«تاۋەلسىزدىگىمىزدىڭ 29 جىلدىعىمەن قۇتتىقتايمىز! كەلەسى جىلى 30 جىلدىعىن اتاپ وتەمىز. وسى مەرەكەدە ەلىمىز وركەندەي بەرسىن دەگىم كەلەدى. دانا حالقىمىزدا «بىلەكتى ءبىردى, ءبىلىمدى مىڭدى جىعادى» دەگەن ءسوز بار. سوندىقتان جاڭانى تانۋعا ۇمتىلاتىن اقىلدى جاستارىمىز كوبەيە بەرسە دەيمىن. ەل بولاشاعى جاستاردىڭ قولىندا!», - دەدى ءۇسىپحان سەيتىمبەت.
جازۋشىلار وداعىنىڭ مۇشەسى, اقىن امانعازى كارىپجان دا ءوز قۇتتىقتاۋىندا جاستار جاعىنا ءمان بەردى.
«بارشاڭىزدى تاۋەلسىزدىك كۇنىمەن قۇتتىقتايمىن. بۇل مەرەكە بارىمىزگە زور قۋانىش اكەلسىن. بىزگە ازاتتىق پەن بىرلىكتى سىيلاعان بۇل كۇن ءبارىمىزدى بىرىكتىرە ءتۇسىپ, ەلىمىزدىڭ ودان ءارى گۇلدەنۋىنە قىزمەت ەتسىن. جاستارعا ولاردىڭ ەڭ جاقسى دەڭگەيدە ءبىلىم الۋىن, ەلىمىزدىڭ بولاشاق ستراتەگيالىق جوسپارلارىنا ۇلەس قوسۋىن, مىقتى, اقىلدى, جان-جاقتى بولۋىن, وتكەندى ءبىلىپ, قۇرمەتتەۋىن, انا ءتىلىن جانە الەمنىڭ باسقا دا تىلدەرىن ءبىلۋىن, ءوز ەلىنىڭ ۇلى ازاماتتارى بولۋىن جانە ارقاشان مەيىرىمدى ءارى ادال بولۋىن تىلەيمىن!» - دەگەن اقىن الماتىلىقتاردى قۇتتىقتادى.
ەستەرىڭىزگە سالا كەتەيىك, بۇعان دەيىن ەلىمىزدىڭ تاۋەلسىزدىك كۇنىنە وراي الماتى قالاسى اكىمى باقىتجان ساعىنتاەۆتىڭ باستاماسىمەن شاھاردىڭ سولتۇستىك بولىگىندە «جەلتوقسان» ساياباعى اشىلدى. بۇل شەشىمدى جەلتوقسان وقيعاسىنىڭ قاتىسۋشىلارى وڭ قابىلدادى.
