سپورت • 02 جەلتوقسان، 2020

وليمپيادالىق سپورت تۇرلەرى ءبىر ديرەكتسياعا بىرىكتى

93 رەت كورسەتىلدى

باس قالامىزدىڭ سپورتىندا ءبىراز جاڭاشىلدىق بار. بىرەر اي بۇرىن بۇندا قارجىلاندىرۋ باعىتى وزگەرتىلىپ، سپورتشىلار جالاقىسى ارتقان ەدى. ەندى وسى جۇمىستاردى جۇيەلەۋ ءۇشىن وليمپيدالىق جانە وليمپيدالىق ەمەس سپورت تۇرلەرى بويىنشا قوس ديرەكتسيا قۇرىلدى.

قۇرىلعاندا بۇل مەكەمەلەر بۇعان دەيىن دە بولعان. بىراق سپورت مەكتەبى رەتىندە قىزمەت ەتتى. ەندى ديرەكتسيا. اتىمەن قاتار، زاتى دا باسقاشا فورماتقا،  ياعني، ءسال جەتىلدىرىلگەن ۇلگىگە اۋىستىرىلدى. باستامانىڭ باسى-قاسىندا جۇرگەن سامات ەرعاليەۆ، بۇنىڭ بارلىعى سالاعا تىڭ سەرپىن اكەلۋ ءۇشىن جانە سپورتتاعى جەتىستىكتەردى ەسەلەۋ ءۇشىن قولعا الىنىپ جاتقانىن العا تارتادى.

ماقساتىمىز – جاتتىقتىرۋشىلارعا جانە سپورتشىلارعا بارىنشا قولداۋ جاساۋ. ەڭ الدىمەن سولارعا قولايلى بولۋ كەرەك. مىسالى، «تولاعاي» سپورت مەكتەبىنىڭ قىزمەت اياسى بۇرىن شەكتەۋلى ەدى. ەندى  سپورتتى وليمپيادالىق تۇرلەرى بويىنشا دامىتۋ ديرەكتسياسىنا اينالدى. سايكەسىنشە، جاسوسپىرىلمدەردەن ەرەسەكتەرگە دەيىنگى قالاداعى بارلىق سپورتشىلارعا جاۋاپتى. جارىس بولسىن، جاتتىعۋ جيىنى بولسىن، ءوز تاراپتارىنان جىبەرە بەرەدى جانە تۋىنداعان ماسەلەلەرگە قاتىستى دا وزدەرى شەشىم قابىلايدى  – دەدى، قالالىق دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى سامات ەرعاليەۆ.

جاڭادان قۇرىلعان ديرەكتسيالاردىڭ جۇمىس اۋقىمى مەن مۇمكىندىكتەرى كەڭەيتىلدى. ماسەلەن، وليمپيدالىق سپورتقا جاۋاپتى مەكەمەگە 60-قا جۋىق سپورت ءتۇرى مەن 2 مىڭعا جۋىق سپورتشى بەرىلدى. ونىڭ ىشىندە وليمپيادالىق جانە پاراليمپيادالىق باعىتتار بار. جالاقى الاتىن سپورتشىلار سانى دا ەسەلەپ ارتتى. بۇنىڭ بارلىعى سالاداعى تىنىس-تىرشىلىكتى جانداندىرىپ، جەرگىلىكتى قىز-جىگىتتەرگە جاعداي جاساۋعا نەگىزدەلگەن. ويتكەنى، ونىڭ ارتىندا قالانىڭ، قالا بەردى، ەلدىڭ ءيمميدجى بار. تۇپكى ماقسات  -  اتى ايتىپ تۇرعانداي ءدال وسى سپورتشىلاردان الەم جانە وليمپيادا چەمپيوندارىن شىعارۋ. سوعان مۇرىندىق بولۋ.

ءبىز سپورتشىلاردان جوعارى جەتىستىكتەر كۇتەمىز. ول ءۇشىن سوعان لايىقتى جاعداي جاساۋمىز كەرەك. سپورتشىلار دا، باپكەرلەر دە ارتىندا مىقتى قولداۋ بارىن سەزىنسە دەيمىز. ەشتەڭەگە الاڭداماي، دايىندىققا عانا دەن قويسا دەگەن ماقسات. ماسەلەن،  قاراشا ايىنان باستاپ سپورتشىلار جوعىرى جالاقى الىپ ءجۇر. بۇل - ۇلكەن موتيۆاتسيا. بۇعان قوسا، تۇراقتى ايلىق الاتىن سپورتشىلارىمىز بۇرىن 86 ەدى، قازىر – 176. ياعني، كورسەتكىش شامامەن 2 ەسە ءوستى – دەيدى، سپورتتى وليمپيادالىق تۇرلەرى بويىنشا دامىتۋ ديرەكتسياسىنىڭ باسشىسى باعدات دانياروۆ.

قازىر ديرەكتسيالاردىڭ قۇرىلۋىنا قاتىستى جۇمىستار، ونىڭ ىشىندە، قۇجاتى بار، باسقاسى بار، تولىق اياقتالدى. ەندى سالا ماماندارى بىلەك سىبانا ىسكە كىرىسەدى. ايتا كەتۋ كەرەك، ەلورداداعى باسقارما بۇنداي جاڭاشىلدىقتى العاش بولىپ قولعا الدى. وڭىرلەر اراسىندا العاش بولىپ قولعا الدى. ەگەر جاقىن بولاشاقتا ءوز ناتيجەسىن بەرىپ جاتسا، ارينە، باسقا ايماقتارعا دا ۇلگى بولارى انىق جانە سولاي بولۋىنا تىلەكتەسپىز. اينالىپ كەلگەندە، بۇل ەلدەگى كاسىپقوي، اۋەسقوي جانە بۇقارالىق سپورتتى دامىتىپ، ۇلت ساۋلىعىن قالىپتاستىرۋعا اسەر ەتەدى. اسىرەسە، سوڭعىسى قازىر ماڭىزدىلىعى جاعىنان بارىنەن جوعارى.  

سوڭعى جاڭالىقتار

سقو «قىزىل ايماققا» ەندى

ايماقتار • كەشە

ۇقساس جاڭالىقتار