ءبىزدىڭ ماسەلە ەتىپ كوتەرگەلى وتىرعانىمىز, سول باياعى جىرى بىتپەيتىن, ءاپساناداي اڭگىمە قىلاتىن تاقىرىپتىڭ ءبىرى بولعالى تۇر. ءبىز ءومىر ءسۇرىپ وتىرعان قوعامداعى, وسكەن ورتاداعى, ياكي, ناقتىراق ايتار بولساق, توپىراعىنا اۋناپ وسكەن تۋعان اۋىلىمىزداعى ءتۇيىندى تۇيتكىلدەردىڭ ءبىرى – جولاۋشىلار جولى.
اڭگىمەنىڭ جەلىسى, ماسەلەنىڭ ءمانى بىلايشا ساباقتالادى. ءبىزدىڭ قاراتەرەڭ اۋىلى مەن قازالى اۋدانىنا قاراستى بەكارىستان بي اۋىلى ارالىعىنداعى ۇزاقتىعى 60 شاقىرىمداي تاس جولمەن (قارا جولمەن) جولاۋشىلاعان ادامنىڭ كۇنى مۇساپىرلىككە تۇسكەن, بەيشارانىڭ كۇنىندەي. ياعني, ماسەلەمىز ناقتىراق بولۋى ءۇشىن اشىپ ايتار بولساق, سوناۋ ءبىر كەزدەرى توسەلگەن تاس جولدىڭ ويدىم-شۇڭقىرى شىققان. سول سەبەپتى اۋدان مەن اۋىلعا قاتىنايتىن جولاۋشىلار اۆتوبۋسى بەلگىلى ءبىر جەرلەردە جايداق قارا جولمەن جۇرۋگە ءماجبۇر بولىپ ءجۇر. اسىرەسە, جازدىڭ اپتاپ ىستىعىندا وكپەڭدى قىساتىن, قولقاڭدى قاباتىن كوك – الا شاڭى مەن قىستىگۇنى قاردىڭ قۇرساۋىندا قالاتىن, جاڭبىر سۋىمەن لايساڭ بالشىققا اينالاتىن جۇرۋگە جارامسىز جولدان اۋىل حالقىنىڭ ابدەن جۇيكەلەرى جۇقارىپ, دەنساۋلىقتارى سىر بەرىپ, وسى كۇندە كىمگە بارىپ مۇڭدارىن شاعارىن بىلمەي, ابدەن دەگبىرلەرى قاشىپ, ءابىرجىپ وتىرعان جايى بار. وسى ارالىقتاعى جولمەن اۋىل حالقى قاجەتىنە كەرەكتى ازىق-ت ۇلىگىنە, سونداي –اق باسقاداي جۇمىستارىن بىرىڭعايلاۋ ءۇشىن, نارىقتان نانىن تەرىپ جەۋ ءۇشىن ايتەكە بي كەنتىنە تاڭالاكەۋىمنەن تۇرىپ, جول ساپارلايدى. بۇل كۇندەلىكتى قايتالاناتىن, جولاۋشىلارى ءبىر تولاستامايتىن قاراتەرەڭ اۋىلى ادامدارىنىڭ داعدىسى.
ايتپاقشى, ءبىز ءسوز ەتىپ وتىرعان وسى ەكى ارالىقتاعى جولمەن, كورشىلەس جاتقان جاڭاقۇرىلىس اۋىلىنىڭ حالقى دا ەرسىلى -قارسىلى جولاۋشىلاپ جاتادى. بۇلاردىڭ دا باسىنان وتكەرگەن قيىندىقتارى بىزبەن بىردەي. وسى ورايدا, قانشاما مىڭداعان حالىقتىڭ جول ازابىن تارتىپ جاتقاندارىن باعامداۋ قيىن ەمەس. اۋرەلەڭگە تۇسكەن جۇرتتىڭ تاعى ءبىر قورقىنىشتىسى, داريانىڭ ارعى-بەرگى بەتىنە وتۋگە ارنالعان بەكارىستان بي اۋىلى ماڭىنداعى قالقىمالى كوپىر. داريانىڭ قاق ورتاسىنا ورنالاسقان كوپىرگە جاقىنداعان جۇرتتىڭ جانارىنان ۇرەيلەرىن اڭعارۋ قيىن ەمەس. وسى قالقىمالى كوپىردەن جولاۋشىلار زارە-قۇتى قاشىپ,شىبىن جاندارىن «شۇبەرەككە ءتۇيىپ», تىلدەرىن كاليماعا كەلتىرىپ, «ءبيسميللاسىن» ايتىپ, اۋپىرىمدەپ ءجۇرىپ وتەدى-اۋ ايتەۋىر. سوندا عانا بارىپ كەلەسى بەتكە امان-ەسەن وتكەن جولاۋشىلاردىڭ كوڭىلى جايلانا باستايدى.
«ءبارىن ايت تا, ءبىرىن ايت, جامال اپايدىڭ جىرىن ايت»- دەمەكشى, ءبىزدىڭ اۋىلدىڭ «جىرى», مەزگىل ماسەلەسى وسى جول جانە جولاۋشى مەحناتى.ەگەر دە, اتالعان ەكى ارالىقتاعى جولعا ماڭىز بەرىلىپ, اسفالتتالاتىن بولسا, جولاۋشىعا, جۇرگىزۋشىگە دە قيىندىق تۋعىزباسى انىق. ەڭ بىرىنشىدەن, ۋاقىت ۇنەمدەلەدى.
قالاي دەگەندە دە بۇل تەز ارادا شەشىم قابىلداۋدى قاجەت ەتەتىن, كەزەك كۇتتىرمەيتىن, قاراتەرەڭدىكتەردىڭ ەڭ باستى پروبلەماسىنا اينالىپ وتىرعان كۇرمەۋلى ساۋال. ءبىز الداعى كۇندەردە وسى اتالعان ماسەلەگە قاتىستى بىرجاقتى وڭ ناتيجە كۇتەمىز جانە دە بارشا اۋىل حالقى ۇكىلى ۇمىتپەن قارايمىز.
قاليحان الماعانبەتوۆ,
قىزىلوردا وبلىسى,
ارال اۋدانى.
