«بۇگىندە ەلىمىزدە 33 سپورتشى 7 سپورت ءتۇرى بويىنشا سوچيداعى وليمپيا ويىندارىنا قاتىسۋ قۇقىعىن يەلەنىپ وتىر. ليتسەنزيالىق كەزەڭ اياقتالعانعا دەيىن 10 سپورت ءتۇرى بويىنشا 40-تان استام ليتسەنزيا الۋعا ءۇمىت بار». كەشە ۇكىمەت وتىرىسىندا سپورت جانە دەنەشىنىقتىرۋ اگەنتتىگى باسشىسى وسىلاي دەدى.
«بۇگىندە ەلىمىزدە 33 سپورتشى 7 سپورت ءتۇرى بويىنشا سوچيداعى وليمپيا ويىندارىنا قاتىسۋ قۇقىعىن يەلەنىپ وتىر. ليتسەنزيالىق كەزەڭ اياقتالعانعا دەيىن 10 سپورت ءتۇرى بويىنشا 40-تان استام ليتسەنزيا الۋعا ءۇمىت بار». كەشە ۇكىمەت وتىرىسىندا سپورت جانە دەنەشىنىقتىرۋ اگەنتتىگى باسشىسى وسىلاي دەدى.
پرەمەر-مينيستر سەرىك احمەتوۆتىڭ توراعالىعىمەن وتكەن ۇكىمەت وتىرىسىندا 2014 جىلى سوچيدە وتەتىن XXII قىسقى وليمپياداعا قازاقستان قۇراما كومانداسىنىڭ دايىندىعى تالقىلانعان بولاتىن. وندا ۇكىمەت باسشىسى وليمپيالىق ويىندارداعى سپورتتىق ناتيجەلەردىڭ مەملەكەتتىڭ بەدەلى مەن ساليقالى يميدجدىك كورسەتكىشى رەتىندەگى ماڭىزدىلىعىنا توقتالىپ, قازاقستاندىق سپورتشىلاردىڭ سوچيداعى سايىستارعا ساپالى دايىندىعىن قامتاماسىز ەتۋ قاجەتتىگىن اتاپ ءوتتى. وسىعان وراي, سپورت جانە دەنەشىنىقتىرۋ ىستەرى جونىندەگى اگەنتتىككە وليمپيادا جارىستارىمەن قاتار, پاراليمپيادا ويىندارىنا ەلىمىزدىڭ قۇراما كوماندالارىن ساپالى دايىنداۋ جۇكتەلدى. س.احمەتوۆ سونداي-اق, ءباسپاسوز ورتالىعىن ۇيىمداستىرۋ جانە ۇلتتىق قۇرامانى قولداپ-جىگەرلەندىرۋ ءۇشىن بىرەگەي ۇيىمداسقان توپ رەتىندە جانكۇيەرلەردىڭ قاتىسۋىن قامتاماسىز ەتۋدى دە تاپسىردى.
الەمنىڭ 80 ەلىنەن 5 مىڭنان استام سپورتشى مەن رەسمي وكىلدەر قاتىسىپ, 15 سپورت تۇرىنەن 98 مەدالدار جيىنتىعى ساراپقا سالىناتىن سوچي وليمپياداسىندا ەلىمىزدىڭ بيىك بەلەستەن كورىنۋى اسا ماڭىزدى ەكەنى راس. بۇعان بارىنشا دايىندىق قاجەت. ال قازاقستاندىق سپورتشىلاردىڭ دايىندىعى قالاي؟ بۇل جونىندە كەشەگى وتىرىستا سپورت جانە دەنە شىنىقتىرۋ ىستەرى جونىندەگى اگەنتتىكتىڭ توراعاسى تاستانبەك ەسەنتاەۆ باياندادى. اگەنتتىك باسشىسىنىڭ ايتۋىنشا, سوچيداعى وليمپياداعا دايىندىق ءۇشىن ەلىمىزدە رەسپۋبليكالىق جەدەل شتاب قۇرىلعان. وليمپيادا قۇراماسىنا كانديداتتاردى دايىنداۋدىڭ قورىتىندى كەزەڭىنىڭ جەكە جوسپارلارى بەكىتىلىپ, وليمپيادا ويىندارىنداعى سپورتتىق ناتيجەلەر ينديكاتورلارى مەن مەجەلەگەن مىندەتتەر انىقتالىپتى.
ت.ەسەنتاەۆتىڭ سوزىنە قاراعاندا, ۇلتتىق قۇراما كوماندا 8 سپورت ءتۇرى بويىنشا ونەر كورسەتەدى. قازاقستاننىڭ وليمپيادا قۇراما كومانداسىنىڭ الەۋەتى – شاڭعىمەن جارىسۋ, بياتلون, فريستايل-موگۋلە, كونكيمەن جۇگىرۋ, مانەرلەپ سىرعاناۋ, سنوۋبورد سياقتى 6 سپورت تۇرىنەن باسەكەلەسۋگە مۇمكىندىك بەرەدى. سونداي-اق, سپورتشىلاردىڭ الدىنا تاۋ شاڭعىسى سپورتى, شاڭعىمەن ترامپليننەن سەكىرۋ, شاڭعى قوسسايىسى, شانا سپورتى بويىنشا دا ۇزدىك ناتيجەلەر كورسەتىپ, ليتسەنزيالار يەمدەنۋ مىندەتى قويىلىپ وتىر.
«قىسقى سپورت تۇرلەرى بويىنشا ۇلتتىق قۇرامانىڭ الدىنا ۆانكۋۆەردەگى وليمپيادا ويىندارىنداعى سپورت كورسەتكىشتەرىن جاقسارتۋ, ياعني ەكەۋدەن كەم ەمەس ءارتۇرلى قۇندىلىقتاعى مەدالدار يەمدەنىپ, جالپى كوماندالىق ەسەپتە 20-23 ورىندارعا شىعۋ مىندەتى قويىلىپ وتىر», دەدى ت.ەسەنتاەۆ.
اگەنتتىك باسشىسى, سونداي-اق, مەملەكەت باسشىسىنىڭ تاپسىرماسىن ورىنداۋ ءۇشىن حالىقارالىق وليمپيادا كوميتەتىنە 2022 جىلى الماتىدا XXIV قىسقى وليمپيادا ويىندارىن وتكىزۋ تۋرالى ءوتىنىم تاپسىرىلعانى تۋرالى حابارلادى.
دينارا بىتىكوۆا,
«ەگەمەن قازاقستان».
