اڭگىمە بارىسىندا باس حاتشى ۇيىم كۇن ءتارتىبىنىڭ بارلىق اسپەكتىلەرى بويىنشا قازاقستان مەن بۇۇ اراسىنداعى ىنتىماقتاستىقتىڭ جوعارى دەڭگەيىن اتاپ ءوتتى. ول قازاقستاننىڭ حالىقارالىق ۇيىمنىڭ ايرىقشا ماڭىزدى جانە سەنىمدى سەرىكتەسى, ءارتۇرلى دىندەر مەن مادەنيەتتەرگە ءوزارا قۇرمەت داستۇرلەرىمەن تانىمال كوپجاقتى ديپلوماتيانىڭ سەنىمدى جاقتاۋشىسى ەكەنىن, سونداي-اق تۇراقتى مەدياتور جانە ەلدەر اراسىنداعى كوپىر ەكەندىگىن باسا ايتتى.
«ەلىمىزدىڭ جاھاندىق قارۋسىزدانۋ جانە باسقا دا سالالارداعى كوشباسشىلىعى ەرەكشە ماڭىزدى بولىپ قالا بەرەدى, ال ورتالىق ازياداعى ءرولى جانە بۇۇ قۇندىلىقتارىنا بەيىلدىلىگى جان-جاقتى مويىندالۋدا», - دەدى ا. گۋتەرريش.
بۇۇ باس حاتشىسى سونىمەن قاتار ونىڭ بىرنەشە رەت قازاقستاندا بولعانىن اتاپ ءوتىپ, پرەزيدەنت قاسىم-جومارت توقاەۆ پەن تۇڭعىش پرەزيدەنت - ەلباسى نۇرسۇلتان نازارباەۆقا جىلى تىلەكتەرىن جولدادى.
ءوز كەزەگىندە م. ءىلياسوۆ سۇحباتتاسۋشىسىنا قازاقستان باسشىلىعى اتىنان ىزگى تىلەكتەرىن جەتكىزىپ, ارىپتەستىكتى ودان ءارى نىعايتۋ اياسىندا بۇۇ-داعى جۇمىستىڭ باسىم باعىتتارى تۋرالى حاباردار ەتتى. يادرولىق قارۋدى جاھاندىق تاراتپاۋدى كۇشەيتۋ, حالىقارالىق تەرروريزمگە قارسى تۇرۋ مىندەتتەرى, سونداي-اق پرەزيدەنت ق. توقاەۆتىڭ بۇۇ باس اسسامبلەياسىنىڭ 75-ءشى سەسسياسىنىڭ جالپى ساياسي دەباتتارىندا ايتقان باستامالارى, ونىڭ ىشىندە بيولوگيالىق قاۋىپسىزدىك جونىندەگى حالىقارالىق اگەنتتىكتى قۇرۋ جانە دامۋ ماقساتىندا ۆولونتەرلەردى جۇمىلدىرۋدىڭ حالىقارالىق جىلىن جاريالاۋ اتاپ ءوتىلدى. تۇراقتى وكىل سونىمەن بىرگە قازاقستاننىڭ 2020-2021 جىلدارى تەڭىزگە شىعار جولى جوق دامۋشى ەلدەر توبىندا جاھاندىق توراعالىعى شەڭبەرىندە توپتىڭ مۇددەلەرىن بەلسەندى ىلگەرىلەتۋگە نيەتتى ەكەندىگىنە سەندىردى.
بۇۇ باس حاتشىسىنا قازاقستاننىڭ تۇڭعىش پرەزيدەنتى نۇرسۇلتان نازارباەۆ تۋرالى ۇلىبريتانيادا «FIRST» باسپاسى شىعارعان بريتان-قازاقستان قوعامىنىڭ توراعاسى رۋپەرت گۋدماننىڭ «ۇلت اتاسى: الەم ادامى. كوشباسشىلىق تاريحى» كىتابى تابىس ەتىلدى.
