2020 جىلدىڭ 11 ايىندا الماتى قالاسى قوعامدىق دەنساۋلىق باسقارماسىنىڭ مەديتسينالىق ۇيىمدارىندا 423 030 ناۋقاس ەمدەلگەن بولسا, ونىڭ ىشىندە تمككك اياسىندا - 227 381 ادام, ءمامس بويىنشا 182 617 ناۋقاس ەم قابىلداعان.
- تاۋلىكتىك ستاتسيونارلار دەڭگەيىندە 307 381 ناۋقاس ەمدەلىپ شىقتى. بۇل جازىلىپ شىققانداردىڭ جالپى سانىنىڭ 72,6%-ىن قۇرايدى- دەپ مالىمدەدى اكىمدىكتىڭ ءباسپاسوز قىزمەتى.
ەرەسەكتەر ءۇشىن كارديولوگيالىق, ەندوكرينولوگيالىق, نەۆرولوگيالىق, رەۆماتولوگيالىق, وفتالمولوگيالىق, كارديوحيرۋرگيالىق مەديتسينالىق قىزمەتتەر وتە قاجەت.
العاشقى مەديتسينالىق-سانيتاريالىق كومەك ۇيىمدارى جانىنداعى كۇندىزگى ستاتسيونارلاردا 67 776 پاتسيەنت نەمەسە 2020 جىلعى 11 ايدا ەمدەلگەندەردىڭ جالپى سانىنىڭ 16% - ى ەم قابىلدادى. ونىڭ ىشىندە تمككك شەڭبەرىندە - 36 660 ادام, ءمامس شەڭبەرىندە-31 082 پاتسيەنت ەم العان.
امسك ۇيىمدارىنىڭ جانىنداعى ۇيدەگى ستاتسيونار دەڭگەيىندە 15 475 پاتسيەنت, ونىڭ ىشىندە تمككك شەڭبەرىندە - 15 343, ءمامس شەڭبەرىندە – 132 پاتسيەنت ەمدەلدى. ۇيدەگى ستاتسيونارلار نەگىزىنەن بالالار مەن قارت ادامدار ءۇشىن, سونداي-اق كوروناۆيرۋستىق ينفەكتسياسى بار ناۋقاستار مەن ولارمەن بايلانىستا بولعان ادامدارعا ءۇي كارانتينى ءۇشىن ۇيىمداستىرىلادى.
الماتىدا سوزىلمالى بۇيرەك جەتكىلىكسىزدىگى بار, گەمودياليز تەراپياسىنا مۇقتاج ناۋقاستارعا قىزمەت كورسەتىلەتىنىن اتاپ وتكەن ءجون. 15 گەمودياليز ورتالىعىندا 2 216 پاتسيەنت ەمدەلدى. گەمودياليز قىزمەتى تەك تمككك شەڭبەرىندە جۇزەگە اسىرىلادى.
سونداي-اق, قالا كلينيكالارىنىڭ بازاسىندا جوعارى تەحنولوگيالىق مەديتسينالىق قىزمەتتەر بويىنشا كومەك كورسەتىلەدى. 2020 جىلدىڭ 11 ايىندا 35 مەديتسينالىق ۇيىمدا 2 825 پاتسيەنت ەمدەلدى, ونىڭ ىشىندە تمككك شەڭبەرىندە – 152, ءمامس شەڭبەرىندە - 2 656 پاتسيەنت.
