نۇرسۇلتان نازارباەۆ قورىنىڭ «قامقورلىق» وڭالتۋ ورتالىعى تۇركىستان وبلىستىق بالالار اۋرۋحاناسىنىڭ تۇسىنان اشىلدى. اقش, يتاليا, گەرمانيا, اۆستريا جانە رەسەي مەملەكەتتەرىنەن اكەلىنگەن 100-گە جۋىق جاڭا قۇرال-جابدىقتارمەن قامتىلعان ورتالىق تۇركىستان وبلىسى مەن شىمكەنت قالاسىنىڭ بالالارىن قابىلدايدى. ساۋىقتىرۋ ورتالىعىندا «تىركەۋگە ارنالعان اۋديومەتريالىق مودۋل» ورناتىلعان. وڭىردەگى العاشقى قۇرىلعى جاڭا تۋىلعان نارەستەلەردەن باستاپ, گيپەركينەتيكالىق سال اۋرۋى جانە اۋتيزممەن اۋىراتىن ناۋقاستاردى زەرتتەۋگە مۇمكىندىك بەرەدى.
سونداي-اق, بەينە-ەلەكتروەنتسەفالوگرافيا كابينەتى جۇمىس ىستەيتىن بولادى. بۇل ەرەكشە قامقورلىقتى قاجەت ەتەتىن بالالار ءۇشىن تاپتىرمايتىن مۇمكىندىك.
جالپى 500 شارشى مەتردى قامتيتىن ورتالىقتا مەحانوتەراپياعا ارنالعان جابدىقتار, يپپوتەراپياعا ارنالعان s-rider Sky ترەناجەرى, «اتلانت» نەيرو-ورتوپەديالىق پنەۆموكوستيۋمى, «مۋلتيستەنەدەر دجەنكس», جۇرۋگە جانە اياق-قولدارعا ارنالعان, پوزيتسيالىق جۇيەلەر, مونتەسسوري دامىتۋشى ترەناجەرلار جيىنتىعى مەن قولدىڭ ۇساق موتوريكاسىن دامىتۋعا ارنالعان ويىن تەراپياسى جيىنتىقتارىمەن جاساقتالعان.
ورتالىقتا بىلىكتى ماماندار سوڭعى ەمدىك ادىستەردى پايدالانا وتىرىپ نەيرو-ورتوپەديالىق بۇزىلۋلارى بار بالالار مەن جاسوسپىرىمدەرگە كەشەندى مەديتسينالىق-الەۋمەتتىك جانە پسيحولوگيالىق-پەداگوگيكالىق كومەك كورسەتىپ, ساۋىقتىرۋ شارالارىن جۇرگىزەدى. مامانداردىڭ بارلىعى ارنايى دايارلىقتان وتكەن. وڭالتۋ كۋرسى – 21 كۇن. مۇندا جىلىنا 360 بالانى ساۋىقتىرۋ جوسپارلانۋدا. ەرتە دامۋ ورتالىعىنداعى كەشەندى ەمى مۇمكىندىگى شەكتەۋلى بالالاردىڭ الەۋمەتتىك جانە اقىل, دەنە جاعىنان دامىپ جەتىلۋىن قالىپتاستىرۋعا سەپتىگىن تيگىزەدى. اتاپ ايتقاندا, قوزعالىس پەن سويلەۋدەگى كورسەتكىشتەرىن قالپىنا كەلتىرۋگە مۇمكىندىك بەرەدى.
سونداي-اق ورتالىقتىق اشىلۋى ءىس-شاراسى بارىسىندا وبلىس اكىمى «ەلباسى مەدالى» بويىنشا بەس باعىتتا كوش باستاعان وقۋشىلارعا ماراپاتتارىن تابىس ەتتى. سارىاعاش اۋدانىنىڭ وقۋشىسى مارعۇلان ادىلبەك, «مىڭ بالا» ۇلتتىق وليمپياداسىنىڭ جۇلدەگەرى, جەتىساي اۋدانىنىڭ «دارىن» مەكتەپ-ينتەرناتىنىڭ وقۋشىسى وتەلباي ءداۋىرحان, شىمكەنت قالاسىنداعى ەر بالالارعا ارنالعان ليتسەي-ينتەرناتىنىڭ وقۋشىسى شەرحان جامبەكوۆ ارنايى مەدالعا يە بولدى.
