ايماقتار • 02 جەلتوقسان، 2020

الماتىداعى پەدياتريا ورتالىعىنىڭ دارىگەرلەرى 160 ليتر قان تاپسىردى

83 رەت كورسەتىلدى

جىلىنا بىرنەشە رەت الماتىداعى پەدياتريا جانە بالالار حيرۋرگياسى عىلىمي ورتالىعىندا «قان تاپسىرىپ، ءومىر سىيلا!» اتتى ناۋقانمەن قان تاپسىرۋ اكتسياسى وتەدى. جۋىردا وسىمەن ءۇشىنشى رەت وتكەن يگى شاراعا ورتالىق قىزمەتكەرلەرى مەن جاس دارىگەرلەر قاتىستى. جىل باسىنان بەرى  اكتسياعا  230-دان اسا دارىگەر قاتىسىپ، ناۋقاس جاندار ءۇشىن 160 ليتر قان تاپسىردى، - دەپ حابارلايدۆ Egemen.kz

پەدياتريا ورتالىعىنىڭ دارىگەرلەرى مەن قىزمەتكەرلەرى دونور رەتىندە قان تاپسىرۋدى ادەتكە اينالدىرعان. سوڭعى قايىرىمدىلىق شاراعا 80-نەن اسا ەرىكتى قاتىستى. سولاردىڭ ءبىرى، مەديتسينالىق ستاتيستيكا ءبولىمىنىڭ قىزمەتكەرى، ورتالىقتىڭ تۇراقتى دونورى – قۇرالاي سماعۇلوۆا. ەرىكتى وسىمەن 22 جىل قاتارىنان دوناتسياعا قاتىسىپ جاتىر. اكتسياعا قاتىسۋشىلاردىڭ ارقايسىسى 450 مل. قان تاپسىردى. بۇل ءىستى يگى داستۇرگە اينالدىرعان اقحالاتتىلار تالاي بالا مەن ادامداردىڭ ومىرىنە اراشا تۇسۋدە. شاراعا ۇجىم ۇيىمداسقان تۇردە ءبىر كىسىدەي اتسالىستى.

شارانىڭ تۇراقتى تۇردە ۇيىمداستىرۋشىسى، كلينيكالىق ترانسفۋزيولوگيا ءبولىمىنىڭ مەڭگەرۋشىسى قۋانىش ۇمبەتوۆتىڭ ايۋىنشا، «قان تاپسىرىپ، ءومىر سىيلا!» اكتسياسىمەن وتەتىن شارا جىلىنا ەكى رەت ۇيىمداستىرىلسا، بيىل ءۇشىنشى رەت وتكىزىلگەن.

«قان تاپسىرماس بۇرىن، دونورلار الدىمەن مەديتسينالىق ساۋالناما تولتىردى. تەك سونىڭ قورىتىندىسى بويىنشا عانا قان تاپسىرۋعا رۇقسات الدى. اق حالاتتىلار تاپسىرىلعان قان كولەمى مەن ونىڭ ءمىنسىز ساپاسىنا باسا نازار اۋدارادى. پەدياتريا جانە بالالار حيرۋرگياسى عىلىمي ورتالىعىندا قان تاپسىرۋ 2013 جىلدان باستاپ وتكىزىلىپ كەلەدى. جىلىنا 2-3 رەت قان وتكىزىپ تۇراتىن تۇراقتى دونورلارىمىز بار. سوڭعى ەكى جىل ىشىندە ءبىزدىڭ ورتالىقتىڭ قىزمەتكەرلەرى شامامەن 180 ليتردەي قان تاپسىردى.  بۇل يگى ىسكە ءبىزدىڭ ورتالىقتىڭ قىزمەتكەرلەرىمەن قوسا ورتالىقتا ەم الىپ جاتقان بالالاردىڭ اتا-انالارى دا قاتىسىپ كەلەدى. ورتالىعىمىزدان جىلىنا شامامەن 130-160 ادام قان تاپسىرادى. مەديتسينالىق تەكسەرىستەن وتكەن ادامنان ستاندارت بويىنشا 450 مل قان الىنادى. جىل سايىن دوناتسياعا قاتىسۋشى قىزمەتكەرلەر سانى ارتىپ كەلەدى. دايىن قان كومپونەنتتەرى رەسپۋبليكالىق قان ورتالىعىنان اكەلىنەدى. بىزگە قاجەتتى قان وسى ورتالىقتا ەم الىپ جاتقان ناۋقاس بالالارعا قولدانىلادى. كلينيكادا قاتەرلى دەرتكە شالدىققان، جۇرەك اقاۋلارىمەن تۋىلعان بالالار، اۋىر حيرۋرگيالىق وتالار قاجەت بولعان ناۋقاس بالالار مەن جاڭا تۋىلعان نارەستەلەر ەم الادى. وسى بالالارعا ەم الۋ بارىسىندا، اتاپ ايتقاندا وتا كەزىندە، سۇيەك كەمىگىنىڭ قاتەرلى ىسىكتەرىندە، وعان قوسا سۇيەك ميىن (كوستنىي موزگ) ترانسپلانتاتسيالاۋ كەزىندە جانە ت.ب. جاعدايلاردا  دارىگەرلەردىڭ تاعايىنداۋىمەن قان جانە ونىڭ قۇرامداس بولىكتەرى قۇيىلادى. ناۋقاستارعا قولدانىلاتىن بارلىق مەديتسينالىق قۇرىلعىلار ءبىر رەتتىك. ول بۇيىمداردىڭ بارلىعى بالالارىمىزدىڭ اتا-انالارىنىڭ كوزىنشە اشىلادى. قان قۇيۋ بارلىق مەديتسينالىق تالاپتارعا ساي جۇرگىزىلەدى»، – دەيدى ورتالىق دارىگەرى، كلينيكالىق ترانسفۋزيولوگيا ءبولىمىنىڭ مەڭگەرۋشىسى قۋانىش ۇمبەتوۆ.

ل

ونىڭ پىكىرىنشە، قان تاپسىرۋ اعزاعا پايدالى. «قان تاپسىرۋدىڭ پايداسى مەن زيانى قوعامدا كوپ تالقىلانىپ جاتادى. مەديتسينا مامانى رەتىندە قان تاپسىرۋدىڭ  نەگىزگى پايدالارىن اتاپ وتكىم كەلەدى. بىرىنشىدەن، ەڭ باستىسى – قان تاپسىرعان ءار ادام 3 ادامنىڭ ءومىرىن ساقتاپ قالۋعا تىكەلەي كومەگىن تيگىزەدى. ەكىنشىدەن،  اعزاڭىزدىڭ قان قۇرامى جاڭارادى، قان قۇرامىنىڭ جاڭارۋى تەرىگە وتە پايدالى. ۇشىنشىدەن قان تاپسىرۋ ارقىلى ادام بويىنداعى قان قىسىمىن رەتتەيدى. تورتىنشىدەن،  قان تاپسىرۋدىڭ سەمىزدىكتىڭ الدىن الۋعا ۇلەسى بار. بەسىنشىدەن، ادام ءومىرىن ۇزارتادى. سونىمەن قاتار، ءسىز قان تاپسىرا وتىرا، اعزاڭىز تۋرالى اقپاراتتى الا الاسىز. قان تاپسىرۋدىڭ اعزاعا ەش زيانى جوق. ۇلكەن ادام اعزاسىندا شامامەن 4،5-5ليتردەي قان بولادى، قان تاپسىرۋ بارىسىندا ءار ادام 450 مل. اسپايتىن قان تاپسىرادى. ول اعزا ءۇشىن ەشقانداي جاناما، زيان اسەرىن تيگىزبەيدى»، دەپ اتاپ ءوتتى قۋانىش ۇمبەتوۆ.

 ش

ايتا كەتسەك، اكتسياعا قوسىلعىسى كەلەتىن جاندار قان تاپسىرار الدىندا ىشىمدىك، شىلىمنان باس تارتىپ، مەديتسينالىق دارىلەردى قابىلداماعان ءجون. سونداي-اق دوناتسيا كۇنى جەڭىل تۇردە تاماقتانۋى قاجەت.

بالا دارىگەرلەرىنىڭ ىشىندە جۇيەلى تۇردە قان تاپسىرىپ وتىرۋدى ادەتكە اينالدىرعان بەلسەندى دونورلار دا بار. سولاردىڭ ءبىرى انەستەزيولوگ دارىگەر گۇلجاحان ابدۋللاەۆا.

– «مەن قان تاپسىرۋدى ازاماتتىق مىندەتىم دەپ بىلەمىن.  ءبىر دونور – ءبىر ءومىر. ءبىزدىڭ يگى ءىسىمىز كوپتەگەن ادامداردىڭ،  ءومىرىن قۇتقارۋعا سەپتىگىن تيگىزەدى. وسى كومەكتىڭ ارقاسىندا ءبىز بىرەۋدىڭ اناسىنىڭ، اكەسىنىڭ، بالاسى مەن باۋىرىنىڭ ءومىرىن ساقتاپ قالامىز. وسى پەدياتريا ورتالىعىنداعى بالالارعا دا كومەگى ءتيۋى مۇمكىن. ءبىز وسى ارەكەتىمىزبەن ازاماتتاردى قان تاپسىرىپ، كومەك كورسەتۋگە شاقىرامىز. قان تاپسىرىپ – ءومىر سىيلايىق!»، دەيدى گۇلجاحان ابدۋللاەۆا.

ش

«دونور» ءسوزىنىڭ  لاتىن تىلىنەن اۋدارماسى ء«ومىر سىيلاۋشى» دەگەن ماعىنانى بىلدىرەدى. كوپتەگەن ناۋقاستار ءۇشىن بۇل ەكىنشى ءومىر سەكىلدى. قازىرگى كەزدە ورتالىقتا وسىنداي جاندارعا قول ۇشىن سوزىپ جۇرگەندەردىڭ سانى 200-دەن اسادى. جىل سايىن ولاردىڭ قاتارى دا ارتىپ كەلەدى.

قايىرىمدىلىق شاراسىنا ۇدايى قاتىساتىن اق حالاتتىلار ىشىندە العاش رەت قان تاپسىرىپ، دونور اتانعان قىزمەتكەرلەر دە بار.

– «دونور قانى – ءومىر ءنارى. شىنىمەن ەلىمىزدە سان مىڭداعان ادام قانعا مۇقتاج. كەز كەلگەن وقىس جاعدايدا، نەمەسە وتا كەزىندە ءومىر ءنارى اۋاداي قاجەت. قان قۇيۋعا مۇقتاج جاندارعا كومەگىم تيسە بولعانى.  وسىندا ءوزىمنىڭ ءبىر ادامعا بولسىن سەپتىگىمدى تيگىزۋگە كەلىپ وتىرمىن»، دەيدى العاش رەت قان تاپسىرعان ورتالىق قىزمەتكەرى، تەلەمەديتسينا كورديناتورى ۇلجان المەن.

بۇگىنگى كۇنى ورتالىقتىڭ افەرەز بولىمىندە 68 ليتر قان ساقتاۋلى، بۇل دەگەنىمىز 227 دوزا. قور ۇنەمى تولىقتىرىلىپ وتىرادى، ماتەريالدىڭ سيرەك تۇرلەرىنىڭ بولۋى باقىلانادى. وسىنداي شارالاردىڭ ارقاسىندا ورتالىقتا كەز كەلگەن ۋاقىتتا اۋىر ناۋقاسقا قاجەتتى قان تابىلادى.

ەلىمىزدە جاسى 18-دەن اسقان، مەديتسينالىق كورسەتكىشى ناتيجەلى كەز كەلگەن ازامات دونور بولا الادى. ەرلەر جىلىنا 6 رەت، ايەلدەر 4 رەت قان تاپسىرۋعا مۇمكىندىكتەرى بار.

ايتا كەتەرلىك جايت، ورتالىقتا جىلدان-جىلعا ەرىكتى قان تاپسىرۋشىلار سانى ارتىپ كەلەدى.

اكتسياعا قاتىسقان ءاربىر دونور تەك قانا قان تاپسىرىپ، بىرەۋدىڭ ومىرىنە اراشا بولا قويماي، ءوزىنىڭ دەنساۋلىعى تۋرالى دا كوپ اقپارات الا الدى. اتاپ ايتقاندا، ول ءوزىنىڭ گەموگلابينىنىڭ دەڭگەيىن، ءتۇرلى ينفەكتسيالىق اۋرۋلارمەن اۋىرعان، اۋىرماعاندىعىن، سونداي-اق، قان توبىن بىلە الدى.

 

 

الماتى

سوڭعى جاڭالىقتار

ارىپتەستىك الەۋەتى جەمىس بەرۋدە

ايماقتار • بۇگىن، 19:21

قالامگەرگە قۇرمەت

رۋحانيات • بۇگىن، 18:13

الماتى «قىزىل» ايماققا كىردى

ايماقتار • بۇگىن، 16:50

اقتاۋدا بۋىنسىز بالا تۇرادى

ۆيدەو • بۇگىن، 16:04

iPhone 12 دەنساۋلىققا زيان دەپ تانىلدى

تەحنولوگيا • بۇگىن، 15:38

ۇقساس جاڭالىقتار