ەر ەسىمى ەلوردا تورىندە تۇرسا...

ۇلى وتان سوعىسىنا قاتىس­قان قازاق حالقىنىڭ ەرجۇرەك ۇلدارى تاريحتا وشپەستەي ءىز قالدىرىپ, ۇر­پاققا ۇلگى ەتەر­لىكتەي ەرلىك كورسەتتى. سونىڭ ءبىرى باسقا ەرلىكتەرىمەن قاتار, بەرلين قالاسىنداعى رەيحس­تاگقا تۋ تىككەن راقىمجان قوشقار­باەۆ بولاتىن. بىراق قيتۇرقى ساياساتتىڭ كەسىرىنەن بۇل باتىر ۇزاق ۋاقىت ەلەۋسىز اتالىپ كەلدى. ەلبا­سىمىز وسى ولقىلىقتى ەسكەرىپ, ر. قوشقارباەۆقا  حا­لىق قاھارمانى اتاعىن بەر­گەندە سوعىس ارداگەرلەرى دە, حا­لىق تا ءبىر كوتەرىلىپ قالعان  ەدى. ەندىگى كەزەكتە ەرلەرىمىزدى ۇلىقتاپ, تاريحتاعى ادىلەتتى ورنىن بەلگىلەۋ, ولاردىڭ اسىل قاسيەتى – تۋعان ەلىنە, جەرىنە دەگەن ءسۇيىس­پەنشىلىگىن, وتانىن جانقيارلىق سەزىممەن قورعاۋىن دارىپتەپ, جاس­تاردىڭ ۇلتتىق سانا-سەزىمىن وياتۋعا جاعداي جاساۋ مىندەتى تۇر. سول سەبەپتى باتىردىڭ تۋعان جەرى استانا قالاسىنىڭ ماڭى بولعاندىقتان جانە ۇلى جەڭىستىڭ 65 جىلدى­عىنا وراي سۇراپىل سوعىستا جاۋدىڭ جاۋىپ تۇرعان وعىنا قاراماي, رەيحستاگقا ءبىرىنشى بولىپ تۋ تىككەن باتىر اتامىز­دىڭ  قۇرمەتىنە بىرقاتار ناقتى ءىس-شارالار جۇزەگە اسقانى ءجون دەپ ەسەپتەيمىن. اتاپ ايتقاندا, استانا قا­لاسى­نىڭ ءبىر باستى كوشەسىنە باتىر اتاۋىن بەرسە, باتىر مۇ­رالارىنا ارناپ مۇراجاي اشىل­سا, ەسكەرتكىشى ورناتىلسا, ەلدىك پارىزىمىزدىڭ ورىندالعانى بولار ەدى. وسى ماسەلە بويىنشا استانا قالاسىنىڭ سوعىس جانە ەڭبەك ارداگەرلەرىنىڭ اتىنان حات كەلىپ ءتۇستى. بۇل شارالاردىڭ ەلىمىزدىڭ الەمدىك تاريحقا قوسقان ۇلەسىن بەلگىلەپ, قوعامىمىزدىڭ ءارى قاراي دامۋىنا, كەلەشەك ۇرپاق­تىڭ ەلگە ادال, پاتريوتتىق سە­زىم­دە وزىنە سەنىمدى ءارى باتىل بولىپ وسۋىنە كوپ سەپتىگىن تي­گىزەرى ءسوزسىز. اتالعان ۇسىنىس­تاردى ءماجىلىستىڭ ءبىر توپ دەپۋتاتى ناتاليا گەللەرت, پەتر دميتريەنكو, سانسىزباي ەسىلوۆ, امانجول جازين, ەگور كاپپەل قولداپ وتىر. جەكسەنباي دۇيسەباەۆ, پارلامەنت ءماجىلىسىنىڭ دەپۋتاتى.