"اعىندى سۋدى تازارتۋعا ارنالعان جابدىقتار جوق, وزەننىڭ قاتتى لاستانۋى بايقالادى. اعىزۋ بايباقتى وزەنىنىڭ ارناسىنا تازارتۋسىز جۇزەگە اسىرىلعان. توپىراق سىنامالارىنىڭ حيميالىق تالداۋى 26 مىڭنان اسا شارشى مەتر الاڭدا لاستاۋشى زاتتاردىڭ كونتسەنتراتسياسىنىڭ ارتۋىن كورسەتتى. سونىمەن قاتار 40 مىڭ باس شوشقاعا ارنالعان مال شارۋاشىلىعى كەشەنىندە 51 مىڭنان استام باس بولعان", دەلىنگەن حابارلامادا.
دەپارتامەنت انىقتالعان ەكولوگيالىق زاڭنامانى بۇزعانى ءۇشىن كاسىپورىنعا قاتىستى 11 اكىمشىلىك ءىس قوزعادى. سونداي-اق سۇراتىلعان مالىمەتتەردى بەرۋگە كەدەرگى كەلتىرگەنى ءۇشىن 3 اكىمشىلىك حاتتاما تولتىرىلدى.
اتالعان فاكت بويىنشا قىلمىستىق ءىس قوزعالدى. قازىرگى ۋاقىتتا كاسىپورىننىڭ قورشاعان ورتاعا كەلتىرگەن زالالدارىنىڭ سوماسى ەسەپتەلىپ جاتىر.
ەسكە سالايىق, 19 قاراشادا بەستاماق اۋىلىنىڭ 80-نەن استام تۇرعىنى شوشقا فەرماسىن جابۋدى تالاپ ەتىپ, نارازىلىققا شىققان بولاتىن. تارالعان ۆيدەوعا قاراعاندا, تۇرعىنداردىڭ كاسىپورىندى جابۋدى تالاپ ەتكەنىن اڭعارۋعا بولادى. ولاردىڭ ايتۋىنشا, شوشقا قالدىعى وزەن سۋىنا اعىپ جاتىر. تاعى ءبىر ۆيدەودان جول تالعامايتىن كولىك نارازى توپتان قاشىپ, قاقپانى قيراتىپ وتكەنىن كورۋگە بولادى.
سودان كەيىن بەستاماققا اكىمدىگىنىڭ ەكولوگتارى, سانەپيدباقىلاۋ قىزمەتكەرلەرى شىقتى. كوميسسيا قۇرىلىپ, وعان اۋىل تۇرعىندارى دا كىردى, تەكسەرۋ باستالدى.
