تۇركىستان وبلىسى سارىاعاش اۋدانىنىڭ 39 جاستاعى تۇرعىنى تۇڭعىشىن جەدەل-جاردەم قىزمەتىمەن پەرزەنتحاناعا بارا جاتقان جولدا بوسانعان. دارىگەرلەردىڭ ايتۋىنشا, كىندىگى موينىنا بىرنەشە رەت ورالعاندىقتان, نارەستە تۇنشىعىپ تۋىلعان. وبلىستىق مەديتسينالىق جەدەل-جاردەم قىزمەتكەرلەرى شۇعىل تۇردە جانداندىرۋ ءادىسىن قولدانىپ 10 مينۋت شاماسىندا ءسابيدىڭ تىنىس الۋىن قالپىنا كەلتىرگەن.
قازىر انا مەن بالانىڭ جاعدايى جاقسى, پەرزەنتحانادا دارىگەرلەردىڭ باقىلاۋىندا. جالپى, كۇن سايىن وبلىستىق جەدەل-جاردەم ستانساسىنىڭ 124 بريگاداسى شاقىرتۋعا شىعادى. تاۋلىگىنە ورتاشا ەسەپپەن 2000-عا جۋىق قوڭىراۋ تۇسۋدە. كەلەسى جىلى بريگادالار سانىن 150-گە دەيىن ارتتىرىپ, مەديتسينالىق جەدەل-جاردەم قىزمەتىن ودان ءارى جەتىلدىرۋ جوسپارلانعان.
