«بارىس» حوككەيشىلەرى بۇعان دەيىن سىرت ايدىنداردا الا-قۇلا ويناپ ءجۇر. بىراق بۇل جولى جەرلەستەرىمىز قوناقتاعى ويىندار سەرياسىن جەڭىسپەن باستادى. «تراكتور ارەنا» سپورت كەشەنىندە وتكەن كەزدەسۋدىڭ ەسەبىن «بارىس» ويىنشىسى رومان ستارچەنكو اشتى. ال ەكىنشى كەزەڭدە نيكيتا ميحايليس مەرگەندىگىمەن كوزگە ءتۇسىپ, ەسەپتى ەسەلەدى. ءۇشىنشى كەزەڭ باستالىسىمەن-اق مەتت فرەتتين «بارىس» كومانداسىنىڭ باسىمدىعىن ودان ءارى نىعايتىپ, ەسەپتى 3:0-گە جەتكىزگەن-ءدى.
ايدىن يەلەرىنىڭ العاشقى گولىن لوۋرەنس پيلۋت سوقتى. ارادا ءبىر مينۋت وتكەندە لينۋس ۆيدەلل «بارىستىڭ» ءتورتىنشى شايباسىن سوعىپ, جەرگىلىكتى جانكۇيەرلەردىڭ جەڭىستەن ءۇمىتىن ءۇزدى. سوڭعى كەزەڭنىڭ ورتا تۇسىندا لۋكاش سەدلاك كومانداسىنىڭ ەكىنشى گولىن سوققانىمەن, «تراكتوردى» جەڭىلىستەن قۇتقارىپ قالا المادى. قورىتىندى ەسەپ – 4:2. بۇگىنگە دەيىن 32 كەزدەسۋ وتكىزگەن «بارىستىڭ» ەنشىسىندە 35 ۇپاي بار. ولار «شىعىس» كونفەرەنتسياسىندا 8-ورىندا تۇر. ەلوردالىق كلۋب كەلەسى كەزدەسۋىن 19 جەلتوقساندا قىتايدىڭ «كۋنلۋن» كومانداسىمەن وتكىزەدى.
