سوڭعى ۋاقىتتا شەتەلدىك اۆتوكولىك يەلەرىنىڭ بەلگىسىز بىرەۋلەردىڭ مەملەكەتتىك تىركەۋ نومىرلەرىن ۇرلاپ, كەيىن قايتارۋ ءۇشىن اقشا تالاپ ەتكەنى تۋرالى شاعىمدارى كوبەيىپ كەتتى. قاراعاندى وبلىستىق پوليتسيا دەپارتامەنتىنىڭ باسشىلىعى وسى قىلمىستاردى جاساۋعا كۇدىكتى تۇلعالاردى ۇستاۋ ماقساتىندا تۇنگى رەيدتەر وتكىزەتىن جەدەل-ىزدەستىرۋ توپتارىن قۇردى. ۇرلىق فاكتىلەرىنە تالداۋ جاساۋ بارىسىندا پوليتسيا قىزمەتكەرلەرى قىلمىستىڭ اتالعان ءتۇرىنىڭ كوپ جاسالعان اۋماعى قاراعاندى قالاسىنىڭ وڭتۇستىك-شىعىس اۋدانى ەكەنىن انىقتادى. سوندىقتان پوليتسيا قىزمەتكەرلەرى وسى اۋماققا باسا نازار اۋدارىپ, جۇمىستار اتقاردى. كۇندەلىكتى وتكىزىلگەن كەشەندى جەدەل-ىزدەستىرۋ ءىس-شارالارى وڭ ناتيجەگە قول جەتكىزۋگە مۇمكىندىك بەردى.
– 8 جەلتوقسان كۇنى تاڭعى ساعات 05.00 شاماسىندا قاراعاندى قالالىق پوليتسيا باسقارماسى كريمينالدىق پوليتسيا قىزمەتكەرلەرى وتكىزگەن جەدەل-ىزدەستىرۋ ءىس-شارالارى بارىسىندا يازەۆ كوشەسىندە ورنالاسقان ۇيلەردىڭ ءبىرىنىڭ اۋلاسىندا تۇرعان كولىكتەردىڭ بىرىنەن تىركەۋ ءنومىرىن شەشىپ جاتقان 18 جانە 20 جاستاعى ەكى ازامات ۇستالدى. تەكسەرۋ بارىسىندا ولاردان توعىز ءنومىر تاركىلەنىپ الىندى. سونداي-اق ۇستالعاندار قاراعاندى قالاسىندا اۆتوكولىكتەردەن تىركەۋ نومىرلەرىن ۇرلاۋدىڭ 29 فاكتىسىن مويىندادى, – دەدى قاراعاندى وبلىستىق پوليتسيا دەپارتامەنتىنىڭ باستىعى ەرلان فايزۋللين.
قازىرگى تاڭدا ۇستالعان ازاماتتارعا قاتىستى قازاقستان رەسپۋبليكاسى قىلمىستىق كودەكسىنىڭ 194-بابىنىڭ 2-تارماعىنا (قورقىتىپ الۋ) سايكەس قىلمىستىق ءىس قوزعالىپ, تەرگەۋ امالدارى وتكىزىلۋدە.
قاراعاندى وبلىستىق پوليتسيا دەپارتامەنتى كولىك يەلەرىنە كولىكتىڭ مەملەكەتتىك تىركەۋ ءنومىرى ۇرلانعان جاعدايدا دەرەۋ پوليتسياعا حابارلاۋ كەرەكتىگىن ەسكە سالادى.
