بوكسشىلار پاندەميا جاعدايىندا 9 ايعا جۋىق شارشى الاڭدا بوي كورسەتپەگەننەن كەيىن بە, ايتەۋىر بارلىق بوكسشى رينگكە اش قاسقىرداي شىعىپ, الدىنداعى قارسىلاسىن اياعان جوق. ولار چەمپيوناتتىڭ ءبىرىنشى كۇنىنەن باستاپ, سوڭعى كۇنىنە دەيىن جانكۇيەرلەرگە تارتىستى جەكپە-جەك سىيلادى.
جالپى, بيىلعى چەمپيونات سەنساتسيا مەن توسىن وقيعالارعا تولى بولدى. ىرىكتەۋ كەزەڭىندەگى سەنساتسيالاردى ايتپاعاننىڭ وزىندە, فينالدىق سايىستا 100 پايىز جەڭىسكە جەتەدى دەگەن بوكسشىلاردىڭ ءوزى قارسىلاسىنان ايلاسىن اسىرا المادى. سونىڭ ءبىرى ەڭ جەڭىل سالماقتا بولدى. بەس رەت ەل بىرىنشىلىگىندە توپ جارعان 32 جاستاعى تاجىريبەلى بوكسشى تەمىرتاس ءجۇسىپوۆ فينالدا ەسىمى جانكۇيەرلەرگە تانىس ەمەس 19 جاستاعى دانيال سابيتپەن جۇدىرىقتاستى. قارسىلاسىنىڭ جاسىنان, تاجىريبەسىنەن قايمىقپاعان دانيال ءۇش راۋند بويى بەلسەندى قيمىلداپ, ناتيجەسىندە تورەشىلەردىڭ ءبىراۋىز شەشىمىمەن جەڭىسكە جەتتى.
سونداي-اق فينالدا جانكۇيەرلەردىڭ ايىزىن قاندىراتىن ناعىز جەكپە-جەكتى 52 كيلودا فينالعا شىققان بوكسشىلار كورسەتتى. توكيو وليمپياداسىنىڭ جولداماسىن يەلەنگەن ساكەن بيبوسىنوۆ فينالدا جاستار اراسىندا ءۇش مارتە ازيا چەمپيونى اتانىپ, ەرەسەكتەر دۋىنا بيىل عانا قوسىلعان سابىرحان ماحمۇدقا ەسە جىبەردى. جان الىسىپ, جان بەرىسكەن كەزدەسۋدە ەكى بوكسشى دا ايانىپ قالعان جوق. بىراق تورەشىلەردىڭ شەشىمى بويىنشا سابىرحاننىڭ مەرەيى ۇستەم بولدى. وسى جەتىستىگىنىڭ ارقاسىندا ول بوكس ماماندارىنا ءالى تالاي بيىكتەردى باعىندىراتىنىن دالەلدەدى. بۇل كەزدەسۋدىڭ تارتىستى ءوتۋىنىڭ نەگىزگى سەبەبى, ناۋرىز ايىندا يوردانيادا وتكەن وليمپيا ويىندارىنا جولداما بەرەتىن تۋرنيرگە كىمدى اپارارىن بىلمەي, باپكەرلەردىڭ پىكىرى ەكىگە بولىنگەندە سوڭعى شەشىم ماحمۇدقا ەمەس, بيبوسىنوۆقا تۇسكەن ەكەن. سودان سابىرحان وسى بىرىنشىلىكتە ساكەندى قالايدا جەڭىپ, ءبىرىنشى ءنومىر اتانامىن دەپ ءوز-وزىنە سەرت بەرگەن. ءتىپتى جەكپە-جەك سوڭىندا بەرگەن سۇحباتىندا سابىرحان ساكەندى ءوزىنىڭ باستى قارسىلاسى سانايتىنىن جاسىرعان جوق.
57 كگ سالماقتا قۇراما ۇزدىگى, توكيو وليمپياداسىنا جولداما العان سەرىك تەمىرجانوۆ ءوزىنىڭ راسىندا ۇزدىك ەكەنىن تاعى ءبىر دالەلدەدى. پاۆلودارلىق بوكسشى فينالعا دەيىن بارلىق قارسىلاسىن ءبىر دەممەن ۇتىپ, فينالدا اقمولا وبلىسىنىڭ وكىلى وراز اسىلقۇلوۆتى ەش قيىندىقسىز جەڭدى.
60 كگ سالماقتا وسىدان ەكى جىل بۇرىنعى ەل چەمپيوناتىندا ەكىنشى ورىن العان ماڭعىستاۋلىق ءساماتالى تولتاەۆ فينالدا شىعىسقازاقستاندىق بەكنۇر وجانوۆتى جەڭىپ, ەرەسەكتەر اراسىنداعى العاشقى چەمپيوندىعىنا قول جەتكىزدى. تولتاەۆ فينالعا جولداما بەرەر باسەكەدە قاراعاندىلىق ۆاسيلي سامچۋكتى جەڭسە, بەكنۇر وجانوۆ لوندون وليمپياداسىنىڭ قاتىسۋشىسى ەلوردالىق ءىلياس سۇلەيمەنوۆتەن باسىم تۇسكەن-ءدى.
63 كيلودا فينالدىق جەكپە-جەك وتكەن جوق. ويتكەنى اقمولا وبلىسىنان كەلگەن بولات ەرسۇلتان جاراقاتىنا بايلانىستى رينگكە شىعۋدان باس تارتتى. ءسويتىپ الماتى وبلىسىنىڭ وكىلى ەرتۋعان زەينۋللينوۆ بايگەنى شاپپاي الدى. توكيو وليمپياداسىنىڭ جولداماسىن يەلەنگەن زاكىر سافيۋللين جاراقاتىنا بايلانىستى جارتىلاي فينالعا شىقپاعان سوڭ قولا جۇلدەنى قاناعات تۇتتى.
69 كيلودا فينالدا قاراعاندىلىق ابىلايحان ءجۇسىپوۆ پەن جامبىلدىق اسلانبەك شىمبەرگەنوۆتىڭ جولى تاعى دا ءتۇيىستى. 2018 جىلى اقتاۋدا وتكەن چەمپيوناتتا ەكى بوكسشى كەزدەسىپ, ءجۇسىپوۆتىڭ مەرەيى ۇستەم بولعان ەدى. ءتىپتى سول ايقاستا شىمبەرگەنوۆ ابايسىزدا نوكداۋنعا دا ءتۇسىپ قالعان-دى. وسى جولى ەسە قايتارۋدى كوزدەگەن اسلانبەك ءبارىبىر دىتتەگەن ماقساتىنا جەتە المادى. ەكىنشى راۋندتا ءجۇسىپوۆتىڭ وقىس ارەكەتىنەن جامبىلدىق بوكسشى جاراقات الىپ, قاباعى قاناي بەرگەن سوڭ تورەشىلەر جەكپە-جەكتى توقتاتتى. جەڭىس ابىلايحاننىڭ ەنشىسىنە جازىلدى.
75 جانە 81 كيلو سالماقتاردا ۇزدىكتەر باپكەرلەر مەن جانكۇيەرلەر سەنىمىن اقتادى. 2018 جىلى جاراقاتىنا بايلانىستى ەل چەمپيوناتىنا قاتىسا الماعان ءابىلحان امانقۇل (75 كگ) بيىل بارلىق قارسىلاسىن ەش قيىندىقسىز جەڭىپ, فينالدا اتىراۋلىق نۇرقانات رايىستان باسىم ءتۇستى. ال 81 كيلوداعى تاعى ءبىر قۇرامانىڭ ۇزدىگى بەكزات نۇرداۋلەتوۆ جاستار اراسىنداعى الەم چەمپيوناتىنىڭ جۇلدەگەرى نۇربەك ورالبايدان مىقتى ەكەنىن دالەلدەدى.
91 كيلودا 2018 جىلعى چەمپيون ۆاسيلي لەۆيت جاراقاتىنا بايلانىستى بيىلعى جارىسقا قاتىسا الماي, ءبىراز جاسقا ءۇمىت سىيلادى. بۇل سالماقتىڭ فينالىندا ءبىر قالادا, ءبىر باپكەردىڭ قول استىندا جاتتىعاتىن ەكى بوكسشى – ايبەك ورالباي مەن ساعىندىق توعامباي باق سىنادى. ءبىرى – جاسوسپىرىمدەر اراسىندا وليمپيادا چەمپيونى بولسا, ەكىنشىسى – جاستار اراسىنداعى الەم چەمپيوناتىنىڭ كۇمىس جۇلدەگەرى جانە ازيانىڭ ەكى دۇركىن چەمپيونى. تەڭ جاعدايدا وتكەن جەكپە-جەكتە تورەشىلەر ايبەكتىڭ قولىن كوتەردى.
اسا اۋىر سالماقتاعى ىشكى بىرىنشىلىكتىڭ فينالى سوڭعى جىلدارى قامشىبەك قوڭقاباەۆ پەن نۇرلان ساپاربايدىڭ اراسىندا ءوتىپ كەلەدى. دەگەنمەن, ساپارباي ەكى جىلدان بەرى قوڭقاباەۆتىڭ وسال تۇسىن تابا الماۋدا. ءسويتىپ ەكى بوكسشى اراسىنداعى بيىلعى ايقاس تا قامشىبەكتىڭ جەڭىسىمەن اياقتالدى.
وسىلايشا داستۇرگە اينالعان ەل چەمپيوناتىنىڭ بيىلعى باسەكەسىندە جالپىكوماندالىق ەسەپتە 2 التىن, 2 قولا العان ماڭعىستاۋ وبلىسى كوش باستادى. ەكىنشى ورىنعا 1 التىن, 2 كۇمىس, 1 قولا يەلەنگەن نۇر-سۇلتان بوكسشىلارى ورنالاستى. ءۇشىنشى ساتىعا 1 التىن, 1 كۇمىس, 3 قولا ەنشىلەگەن جامبىل وبلىسىنىڭ كومانداسى تۇراقتادى.
ەندى جەڭىمپاز بەن جۇلدەگەرلەر قاتارىنان كورىنگەن بوكسشىلار ۇلتتىق قۇراماعا الىنىپ, جەلتوقسان ايىندا الماتىداعى «اق بۇلاق» وليمپيادالىق بازاسىندا العاشقى وقۋ-جاتتىعۋ جيىندارىن وتكىزەدى. جاڭا جىلدان باستاپ حالىقارالىق جارىستارعا قاتىسىپ, شەتەلدىكتەرمەن بىرلەسكەن وقۋ-جاتتىعۋ جيىندارىنا قاتىسپاق.
