الاشتى ارداقتاعان جازۋشىلارمەن جۇزدەسۋ

ەلىمىز تاۋەلسىزدىك العالى بەرى الاش زيالىلارى تۋرالى تاريحي-عۇمىرنامالىق زەرتتەۋ ەڭبەكتەرى مولىنان جازىلىپ, وقىرمانعا كوبىرەك جەتىپ وتىر. الايدا, وسى يگى ىستەردى ناسيحاتتاۋ جاعى كەمشىن ءتۇسىپ جاتقانى شىندىق دەسەك, استانا قالالىق ءتىل دەپارتامەنتىنىڭ تىكەلەي ۇيىم­داس­تىرۋىمەن وتكەن “ۇرانىم-الاش” اتتى ادەبي كەش وسى ولقىلىقتى تولتىرۋعا نيەت جاساعان سەكىلدى. كەشتە جارىلقاپ بەيسەن­باي ۇلى, تۇرسىن جۇرتباي جانە جولتاي ءالماش ۇلى سىندى قالام­گەرلەر وزدەرىنىڭ الاش ارداقتىلارىنا ارنالعان شىعارما­شىلىق تابىستارى جايلى اڭگىمەلەدى. قالامگەر ج.بەيسەنباي ۇلى ش.ءۋالي­حانوۆ ءومىرىنىڭ كەيبىر بىزگە بەلگىسىز تۇس­تارىن ءسوز ەتسە, فيلولوگيا عىلىمدارىنىڭ دوكتورى ت.جۇرتباي الاش كوسەمدەرى ءا.بوكەيحانوۆ, ا.بايتۇرسىنوۆ, م.شوقاي سەكىلدى ۇلت قاي­رات­كەرلەرى جايلى, ولاردىڭ تارتىستى تاعدىرى تۋرالى تولعانا سويلەدى. ال جازۋشى-دراماتۋرگ جولتاي ءالماش­ ۇلىنىڭ ماعجان اقىننىڭ اباقتىداعى سوڭعى ءتۇنىن سۋرەت­تەيتىن “اباقتى-عۇمىر” اتتى پەساسىنان ءۇزىندى كورەرمەندەر نازارى­نا ۇسىنىلدى. بۇل تاريحي دراما 2005 جىلى تۇركىستان دراما تەاترىندا ر.سەيت­مەتوۆتىڭ ساحنالاۋىمەن كورەرمەن­دەرگە جول تارتقان ەدى. سودان بەرگى ۋاقىتتا بۇل تۋىندى قازاقستاننىڭ كوپتەگەن قالالارىنا, سونداي-اق قىرعىزستان, وزبەكستان, تۇركيا ەلدەرىنە گاسترولدىك ساپارمەن بارىپ, ونداعى ونەر سۇيەر قاۋىمعا كورسەتىلگەن بولاتىن. درامادا م.جۇماباەۆ­تىڭ الاشتىڭ ارداقتى ۇلدارى, رەپرەسسيا قۇرباندارى ن.تورەقۇلوۆ, س.قوجانوۆتارمەن ءوزارا قارىم-قاتىناسى سۋرەتتەلگەن. رىسبەك اسقار ۇلى.