ايماقتار • 12 جەلتوقسان، 2020

جاڭاتاستا 180 پاتەرلى ەكى تۇرعىن ءۇي قولدانىسقا بەرىلدى

جامبىل وبلىسى جاڭاتاس قالاسىندا كوپتەن بەرى جارامسىز، بوس-قاڭىراپ تۇرعان 180 پاتەرلى كوپقاباتتى ەكى ءۇي قايتا جاڭعىرتۋدان ءوتىپ، تاۋەلسىزدىك مەرەكەسى قارساڭىندا پايدالانۋعا بەرىلدى، دەپ حابارلايدى Egemen.kz

ايىم ءداۋىت

پاتەر كىلتتەرىنە يە بولعانداردىڭ باسىم بولىگى – الەۋمەتتىك جاعىنان از قامتىلعان جانە جىلدار بويى پاتەر كەزەگىندە تۇرعان وتباسىلار. جىل ساناپ دامىپ كەلە جاتقان جاڭاتاس قالاسىنداعى تۇرعىن ءۇي ماسەلەسى وڭ تۇرعىدا شەشىلىپ كەلەدى. بۇل تۋرالى قونىس تويدىڭ سالتاناتتى جيىنىندا قۇتتىقتاۋ ءسوز العان سارىسۋ اۋدانىنىڭ اكىمى باقىتجان جاقسىلىقوۆ ايتتى.

"بۇگىنگە دەيىن جاڭاتاس قالاسىندا تۇرعىن ءۇي كەزەگىندە — 1789 ازامات تىزىمدە تۇرعان ەدى دەسەك، بۇل ءتىزىم تاۋەلسىزدىك كۇنى قارساڭىندا قىسقارا ءتۇستى. ويتكەنى بۇگىن جاڭاتاس قالاسىندا كوپقاباتتى ەكى ءۇي قايتا جوندەۋدەن ءوتىپ، قولدانىسقا بەرىلدى. دەسەك تە، جىلدان-جىلعا قالا تۇرعىندارىنىڭ سانى كوبەيىپ كەلەدى. تيىسىنشە، تۇرعىن ءۇي كەزەگىندەگىلەر سانى دا ارتا تۇسۋدە. وسى ماسەلەنى شەشۋ، تۇرعىنداردى، اسىرەسە جاعدايى تومەن وتباسىلارى مەن مۇمكىندىگى شەكتەۋلى ازاماتتاردى تۇرعىن ۇيمەن قامتۋ ءۇشىن بارلىق مۇمكىندىكتەر قاراستىرىلۋدا"، دەدى اۋدان اكىمى.

ايتا كەتەيىك، "جۇمىسپەن قامتۋدىڭ جول كارتاسى" باعدارلاماسى اياسىندا قالانىڭ ەكىنشى شاعىن اۋدانىنداعى №24، №26 ۇيلەر قايتا جاڭعىرتىلىپ، پايدالانۋعا بەرىلىپ وتىر. سونىڭ ناتيجەسىندە ۇزاق جىلدار بويى كەزەكتە تۇرعان ازاماتتار بۇگىن جاڭا پاتەرگە يە بولدى. پاتەر كىلتتەرىن تابىستاۋ سالتاناتى بارلىق سانيتارلىق ساقتىق شارالارىن ۇستانا وتىرىپ ءوتتى. ءۇيلى بولعانداردىڭ قۋانىشىندا شەك جوق. سولاردىڭ ءبىرى – ءتورت بولمەلى پاتەرگە يە بولعان كوپبالالى انا ايدا اقىلبەكوۆا. ول بىرنەشە جىلدان بەرى سەگىز ۇل-قىزىمەن پاتەر جالداپ تۇرىپ كەلگەن.

"مىنە، كوپتەن بەرگى ارمانىمىز بۇگىن ورىندالىپ وتىر. مەرەكەگە وراي بۇل تاماشا تارتۋ بولدى"، دەيدى ول.