«بۇگىندە بيزنەستىڭ دە باعىتتارى جاڭارۋدا. سوعان سايكەس وزگەرتۋلەر ورىن الۋ كەرەك. اسىرەسە, وزىق تا قابىلەتتى جاستاردى ءوسىرۋ كەرەك. جاستارعا بيزنەسپەن اينالىسۋدىڭ جولىن كورسەتكەن ەلباسى نۇرسۇلتان نازارباەۆتىڭ قولداۋىمەن, مەملەكەت باسشىسىنىڭ تاپسىرماسىمەن ەلىمىزدە كوپتەگەن بيزنەس – جوبالار ءساتتى جۇزەگە اسۋدا. ءبىز تۇركىستان وڭىرىندە زاماناۋي جاڭا يدەيالاردى, تۋريزم, ءوندىرىس سالالارىن جاڭعىرتاتىن جاڭا جوبالاردى تارتامىز, قولدايمىز», - دەدى ومىرزاق شوكەەۆ.
وڭىردە جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى پاندەمياعا قاراماستان وڭ كورسەتكىشكە يە. بۇل وسىمدە ۇكپ «باستاۋ» جوباسى تۇلەكتەرىنىڭ دە ۇلەسى از ەمەس. باستاۋلىقتار جوبالارىنىڭ ارنايى كورمەسىمەن وبلىس اكىمىن پالاتا ديرەكتورى تيمۋر ناقىپبەكوۆ تانىستىرىپ, جۇمىس ناتيجەلەرىنە توقتالىپ ءوتتى.
«كاسىپكەرلەر پالاتاسىنىڭ كەڭەسشىلەرى 11 ايدا كاسىپكەرلىك سۋبەكتىلەرىنە 13 711 كەڭەس بەرگەن. بۇدان بولەك, «باستاۋ» جوباسى اياسىندا 3676 تۇلەك وقۋدان ءوتىپ, ونىڭ 1 500-ءىنىڭ جوبالارى 11 60,2 ميلليون تەڭگەگە قارجىلاندىرىلعان», - دەدى ناقىپبەكوۆ.
كەزدەسۋدە وڭىرلىك كەڭەس مۇشەلەرى وبلىس باسشىسىن ونەركاسىپتىك پاركتەر قۇرۋ جونىندەگى جوبالارىمەن تانىستىردى.
ءبىلىم بەرۋ سالاسىنداعى جاڭاشا بەتبۇرىستار, بىرەگەي ءوندىرىس, يننوۆاتسيالىق تەحنولوگيالاردىڭ تۇرلەرىن دامىتۋ جانە وڭىردە ۇلتتىق تاكسي قىزمەتىن قۇرۋ بويىنشا ەرەكشە جوبالار وبلىس اكىمى تاراپىنان قولداۋ تاپتى.
