سونىمەن «باتىرلار مەن اقىندار ەلى» اتانعان الماتى وبلىسى جامبىل اۋدانىنداعى ۇزىناعاش اۋىلىندا قونىس تەپكەن ازاماتتىق قورعانىس جۇيەسىندەگى باۋىرجان مومىش ۇلى اتىنداعى 28237 اسكەري ءبولىمىنىڭ قۇرىلعانىنا 30 قاراشا كۇنى 47 جىل تولدى. جارتى عاسىرعا جۋىق بەلەستە اسكەري ءبولىمنىڭ ايبىندى قۇتقارۋشىلارى ەلىمىز بەن بايتاق جەرىمىزدىڭ قاۋىپسىزدىگىن قامتاماسىز ەتۋ جولىندا ايانباي تەر توگىپ كەلەدى.
ەل تاۋەلسىزدىگى جاريالانعاننان كەيىن توتەنشە جاعدايلار جونىندەگى كوميتەتى باسشىلىق قۇرامىنىڭ ۇسىنىسىمەن 1995 جىلى اسكەري بولىمگە كەڭەس وداعىنىڭ باتىرى, حالىق قاھارمانى, داڭقتى قولباسشى باۋىرجان مومىش ۇلىنىڭ ەسىمى بەرىلدى.
وتكەنگە كوز سالا وتىرىپ, اسكەري ءبولىمنىڭ وزىندىك دەربەس تاريحى بار ەكەنىن كورەمىز. اسكەري ءبولىمنىڭ قالىپتاسۋى مەن اياعىنان تىك تۇرۋىنا تاجىريبەلى قۇتقارۋشى ماماندار, بىلىكتى وفيتسەرلەر مەن ارىندى ساربازدار اتسالىستى. قۇرىلعان كۇنىنەن باستاپ تاۋەلسىزدىك جىلدار بەلەسىندە ءبولىم جەكە قۇرامى ەرلىكتەر مەن باتىرلىق ۇلگىلەرىنە تولى داڭقتى جاۋىنگەرلىك جولدان ءوتتى. ءتۇرلى اپاتتار, تابيعي جانە تەحنوگەندىك سيپاتتاعى توتەنشە جاعدايلاردى جويۋمەن قاتار قۇتقارۋ جۇمىستارىن جۇرگىزۋدە ءبولىم جەكە قۇرامى رەسپۋبليكامىزدىڭ ءبىرشاما وڭىرلەرىندە قىرۋار جۇمىس اتقارعان ەكەن.
«1979 جىلى ءبولىمنىڭ جەكە قۇرامى مەدەۋ شاتقالىنداعى الاپات ءورتتى اۋىزدىقتاۋعا, 1984 جىلى الماتى وبلىسى كەگەن اۋدانىنداعى ورمان ءورتىن سوندىرۋگە, 1993 جىلى الماتىدا تىرىسقاق ىندەتىن جويۋعا, 1994 جىلى قىزىلوردا وبلىسى, لەنينسك (بايقوڭىر) قالاسىندا قۇتقارۋ جۇمىستارىن جۇرگىزۋگە, گاز جارىلىسىنان بەس قاباتتى ءۇيدىڭ قيراۋى سالدارىنان قازا تاپقان ادامداردى قۇتقارۋعا, 1997 جىلى بۇرىنعى تالدىقورعان وبلىسى الاكول اۋدانىنداعى قازاق-قىتاي شەكاراسىندا ءورتتى سوندىرۋگە, 1997 جىلى ءىرى كولەمدەگى توتەنشە جاعدايلار كەزىندەگى تمد كورپۋسىنىڭ كۇشتەرى بىرلەسىپ ارەكەت ەتۋ جونىندەگى وقۋ-ادىستەمەلىك جيىندارعا, 1999 جىلى اقش-تىڭ اريزونا شتاتىنداعى قۇتقارۋ قىزمەتىمەن بىرگە وتكىزىلگەن «ايۆەر-99» حالىقارالىق وقۋ-ادىستەمەلىك جيىندارىنا, 1999 جىلى راكەتا تاسىمالداۋشى «پروتون-3» اپاتىنىڭ زاردابىن جويۋعا, 2003 جىلى جامبىل وبلىسى, ت.رىسقۇلوۆ اۋدانىنداعى قۇلان اۋىلىندا بولعان جەر سىلكىنىسىنىڭ زارداپتارىن جويۋعا, 2004 جىلى جامبىل وبلىسى جۋالى اۋدانىندا قاردا قالعانداردى قۇتقارۋ جۇمىستارىنا, 2007 جىلى جامبىل اۋدانى اكىمىنىڭ ءوتىنىمى نەگىزىندە وتكەن سەلدەن كەيىنگى اقسەڭگىر سۋقويماسىندا قايتادان جوندەۋ جۇمىستارىن جۇرگىزۋگە, 2010 جىلى الماتى وبلىسى اقسۋ اۋدانى قىزىلاعاش ەلدى مەكەنىندەگى سۋ تاسقىنىنىڭ زاردابىن جويۋ مەن جەرگىلىكتى تۇرعىندارعا كومەك كورسەتۋ جۇمىستارىن جۇرگىزۋگە, 2011 جىلى ىلە-الاتاۋ تاۋلى بوكتەرىندە وتكەن داۋىلدى جەل سالدارىن جويۋعا, 2012 جىلى وڭتۇستىك قازاقستان وبلىسىندا بولعان سۋ تاسقىنىنىڭ زارداپتارىن جويۋعا, 2013 جىلى جامبىل وبلىسى تالاس اۋدانى قاراتاۋ قالاسىنداعى بولعان داۋىلدىڭ زارداپتارىن جويۋعا بەلسەنە قاتىستى», دەيدى 28237 اسكەري ءبولىمىنىڭ اعا لەيتەنانتى ايدوس بايشاعىروۆ.
اسكەرىمىزدىڭ الەۋەتىن كوتەرۋ ماقساتىندا ەلباسى جارلىعىمەن 2015 جىلدىڭ 21 ساۋىرىندە «قازاقستان رەسپۋبليكاسىنىڭ ۇلتتىق ۇلانى تۋرالى» زاڭ قابىلدانىپ, ىشكى اسكەرگە ۇلتتىق ۇلان مارتەبەسى بەرىلدى. سول جىلى قازاقستان رەسپۋبليكاسى توتەنشە جاعدايلار جونىندەگى كوميتەتكە باعىنىستا بولعان 28237 اسكەري ءبولىمى ىشكى ىستەر مينيسترلىگى ۇلتتىق ۇلاننىڭ قاراماعىنا ءوتتى.
قۇقىقتىق ءتارتىپ اسكەرلەرىنىڭ قاتارىنا كىرگەن اسكەري بولىمگە جاۋىنگەرلىك دايىندىق ازىرلىگى ارتىلعان بارلىق قىزمەتتىك-جاۋىنگەرلىك تاپسىرمالاردى ءوز ۋاقىتىندا اتقارۋعا مۇمكىندىك جاسالدى.
سونىڭ ءبىر ايعاعى, 2015 جىلى الماتى قالاسى ناۋرىزباي اۋدانىنداعى قارعالى, كامەنكا ەلدى مەكەندەرىن سۋ باسۋدان تۋىنداعان توتەنشە جاعداي سالدارىن جويۋعا قاتىسىپ, تۇرعىنداردى قاۋىپسىز ايماققا كوشىرىپ, اپات العان ورىنداردا زالالسىزداندىرۋ جۇمىستارىن جۇرگىزۋمەن قاتار مەملەكەتتىك اكىمشىلىك مەكەمەلەردىڭ, مەكتەپتەردىڭ اۋلالارىن لايدان تازارتتى. سونىمەن قاتار ۇلتتىق ۇلاننىڭ قۇرامىندا بولعان 28237 اسكەري ءبولىمىنىڭ قۇتقارۋشىلارى پاندەميا كەزىندە 2020 جىلعى 5 مامىردان باستاپ 21 مامىرعا دەيىن تۇركىستان وبلىسى ماقتاارال اۋدانىنىڭ ەلدى مەكەندەرىندە ورىن العان توتەنشە جاعداي اپاتىنىڭ سالدارىن جويۋعا قاتىستى. ناتيجەسىندە اسكەري ءبولىم قۇتقارۋشىلارىنىڭ كۇشىمەن ەلدى مەكەندەردەن 733 مال ولەكسەسى, 100-دەن اسا قۇستاردىڭ ولەكسەسى, سۋ باسىپ قالعان ۇيلەردەن تۇرعىنداردىڭ جەكە زاتتارى شىعارىلدى. 208 تۇرعىن ءۇيدىڭ, 1 مەكتەپتىڭ جانە 1 بالاباقشانىڭ اۋلالارى لايدان تازارتىلدى, سونىمەن قاتار 122 توننا توپىراق سەبىلىپ, جولدار اشىلدى, قۇم تولتىرىلعان قاپتار ازىرلەنىپ, بوگەتتەر جاسالدى.
ەلىمىزدە كوروناۆيرۋس بەلەڭ العان كەزدە مەملەكەتتە توتەنشە جاعدايلار مينيسترلىگىنىڭ قاجەتتىلىگى تۋىنداپ, پرەزيدەنت ق.توقاەۆ ءوزىنىڭ بيىلعى جولداۋىندا توتەنشە جاعداي مينيسترلىگىن قايتا قۇرۋعا پارمەن بەردى. ارتىنشا پرەزيدەنت جارلىعىمەن توتەنشە جاعداي جونىندەگى مينيسترلىگى قايتا قۇرىلدى. سونىڭ ناتيجەسىندە ءىىم ۇلتتىق ۇلانى قۇزىرىنداعى 28237 اسكەري ءبولىمى قايتا قۇرىلعان توتەنشە جاعدايلار مينيسترلىگىنىڭ قاراماعىنا ءوتتى.
مىنە, وسىناۋ زاڭعار جولدىڭ بەلەسىندە ءور رۋحتى قولباسشى ب.مومىش ۇلى اتىنداعى 28237 اسكەري ءبولىمىنىڭ ساربازدارى 47 جىل بويى وتان الدىنداعى مىندەتتەرىن اتقارۋدا سەنىمگە سەلكەۋ تۇسىرگەن ەمەس.
الماتى وبلىسى
