بيىل اقپاننان بەرى ناۋقاستارعا ارنالعان توسەكتىك ورىن سانى 12 ەسەگە, رەانيماتسيالىق توسەكتىك ورىن سانى 10 ەسەگە ارتقان. وبلىستىق دەنساۋلىق ساقتاۋ باسقارماسى ماماندارىنىڭ مالىمەتىنشە, ينفەكتسيالىق بولىمشەلەردىڭ بارلىق پاتسيەنتى وكسيگەنوتەراپيامەن تولىق قامتاماسىز ەتىلگەن. بۇگىندە اۋىر ناۋقاستار ءۇشىن يممۋندىق پلازمانىڭ 3 مىڭنان استام دوزاسى دايىندالدى. وزگەنىڭ ءومىرىن قۇتقارىپ قالۋ ءۇشىن پلازما تاپسىرۋعا نيەت ءبىلدىرىپ جاتقاندار دا كوپ. ازىرلەنگەن پلازمادان 150 پاتسيەنتكە 309 دوزا قۇيىلعان ەكەن.
سونىمەن قاتار ءدارى-دارمەكتەر مەن جەكە قورعانىس قۇرالدارىنىڭ تۇراقتاندىرۋ قورى قۇرىلدى. ەمدەۋدىڭ تيىمدىلىگى ءۇشىن كوروناۆيرۋس ينفەكتسياسىنىڭ جەڭىل جانە ورتاشا اۋىرلىعى بار 6 200 ناۋقاستى وسى ءدارى-دارمەكپەن قامتاماسىز ەتۋ ەسەبىنەن فاۆيپيراۆير پرەپاراتى ساتىپ الىندى. پرەپارات 12 قاراشادان باستاپ پاتسيەنتتەردىڭ كەلىسىمىمەن وبلىس اۋرۋحانالارىندا قولدانىسقا ەنگەن. تاۋلىك بويى جانە دەمالىسسىز 15 كومپيۋتەرلىك توموگراف جۇمىس ىستەپ تۇر. 1 جەلتوقساننان باستاپ قوسىمشا 3 جاڭا كت اپپاراتى پاتسيەنتتەردى دياگنوستيكالاۋدى باستايدى.
ايتا كەتەرلىگى, اۋىل تۇرعىندارىن ۋاقتىلى مەديتسينالىق كومەكپەن قامتاماسىز ەتۋ ءۇشىن جۇمىس ىستەپ تۇرعان 6 جىلجىمالى مەديتسينالىق كەشەنگە تاعى 10 جاڭا كەشەن قوسىلدى. جوسپارعا سايكەس مەديتسينالىق جابدىقتارمەن تولىق جيناقتالعان جەدەل جاردەم كولىگىنىڭ پاركى 216 اۆتوكولىكپەن تولىعۋى ءتيىس. ونىڭ 88-ءى قازىردىڭ وزىندە جۇمىس ىستەپ تۇر, قالعان 128 كولىك 10 جەلتوقسانعا دەيىن جەتكىزىلەدى. جالپى, وڭىردەگى جەدەل جاردەم كولىكتەرىنىڭ سانى 2,5 ەسەگە كوبەيدى.
كوروناۆيرۋس جاعدايىن باقىلاۋدا ۇستاۋ ءۇشىن كۆي وشاقتارىن وقشاۋلاۋ ورتالىعى قۇرىلدى. اتالعان ورتالىق بەس تسيفرلى مودۋلدى بىرىكتىرىپ, مەدەپيدبريگادالاردىڭ جۇمىسىن ۇيلەستىرەدى. مۇنداي جۇيە ينفەكتسيانىڭ تارالۋىنا قارسى كۇرەس بويىنشا شۇعىل شارالار قابىلداۋدى جەدەلدەتۋگە, جۇقتىرعان جانە بايلانىستا بولعان ادامدار تۋرالى اقپاراتتار الۋعا, ەمدەۋ بارىسىن جانە كارانتيندىك شەكتەۋلەردىڭ ساقتالۋىن قاداعالاۋعا مۇمكىندىك بەرەدى.
شىعىس قازاقستان پتر زەرتحانالاردىڭ سانى بويىنشا جەتەكشى وبلىستاردىڭ قاتارىندا. پاندەميا باستالعالى پتر ادىسىمەن 350 مىڭنان استام ادام تەكسەرۋدەن ءوتتى. COVID-19 ۆيرۋسىن ۋاقتىلى دياگنوستيكالاۋ ءۇشىن جەرگىلىكتى بيۋدجەت ەسەبىنەن قۋاتتىلىعى تاۋلىگىنە 7 مىڭ سىناماعا دەيىن جەتەتىن قوسىمشا 7 زەرتحانا اشىلعان.
جالپى, پاندەميامەن كۇرەس كەزىندە ءوڭىردىڭ دەنساۋلىق ساقتاۋ سالاسىنا قاجەتتى جابدىقتار ساتىپ الۋعا جانە نەگىزگى قۇرالداردى جاڭارتۋعا 22 ملرد تەڭگەدەن استام قاراجات جۇمسالدى.
شىعىس قازاقستان وبلىسى
