرعان ۇيدە بولدى. مۇندا زەينەتكەرلەر مەن كوپ بالالى وتباسىلار تۇرادى.
جالپى, پارلامەنت ءماجىلىسىنىڭ دەپۋتاتتىعىنا قازاقستان حالىق پارتياسىنىڭ اتىنان كانديداتتار سايلاۋالدى ۇگىت-ناسيحات جۇمىستارىن بەلسەندى جۇرگىزۋدە.
