جالپى اۋماعى 328,9 شارشى مەتردى قۇرايتىن جاڭا فرونت-وفيس قالالىق اكىمدىكتىڭ ءبىرىنشى قاباتىندا اشىلدى. ونىڭ اشىلۋىنا قر سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ پەن اتىراۋ وبلىسىنىڭ اكىمى ماحامبەت دوسمۇحامبەتوۆ قاتىستى.
جاڭا جوبانى تانىستىرعان اتىراۋ قالاسىنىڭ اكىمى قايرات ورازباەۆتىڭ ايتۋىنشا, «اشىق اكىمدىك» جوباسى پرەزيدەنت قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» قاعيداتىن جۇزەگە اسىرۋ ماقساتىندا اشىلدى. باستى ماقسات – مەملەكەتتىك ورگان مەن حالىق اراسىنداعى بايلانىستى نىعايتۋ.
«تۇرعىندار جەر قاتىناستارى ماسەلەسى, الەۋمەتتىك قامتۋ جانە تۇرعىن ءۇي كوممۋنالدىق شارۋاشىلىعى باعىتىنداعى مەملەكەتەتتىك قىزمەتتەردى وڭاي الادى. ولارعا اكىمدىكتىڭ 5 مامانى قىزمەت كورسەتەدى. سونداي-اق مۇندا قالالىق اكىمدىكتىڭ جالپى ءبولىمىنىڭ ماماندارى قالا اكىمى مەن ورىنباسارلارىنىڭ قابىلداۋىنا تىركەيدى. مۇندا قالا اكىمىنىڭ ورىنباسارى مەن بىرنەشە ءبولىم ماماندارى اشىق ۇلگىدە جۇمىس ىستەيدى. قۇجاتتاردى جيناقتاۋدى جەڭىلدەتۋ ماقساتىندا حالىققا قىزمەت كورسەتۋ ورتالىعىنىڭ ماماندارى دا بار» دەدى قالا اكىمى قايرات ورازباەۆ.
قالا اكىمىنىڭ ايتۋىنا قاراعاندا, «اشىق اكىمدىك» كەڭسەسىندە اينەكپەن بولىنگەن ارنايى الاڭ جاسالدى. مۇندا ازاماتتاردىڭ ەلەكتروندى ۇكىمەت كومەگىمەن وزىنە-ءوزى قىزمەت كورسەتۋ بولمەسى بار. ال بالالارعا ارنالعان ويىن بۇرىشى مەن كوفە-رۋم كەلۋشىلەرگە ارنالىپ وتىر.
