ۆيتسە-پرەمەر كينوستۋديانى جاڭعىرتۋدىڭ جاڭا باعدارلاماسىمەن تانىستى. «قازاقفيلم» اق پرەزيدەنتى اقان ساتاەۆ مەملەكەت بولگەن قاراجات اياسىندا كەلەسى جىلى قۇرىلىس جۇمىستارىن باستاۋ جوسپارلانعانىن حابارلادى. ءۇش جىلدىق كەزەڭدە بارلىق نىساندار جوندەلەدى, ەكى انگار سالىنادى, ينجەنەرلىك جەلىلەر جانە ت. ب. جاڭعىرتىلادى.
«وسى جۇمىستاردىڭ ارقاسىندا ءبىز كينوستۋديانى جاڭا حالىقارالىق دەڭگەيگە شىعارىپ, ازيا ايماعىندا كوشباسشى ورىنعا شىققىمىز كەلەدى. ءبىز التىن مۇرانى ساقتاي وتىرىپ, العا ساپالى قادام جاساعىمىز كەلەدى. قالا اكىمدىگى تاراپىنان ۇلكەن قولداۋ كورسەتىلۋدە», - دەدى ا.ساتاەۆ.
ەرالى توعجانوۆ اكتەرلەر ءاسانالى ءاشىموۆ پەن مەرۋەرت وتەكەشەۆانى, سونداي-اق دىبىس وپەراتورى قادىر قوسايدى وتاندىق كينويندۋستريادا ەرەكشە ورىن الاتىن جانە ميلليونداعان كورەرمەن مويىنداعان «قىز جىبەك» پەن «اتاماننىڭ اقىرى» فيلمدەرىنىڭ 50 جىلدىعىمەن قۇتتىقتادى. كينەماتوگرافيستەرگە «قازاقفيلم» كينوستۋدياسى جانە «قازپوشتا» اق شىعارعان ارنايى پوشتا ماركالارى تابىس ەتىلدى.
كەزدەسۋ بارىسىندا قازاق اقىنى, جۋرناليست جانە رەداكتور, قازاقستاننىڭ ەڭبەك سىڭىرگەن قايراتكەرى, قر جازۋشىلار وداعىنىڭ توراعاسى ۇلىقبەك ەسداۋلەت ينفراقۇرىلىمدى جاڭعىرتۋ ماسەلەلەرىنە توقتالدى. ونىڭ ايتۋىنشا, الماتى قالاسى اكىمدىگىنىڭ قولداۋىمەن جازۋشىلار ءۇيىنىڭ نەگىزگى عيماراتىندا جوندەۋ جۇمىستارى اياقتالدى, كەلەسى ساتىدا - ءماجىلىس زالى. مودەرنيزاتسيالاۋ اياسىندا نىساننىڭ تاريحي كەلبەتىن ساقتاۋ كوزدەلگەنىن اتاپ وتكەن ءجون.
