ورتالىق سايلاۋ كوميسسياسىنىڭ وتىرىسىنان كەيىن وتكەن ءباسپاسوز ءماسليحاتىندا كونستانتين پەتروۆ: "ترانسلياتسياعا سالىناتىن تىيىمعا قاتىستى ايتار بولساق, بۇل ماسەلە قازىرگى ۋاقىتتا الەۋمەتتىك جەلىدە قىزۋ تالقىلانىپ جاتىر. شىنتۋايتىندا, ءبىز ترانسلياتسياعا شەكتەۋ قوياتىن ەشقانداي قاۋلى شىعارعان جوقپىز. سايلاۋ ۋچاسكەسىنەن ترانسلياتسيانى جۇرگىزۋگە باق قۇقىلى. بۇرىن سولاي بولعان, بۇگىن دە سولاي بولىپ قالا بەرمەك. ءبىز جاعدايدىڭ ءمان-جايىن تۇسىندىرسەك دەيمىز. قازىرگى زاڭناما تالاپتارىنا سايكەس, كەدەرگىسىز تۇسىرۋگە بولادى. ياعني ۇلتتىق بايقاۋشىلار كەدەرگىسىز ءتۇسىرىلىم جۇرگىزەدى, تەك ەكى شەكتەۋ بار – داۋىس بەرۋدىڭ قۇپيالىلىعى مەن جەكە مالىمەتتەر ساقتالۋى ءتيىس. قالعان ەشقانداي شەكتەۋ جوق", دەپ ايتىپ ءوتتى.
ول سونىمەن قاتار تۇسىرىلگەن ۆيدەونى بايقاۋشىلاردىڭ تاراتۋ ماسەلەسىنە قاتىستى پىكىر ءبىلدىردى.
"كونتەنتتى تاراتۋ جونىندەگى بايقاۋشىلاردىڭ قۇزىرەتىنە كەلەر بولساق, ول زاڭدا قاراستىرىلماعان. ءبىز بايقاۋشىلاردىڭ سايلاۋ ۋچاسكەسىندە ۆيدەوترانسلياتسيا جۇرگىزۋىنە ءاردايىم قارسى شىعىپ كەلدىك. ورتالىق سايلاۋ كوميسسياسىنىڭ بۇل باعىتتاعى پوزيتسياسى ەش وزگەرگەن جوق", دەدى كونستانتين پەتروۆ.
ايتا كەتسەك, بۇعان دەيىن ورتالىق سايلاۋ كوميسسياسىنىڭ مۇشەسى سەرىك سىدىقوۆ سايلاۋ ۋچاسكەلەرىندە بەينەترانسلياتسيا جۇرگىزۋ زاڭنامادا قاراستىرىلماعانىن ءمالىم ەتكەن ەدى.
