كەدەندىك شەكاراداعى قاۋىپسىزدىك

قىرعىز رەسپۋبليكاسى اۋما­عىن­داعى بولىپ جاتقان ساياسي تۇراقسىزدىققا بايلانىستى جامبىل وبلىسى بويىنشا كەدەندىك باقىلاۋ دەپارتامەنتى تاراپىنان ارنايى بۇيرىقپەن كەدەن شەكاراسى اۋماعىنداعى قاۋىپسىزدىكتى قامتاماسىز ەتۋ شارالارى قولعا الىنىپ, بىرقاتار جۇمىستار اتقارىلۋدا. ناقتى ايتار بولساق, دەپارتا­مەنت باستىعىنىڭ مىندەتىن اتقارۋشى ەرقابىل قوجبانوۆ­تىڭ بۇيرىعىمەن جامبىل وبلىسى اۋماعىنداعى كەدەندىك باقىلاۋ ايماقتارىنا دەپارتا­مەنت­تىڭ كونترابانداعا قارسى كۇرەس باسقارماسى, ىشكى قاۋىپ­سىزدىك ءبولىمىنىڭ قىزمەتكەرلەرى, قازاق­ستان رەسپۋبليكاسى ۇقك شەكارا قىزمەتى مەن باسقا دا قۇقىق قورعاۋ ورگاندارىمەن ءبىرى­گە وتى­رىپ, “قورداي”, “سىپا­تاي با­تىر”, “ايشا ءبيبى” كەدەن بەكەت­تەرى مەن ولارعا قاراستى باقى­لاۋ-وتكىزۋ پۋنكت­تەرىندە جەدەل-بوگەۋ شارالارىن جۇرگىزۋدە. قىرعىزستانداعى شيەلەنىستى جاعدايدى باس پايداسىنا جارا­تىپ قالۋعا تىرىسۋشىلار دا جوق ەمەس. 9 ساۋىردە “قورداي” كەدەن بەكەتىندە ءازىربايجان رەسپۋبلي­كاسىنىڭ ازاماتىن تەكسەرۋ كەزىن­دە كەدەندىك رەسىمدەلمەگەن 317 دانا تەحنيكالىق الماس تاس, 1 سۋ تاسى جانە مونشاقتار تابىلعان. سونداي-اق, سول كۇنى قىرعىز رەس­پۋبليكاسىنان قازاق­ستان رەس­پۋبليكاسىنا بەت العان ازاماتشا كەدەندىك رەسىمدەۋدىڭ جەڭىلدەتىلگەن ءتۇرى بويىنشا زاڭنامالاردى بۇزا وتىرىپ, التىننان جاسالعان 7 دانا القا, 9 دانا ايەلدەر ساقيناسى, 1 دانا ەرلەر ساقيناسى, 4 پار سىرعا جانە 5 دانا التىن بىلەزىك پەن كۋلونداردى الىپ وتپەك بولعان جەرىندە قۇرىقتالدى. بۇل فاكتىلەر بويىنشا ەلىمىز قك-ءنىڭ 209-بابى بويىنشا قىلمىستىق ءىس قوزعالىپ, ارنايى ورىندارعا جولداندى. كەدەندىك شەكاراداعى قاۋىپسىزدىك شارالارى ودان ءارى قاتاڭ قاداعالاۋعا الىنۋدا. كوسەمالى ساتتىباي ۇلى, جامبىل وبلىسى.