ناقتىراق ايتساق, ەسىرتكى ساتۋدىڭ – 61, اسا ءىرى كولەمدە ەسىرتكى ساقتاۋ – 20, ەسىرتكى كونترابانداسى – 29, ال ەسىرتكى وسىمدىگىن زاڭسىز ەگىپ-ءوسىرۋدىڭ 75 دەرەگى انىقتالعان. سونداي-اق زاڭسىز اينالىمنان 6 توننا 719 كيلو ەسىرتكى زاتى تاركىلەندى. وبلىستىق پوليتسيا دەپارتامەنتى ءباسپاسوز قىزمەتىنىڭ دەرەگىنشە, سوتقا 154 ءىس جولدانىپ, 147 تۇلعا قىلمىستىق جاۋاپكەرشىلىككە تارتىلعان. ماسەلەن, ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرىمەن جۇرگىزىلگەن جەدەل-ىزدەستىرۋ جۇمىستارى بارىسىندا قاراشا ايىندا ماقتاارال اۋدانى تۇرعىنىنىڭ 6 گرامم ماريحۋانانى ساتقانى انىقتالىپ, قۇرىقتالدى. ونىڭ ۇيىنە ءتىنتۋ جۇرگىزۋ كەزىندە 8 دانا سىرىڭكە قورابى جانە قاعازعا ورالعان جالپى سالماعى 21 گرامم ماريحۋانا تاركىلەندى. كۇدىكتى قاماۋدا. ودان بولەك 6 گرامم ماريحۋانا ساتقان كەلەس اۋدانىنىڭ تۇرعىنى انىقتالىپ, ۇستالدى. ءتىنتۋ جۇرگىزۋ كەزىندە ونىڭ ۇيىنەن 1 دانا قاعازعا ورالعان سالماعى 23 گرامنان اساتىن ماريحۋانا ەسىرتكى زاتى تاركىلەندى. سونىمەن قاتار تولەبي اۋدانىنىڭ تۇرعىنى دا ەسىرتكى ساتىپ ۇستالعان. اتالعان قىلمىستىق ىستەرگە قاتىستى قىلمىستىق كودەكستىڭ 297-بابىمەن «ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ» بويىنشا تەرگەۋ امالدارى جۇرگىزىلۋدە.
سارىاعاش اپب-ءنىڭ پاترۋلدىك پوليتسيا ينسپەكتورلارى رەيدتىك جۇمىستارىن جۇرگىزۋ بارىسىندا كۇمان تۋدىرعان اۆتوكولىكتى توقتاتقان. تەكسەرۋ كەزىندە اۆتوكولىكتىڭ ىشىنەن اڭشى مىلتىعى مەن كولىكتە وتىرعان جولاۋشى ەر ازاماتتىڭ قالتاسىنان پاكەتكە ورالعان حوش ءيىسى بار ەسىرتكىگە ۇقساس وسىمدىك تابىلىپ, زاتتاي دالەلدەمە رەتىندە تاركىلەنگەن. اتالعان جايت قىلمىستىق كودەكستىڭ 296-بابى «ەسىرتكى, پسيحوتروپتىق زاتتارمەن, سول تەكتەستەرمەن وتكىزۋ ماقساتىنسىز زاڭسىز جۇمىس ىستەۋ» بويىنشا تىركەلدى. ساراپتاماعا سايكەس, تاركىلەنگەن ەسىرتكى سالماعى شامامەن 3 گرامم بولاتىن «كەپتىرىلگەن ماريحۋانا» بولىپ شىقتى. وسى وقيعا بويىنشا قازىرگى تاڭدا تەرگەۋ امالدارى جۇرگىزىلۋدە. ەسىرتكىگە قاتىستى تاعى ءبىر وقيعا وسى اۋداندا ورىن الىپ وتىر. سارىاعاش اپب كەزەكشى ءبولىمىنىڭ «102» پۋلتىنە «جىبەك جولى» شەكارا بەكەتىندە ەسىرتكى كونترابانداسىنىڭ ءىس-ارەكەتى انىقتالعانى تۋرالى حابارلاما كەلىپ ءتۇستى. بۇل وقيعادا پوليتسەيلەرگە نانو اتتى قىزمەتتىك يت كومەكتەسكەن. ياعني ءيىسشىل يت وتكىزۋ پۋنكتىنەن ءوتۋ كەزىندە شەتەلدىكتەردىڭ بىرىنە بەلگى بەرگەن. جەدەل ۋاكىلدەر كۇدىكتى وزبەكستان ازاماتىن ءتىنتۋ كەزىندە كۇرتەشەسىنەن ەسىرتكى زاتىنا ۇقساس تۇيىنشەكتى تاۋىپ, تاركىلەدى. ءتارتىپ ساقشىلارى ۇستالعان ازاماتتى اۋداندىق پوليتسيا بولىمىنە جەتكىزدى. ساراپتاماعا سايكەس, الىنعان وسىمدىك تەكتەس زات سالماعى 1 گرامنان اساتىن «كەپتىرىلگەن ماريحۋانا» بولىپ شىقتى. قازىرگى ۋاقىتتا اتالعان جايت بويىنشا قىلمىستىق كودەكستىڭ 286-بابى «اينالىمنان الىنعان زاتتاردىڭ نەمەسە اينالىسى شەكتەلگەن زاتتاردىڭ كونترابانداسى» بويىنشا سوتقا دەيىنگى تەرگەۋ امالدارى جۇرگىزىلۋدە. كۇدىكتى قاماۋعا الىنعان.
ەسىرتكىگە قارسى كۇرەستى باسەڭدەتپەگەن ءتارتىپ ساقشىلارى وبلىس تۇرعىندارىن زياندى ادەتتەردەن باس تارتىپ, سالاۋاتتى ءومىر سالتىن ۇستانۋعا شاقىرادى. سونداي-اق ەسىرتكى زاتتارىن زاڭسىز ساقتاعانى, وتكىزگەنى, وسىرگەنى جانە كونترابانداسى ءۇشىن قىلمىستىق جاۋاپكەرشىلىك قاراستىرىلعانىن ۇنەمى ەسكەرتىپ كەلەدى.
تۇركىستان وبلىسى
