Cالاۋاتتى ءومىر سالتىن ناسيحاتتاپ, قىسقى سپورت تۇرلەرىن جان-جاقتى دامىتۋدى ماقسات ەتكەن فەستيۆالگە 100-دەن استام اۋەسقوي بالىقشى قاتىستى. ولاردىڭ اراسىندا تاجىريبەلى ادامدار دا از ەمەس. ۇزىن-ىرعاسى ءۇش ساعاتقا سوزىلعان جارىس بارىسىندا ءاربىر قاتىسۋشىعا بىرنەشە قارماقپەن بالىق اۋلاۋعا رۇقسات بەرىلدى. تەك ءبىر ەرەكشەلىگى قارماقتاعى ىلمەكتەر ەكەۋدەن اسپاۋى كەرەك.
قاتىسۋشىلاردىڭ ىشىندە باس جاسار بالادان سەكسەندى القىمداپ قالعان اقساقالدارعا دەيىن بار. ءتىپتى, مۇز ايدىنىنا شىعىپ, قارماق سالعاندار اراسىنىن ايەلدەردى دە كەزدەستىرۋگە بولادى. سونىڭ ءبىرى كوكشەتاۋ قالاسىنىڭ تۇرعىنى وكسانا شيگرينا بالىق اۋلاۋدان ادام جانى راحاتقا بولەنىپ, دەنساۋلىعى نىعايادى دەپ ەسەپتەيدى. ءارى دوستارىڭمەن بىرگە بالىق اۋلاۋدىڭ ءجونى بولەك دەپ تۇيسىنەدى.
ەرەجە بويىنشا ەكى نەمەسە ودان دا كوپ قاتىسۋشىدا جينالعان بالىق سانى بىردەي بولسا, جەڭىمپاز بالىقتىڭ كولەمىنە قاراي انىقتالادى. جارىس قورىتىندىسى بويىنشا «العاشقى بالىق», «ەڭ كوپ بالىق», «ەڭ ءىرى بالىق», «ەڭ ۇزدىك بالىق اۋلايتىن وتباسى», «ۇزدىك بالىقشى ايەل» اتالىمدارىنىڭ جەڭىمپازدارى ماراپاتتالدى. ەڭ كوپ بالىق جيناعان قاتىسۋشىنىڭ قارماعىنا 48 بالىق ءىلىنىپتى. جەڭىمپازدارعا ۇيىمداستىرۋشىلار اتىنان ارنايى ديپلومدار مەن سىيلىقتار تابىس ەتىلدى.
