تۇرىكمەنستاننىڭ اشحاباد قالاسىندا قازاقستان رەسپۋبليكاسىنىڭ تاۋەلسىزدىك كۇنىنە بايلانىستى جيىن وتكىزىلدى. بۇل تۋرالى قازاقستان رەسپۋبليكاسىنىڭ تۇرىكمەنستانداعى ەلشىلىگى حابارلادى.
جيىنعا تۇرىكمەنستاندا تىركەلگەن ديپلوماتيالىق ميسسيالار, ىسكەر, مادەني, عىلىمي ورتالاردىڭ قىزمەتكەرلەرى, بۇقارالىق اقپارات قۇرالدارى وكىلدەرى مەن قازاق دياسپوراسى قاتىستى.
تۇرىكمەن تاراپىنىڭ باس قوناعى, بولمىش ەل پارلامەنتىنىڭ سپيكەرى اكدجا نۋربەردىەۆا ءسوز بارىسىندا ەكى ەل اراسىنداعى قارىم-قاتىناس ۇلعايا بەرەتىنىنە سەنىم ءبىلدىرىپ, قازاقستان رەسپۋبليكاسىنىڭ تاۋەلسىزدىگى كۇنىمەن شىن جۇرەكتەن قۇتتىقتادى.
جيىنعا قاتىسقانداردىڭ نازارىنا قازاقستاننىڭ جەتىستىكتەرى مەن ينۆەستيتسيالىق تارتىمدىلىعى تۋرالى بەينە كورسەتىلىمدەر ۇسىنىلىپ, ەلىمىز تۋرالى كەڭىنەن مالىمەت ايتىلدى.
سالتاناتتى ءىس-شارا بارىسىندا قازاقستاننىڭ ەلشىسى قابىلداۋعا كەلگەن تۇرىكمەنستانداعى قازاق دياسپوراسىمەن كەزدەسىپ,ەلشىلىكتىڭ اتقارعان جۇمىستارى مەن الداعى مىندەتتەرى تۋرالى ايتىپ بەردى.
دانيار تۇيمەباي.
دەرەككوز: قر تۇرىكمەنستانداعى ەلشىلىگى
