الەمدىك كلاسسيكالىق مۋزىكانىڭ ءھام ۇلى قازاق ونەرىنىڭ رۋحاني قارا شاڭىراعىنا اينالعان جامبىل اتىنداعى فيلارمونيانىڭ مەرەيتويىن اتاپ وتۋگە مادەنيەت جانە سپورت مينيسترلىگى ايرىقشا ماڭىز بەرىپ وتىر. ونەر ۇجىمىن مەرەيلى مەجەسىمەن قۇتتىقتاۋعا ارنايى كەلگەن مادەنيەت جانە سپورت ءمينيسترى اقتوتى رايىمقۇلوۆا مەملەكەتتىك حاتشى قىرىمبەك كوشەرباەۆتىڭ ىستىق لەبىزىن جەتكىزىپ, سالانى دامىتۋعا قوسقان ۇلەسى ءۇشىن بىرقاتار ونەر مايتالماندارىن مينيسترلىكتىڭ ۆەدومستۆالىق ناگرادالارىمەن ماراپاتتادى.
– فيلارمونيانىڭ 85 جىلدىق مەرەكەسى اياسىندا ءوتىپ جاتقان جاڭا جىلدىق فەستيۆالدىڭ ءمانى ەرەك. تۇڭعىش رەت شىمىلدىعىن تۇرگەن شارانىڭ عۇمىرى ۇزاق بولعاي! توعىز كۇن بويى قازاقستاندىق مۋزىكالىق ونەردى دامىتۋعا باعىتتالعان فەستيۆال اياسىندا الەمگە ايگىلى فيلارمونيا ۇجىمدارىنىڭ كونتسەرتتەرى وتكىزىلمەك. اتالعان فەستيۆال داستۇرگە اينالىپ, فيلارمونيا ونەرپازدارىنىڭ ەسىمدەرىن ەل ەسىندە قالدىرۋعا سەپتىگىن تيگىزەرى انىق. بۇگىندە ەگەمەندىگىمىزدىڭ مەرەكەسىن ءبىز ىرگەسى بەرىك, مەملەكەتتىگى بەكەم, ءتورت قۇبىلاسى تۇگەل, اتى الەمگە تانىلعان ەل رەتىندە قارسى الىپ وتىرمىز. جامبىل اتىنداعى قازاق مەملەكەتتىك فيلارمونياسىنىڭ 85 جىلدىق مەرەيتويى اياسىندا سالتانات قۇرعان بۇگىنگى شارا سونىڭ ءبىر كورىنىسى. الەم دامۋىنىڭ قازىرگىدەي كۇردەلى كەزەڭىندە كەلەشەككە نىق سەنىممەن كەرۋەن تارتقان تۋعان ەلىمىزدىڭ جان-جاقتى وركەندەۋى جانە حالقىمىزدىڭ مادەني تۇرعىدان دامۋى جولىندا اتالعان ۇجىمنىڭ سىڭىرگەن ەڭبەگى زور, – دەيدى اقتوتى رايىمقۇلوۆا.
ماراپاتتاۋ ءراسىمى مەملەكەتتىك ۇرمەلى اسپاپتار وركەسترىنىڭ كونتسەرتتىك باعدارلاماسىمەن جالعاستى. جاڭا جىل قارساڭىنداعى مەرەيتويلىق فەستيۆال ونەرسۇيەر قاۋىمعا عاجايىپ كوڭىل كۇي مەن شاتتىق سەزىم سىيلاماق. ۆەدومستۆا باسشىسى تىلگە تيەك ەتكەندەي, 85 جىل ىشىندە وسى ۇجىمدا ەڭبەك ەتكەن ۇلى ەسىمدەردى ۇلىقتاپ, مۋزىكا ونەرىنىڭ وزىق ۇلگىلەرىن ناسيحاتتاۋ ارقىلى اتالعان فەستيۆالدى جىل سايىنعى داستۇرگە اينالدىرۋ كوزدەلىپ وتىر.
سونداي-اق الماتىعا جاساعان جۇمىس ساپارى اياسىندا مادەنيەت جانە سپورت ءمينيسترى ءابىلحان قاستەەۆ اتىنداعى كوركەمسۋرەت مۇراجايىنىڭ 85 جىلدىق مەرەيتويىنا قاتىسىپ, مەملەكەت باسشىسى قاسىم-جومارت توقاەۆتىڭ اتىنان مەملەكەتتىك ماراپاتتار مەن العىس حاتتاردى تابىستادى. سالتاناتتى جيىندا قازاقستاننىڭ كوركەم سۋرەت ونەرى تىزبەسىنىڭ 3-ءشى تومىنىڭ تۇساۋى كەسىلدى. ودان بولەك, تامىرى تەرەڭدە جاتقان مۇراجايدىڭ تاريحىنان سىر شەرتەتىن فوتوكورمە ۇيىمداستىرىلدى.
«قازاقستان بەينەلەۋ ونەرى دەگەندە ەڭ الدىمەن قاستەەۆ مۇراجايى كوز الدىمىزعا كەلەدى. قازاق ۇلتىنان شىققان تۇڭعىش كاسىبي سۋرەتشى ءارى ۇلى دارىننىڭ ەسىمىمەن اتالعان مۋزەي – ۇلتتىق سانا-سەزىمدى قالىپتاستىراتىن, نىعايتاتىن مۇراجاي دەسەك قاتەلەسپەيمىز. ۇلتتىق ونەردىڭ مايەگى, جاۋھارى وسىندا جاتىر», دەيدى قازاقستاننىڭ ونەر سىنشىلارى گيلدياسىنىڭ توراعاسى يمانبەك ەفرات.
تاعى دا ءبىر سۇيىنشىلەپ ايتار جاڭالىق, تاۋەلسىزدىك كۇنى قارساڭىندا ۇلت رۋحانياتىنىڭ قارا شاڭىراعىنا بالاناتىن الماتىداعى بەس بىردەي ونەر وشاعىنا ۇلتتىق مارتەبە بەرىلدى. پرەزيدەنت جارلىعى بويىنشا م.اۋەزوۆ اتىنداعى دراما تەاترى مەن اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنا, قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترىنە, سونداي-اق م.لەرمونتوۆ اتىنداعى مەملەكەتتىك اكادەميالىق ورىس دراما تەاترى مەن «قر ۇلتتىق كىتاپحاناسى» مەكەمەلەرى «ۇلتتىق» مارتەبەگە يە بولدى.
الماتى
