فەستيۆال اياسىندا فيلارمونيا سوليستەرى جانە ۇجىمنىڭ قاتىسۋىمەن بىرقاتار دۋماندى ءىس-شارالار وتكىزىلەدى.
«جاڭا جىلدىق فەستيۆال كورەرمەنگە ۇمىتىلماس عاجايىپ كۇي مەن شاتتىق سەزىمىن سىيلارى ءسوزسىز», دەيدى ونەر ورداسىنىڭ ۇجىمى. سەبەبى, ءار كونتسەرتتىڭ باعدارلاماسى مەرەكەنىڭ جالپى اتموسفەراسىنا سايكەس جاسالعان. فەستيۆال فيلارمونيانىڭ بارلىق ۇجىمدارى مەن سوليستەرىنىڭ قاتىسۋىمەن وتەتىن ۇلكەن سالتاناتتى گالا-كونتسەرتپەن اياقتالادى.
فەستيۆالدىڭ نەگىزگى ماقساتى – الەمدىك كلاسسيكالىق مۋزىكانىڭ ءھام ۇلى قازاق ونەرىنىڭ رۋحاني قاراشاڭىراعىنا اينالعان جامبىل اتىنداعى قازاق مەملەكەتتىك فيلارمونياسىنىڭ مەرەيتويىن اتاپ ءوتۋ جانە 85 جىل ىشىندە وسى ۇجىمدا ەڭبەك ەتكەن ۇلى ەسىمدەردى ۇلىقتاپ, مۋزىكا ونەرىنىڭ وزىق ۇلگىلەرىن ناسيحاتتاۋ بولىپ تابىلادى. بۇل فەستيۆال جىل سايىنعى داستۇرگە اينالادى دەپ جوسپارلانۋدا.
جامبىل اتىنداعى قازاق مەملەكەتتىك فيلارمونياسى 1935 جىلدىڭ 14 قاڭتار كۇنى قۇرىلدى. تۇڭعىش ديرەكتورى جانە كوركەمدىك جەتەكشىسى بولىپ مۋزىكاتانۋشى, عالىم, كومپوزيتور, ديريجەر, قازاقستاننىڭ حالىق ءارتىسى, اكادەميك احمەت قۋان ۇلى جۇبانوۆ قىزمەت اتقاردى. سول كۇننەن بەرى 85 جىل كولەمىندە فيلارمونيا ەلىمىزدەگى ەڭ ءىرى مادەني ورتالىقتاردىڭ بىرەگەيى ءارى الماتى قالاسىنىڭ تاريحي ساۋلەتتى عيماراتى بولىپ تابىلادى.
فيلارمونيانىڭ العاشقى قۇرامىندا قازاق ونەرىندە اتى اڭىزعا اينالعان اتاقتى تۇلعالار دينا نۇرپەيىسوۆا, قالي جانتىلەۋوۆ, وقاپ كابيعوجين, امىرە قاشاۋباەۆ, جامال وماروۆا, عاريفوللا قۇرمانعاليەۆ, كۇلاش بايسەيىتوۆا, بيبىگۇل تولەگەنوۆا, اعايىندى ريشات جانە ءمۇسلىم ابدۋلليندەر سىندى ءبىرتۋار تالانتتار قىزمەت ەتتى.
قازىرگى تاڭدا جامبىل اتىنداعى قازاق مەملەكەتتىك فيلارمونياسىنىڭ قۇرامىندا الەمگە اتتارى ايگىلى ۇجىمدار: نۇرعيسا تىلەنديەۆ اتىنداعى اكادەميالىق فولكلورلى-ەتنوگرافيالىق وركەسترى, قر مەملەكەتتىك اكادەميالىق سيمفونيالىق وركەسترى, قر مەملەكەتتىك ۇرمەلى اسپاپتار وركەسترى, باقىتجان بايقاداموۆ اتىنداعى مەملەكەتتىك حور كاپەللاسى, عازيزا جۇبانوۆا اتىنداعى مەملەكەتتىك ىشەكتى اسپاپتار كۆارتەتى, مەملەكەتتىك قاراعايلى ۇرمەلى اسپاپتار كۆينتەتى بار.
