«قوعام وكىلدەرى قورشاعان ورتاعا اسەردى باعالاۋدىڭ بارلىق كەزەڭدەرىنە قاتىسادى. مىندەتتى تۇردە ءبىرىنشى ساناتتاعى وبەكتىلەردىڭ قورشاعان ورتاعا اسەرى باعالانادى. ال ەكىنشى ساناتتاعى وبەكتىلەر سكرينينگتەن وتەدى. ياعني, قورشاعان ورتاعا اسەردى باعالاۋدى جۇرگىزۋ قاجەت نەمەسە قاجەت ەمەس ەكەندىگى انىقتالادى. ءۇشىنشى ساناتتاعى وبەكتىلەر بويىنشا دەكلاراتسيا قابىلدانادى (قويمالار, جيھاز تسەحتارى, بەتون وڭدەۋ توراپتارى جانە قىزمەتى جەرگىلىكتى, قورشاعان ورتانى لاستاۋدىڭ ەلەۋسىز سيپاتىنداعى وزگە دە وبەكتىلەر)», دەدى مينيستر قر ەكولوگيالىق كودەكسىنىڭ جوباسىن تالقىلاۋ كەزىندە.
ءمينيستردىڭ ايتۋىنشا, ءتورتىنشى ساناتتاعى وبەكتىلەر رەتتەۋدەن تولىق بوساتىلعان (اۆتوجۋ, تقو, قوعامدىق تاماقتانۋ وبەكتىلەرى, قۋاتتىلىعى از قازاندىق قوندىرعىلارى بار ميكروبيزنەس وبەكتىلەرى).
«قورشاعان ورتاعا ەميسسيالار جانە تابيعات قورعاۋ ءىس-شارالارىنا بيۋدجەت قاراجاتىنىڭ ماقساتتى جۇمسالۋى ءۇشىن تولەنەتىن تولەم بويىنشا كەلەسىنى ايتا كەتۋ قاجەت. قازىرگى ۋاقىتتا قولدانىستاعى زاڭناما بويىنشا تابيعاتتى قورعاۋ ءىس-شارالارىنا ەميسسيا ءۇشىن تۇسكەن تولەمدەردى ماقساتتى جۇمساۋ مىندەتتەلمەگەن. سالدارىنان جەرگىلىكتى اتقارۋشى ورگاندار كەلىپ تۇسەتىن قاراجاتتىڭ تەك 45 پايىزىن عانا قورشاعان ورتانى قورعاۋعا بولەدى دەسەك بولادى. كەيبىر وبلىستاردا تابيعات قورعاۋ ءىس-شارالارىنا ارنالعان شىعىس 10 پايىزدان اسپايدى. وسىعان بايلانىستى, زاڭ جوباسىندا جەرگىلىكتى اتقارۋشى ورگاندار تۇسەتىن ەكولوگيالىق تولەمدەردىن ەسەبىنەن 100 پايىز كولەمىندە قارجىنى تابيعات قورعاۋ ءىس-شارالارىنا بولۋگە مىندەتتى ەكەندىگى كورسەتىلگەن», دەدى مىرزاعاليەۆ.
