الماتى قالاسىنداعى كوپبالالى جانە از قامتىلعان وتباسىلاردىڭ 372 تۇرعىنى ەندى جاڭا پاتەرلەرگە كىرەدى. «شاڭىراق» باعدارلاماسىمەن ناۋرىزباي اۋدانىنداعى «نۇرلى دالا» تۇرعىن ءۇي كەشەنىنەن 232 پاتەر بەرىلدى. بۇل باعدارلاما مەملەكەت باسشىسىنىڭ تاپسىرماسى بويىنشا قولجەتىمدى نەسيەلەر ارقىلى تۇرعىن ۇيمەن قامتاماسىز ەتۋ ماقساتىندا ازىرلەنگەن.
«نۇرلى جەر» تۇرعىن ءۇي-كوممۋنالدىق دامۋ باعدارلاماسىنىڭ «جالدامالى تۇرعىن ءۇي» باعىتى بويىنشا كەزەكتە تۇرعان 140 ادام پاتەر كىلتتەرىن الدى. تۇركسىب اۋدانىنىڭ «جاس قانات» ىقشاماۋدانىندا 80 پاتەر, الاتاۋ اۋدانىنىڭ 13-ءشى ىقشاماۋدانىندا 60 پاتەر بەرىلدى.
پاتەر كىلتتەرىن تاپسىرۋ راسىمىندە قالا اكىمى باقىتجان ساعىنتاەۆ جينالعانداردىڭ بارلىعىن تاۋەلسىزدىك كۇنىمەن قۇتتىقتادى, بۇگىنگى يگى شارانىڭ سيمۆوليكالى ەكەنىن اتاپ ءوتىپ, جاڭا قونىس يەلەرىنە باقىت تىلەدى.
«تاۋەلسىزدىك كۇنىندە باسپانالى بولۋ زور قۋانىش. ۇيلەرىڭىزدە ارقاشان بەيبىتشىلىك, قۋانىش پەن تىنىشتىق ورناسىن! قونىس تويى قۇتتى بولسىن!», - دەدى ب. ساعىنتاەۆ.
جىل باسىنان بەرى الماتىدا پاتەرگە مۇقتاج 2184 وتباسى باسپاناعا يە بولدى. سونىڭ ىشىندە «نۇرلى جەر» باعدارلاماسى بويىنشا 289, «باقىتتى وتباسى» – 376, «شاڭىراق» – 250, «الماتى جاستارى 3.0» – 1000, «تۇقجب-نىڭ نەسيەلىك تۇرعىن ءۇي جەلىسىمەن» – 360 ادام ءۇيلى بولدى.
