ا. مامين: ءبىزدىڭ مىندەتىمىز — مۇمكىندىگى شەكتەۋلى جاندارعا قولايلى ورتا قۇرۋ

ۇكىمەت • 02 جەلتوقسان، 2020

ا. مامين: ءبىزدىڭ مىندەتىمىز — مۇمكىندىگى شەكتەۋلى جاندارعا قولايلى ورتا قۇرۋ

12 رەت كورسەتىلدى

قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا مۇمكىندىگى شەكتەۋلى جانداردى الەۋمەتتىك قورعاۋ ماسەلەلەرى قارالدى.

اقمارال اعزامقىزى

ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ، دەنساۋلىق ساقتاۋ ءمينيسترى الەكسەي تسوي، ءبىلىم جانە عىلىم ءمينيسترى اسحات ايماعامبەتوۆ، يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ، تۇركىستان وبلىسىنىڭ اكىمى ومىرزاق شوكەەۆ، سولتۇستىك قازاقستان وبلىسىنىڭ اكىمى قۇمار اقساقالوۆ، سونداي-اق «شىراق» مۇگەدەك ايەلدەر قاۋىمداستىعىنىڭ ءتورايىمى ءلاززات قالتاەۆا بايانداما جاسادى.

«مۇمكىندىگى شەكتەۋلى جانداردى الەۋمەتتىك قورعاۋ – مەملەكەت باسا كوڭىل اۋداراتىن وتە ماڭىزدى ماسەلە. ءبىزدىڭ مىندەتىمىز – مۇگەدەكتىگى بار ادامدارعا قولايلى ورتا قۇرۋ»، — دەدى ا. مامين.

«Nur Otan» پارتياسىنىڭ جاڭا باعدارلاماسىنا سايكەس الداعى 5 جىلدا جۇمىسپەن قامتىلعان مۇگەدەكتىگى بار ادامداردىڭ ۇلەسى 30%-عا ءوسۋى ءتيىس جانە دە ولار مەديتسينالىق وڭالتۋمەن 100% قامتىلادى. مۇمكىندىگى شەكتەۋلى جانداردىڭ قۇقىعىن قورعاۋ جانە تۇرمىس ساپاسىن جاقسارتۋ ءۇشىن قازاقستاندا 2025 جىلعا دەيىنگى ۇلتتىق جوسپار ىسكە اسىرىلىپ جاتىر، ول 64 كەشەندى ءىس-شارادان تۇرادى. بيىل مۇگەدەكتەردى الەۋمەتتىك قامسىزداندىرۋعا 448 ملرد تەڭگە جۇمسالدى، بۇل وتكەن جىلعىدان 12%-عا كوپ. تۇڭعىش رەت مۇگەدەكتەر اربالارىن جاسايتىن وتاندىق ءوندىرىس ىسكە قوسىلدى، بۇل اتالعان ارباعا مۇقتاج ادامداردى بەس جىل ىشىندە تولىق قامتاماسىز ەتۋگە مۇمكىندىك بەرەدى. مۇگەدەكتىگى بار ادامدارعا ۇسىنىلاتىن كاسىپتەر مەن جۇمىستار انىقتامالىعى ازىرلەنىپ جاتىر.

مۇمكىندىگى شەكتەۋلى جانداردى مەديتسينالىق وڭالتۋمەن قامتۋ ۇلەسى بيىل 60%-عا دەيىن، 2021 جىلى 75%-عا دەيىن ارتتىرىلادى. كولىك سالاسىندا ونى مۇمكىندىگى شەكتەۋلى جاندار پايدالانا الۋى ءۇشىن ەلەۋلى جۇمىس اتقارىلدى. جول ءجۇرۋ ءۇشىن جەڭىلدىكتى جاعدايلار جاسالدى. ۆوكزالداردىڭ 93%-ى مۇگەدەكتەرگە قىزمەت كورسەتۋ تالاپتارىنا سايكەس كەلەدى. بارلىق جولاۋشىلار پويىزدارى 100% مۇگەدەك اربالارىمەن جابدىقتالعان. ۇكىمەت باسشىسى جىل سوڭىنا دەيىن مۇمكىندىگى شەكتەۋلى جاندار ءۇشىن 100% كەدەرگىسىز قولجەتىمدىلىكتى قامتاماسىز ەتۋ جونىندەگى جول كارتاسىن ازىرلەۋدى تاپسىردى. اكىمدىكتەرگە مۇمكىندىكتەرى شەكتەۋلى جانداردى الەۋمەتتىك قىزمەت كورسەتۋ پورتالى ارقىلى وڭالتۋ قۇرالدارىن الۋ داعدىلارىنا وقىتۋدى جانداندىرۋ، تسيفرلىق دامۋ مينيسترلىگىمەن بىرلەسىپ، جۇمىسپەن قامتۋ ورتالىقتارى مەن حقكو-لاردا مۇگەدەك ادامدار ءۇشىن وزىنە-ءوزى قىزمەت كورسەتۋ ايماقتارىن ۇلعايتۋ تاپسىرىلدى.

دەنساۋلىق ساقتاۋ مينيسترلىگىنە اكىمدىكتەرمەن بىرلەسىپ، مۇگەدەكتىكتىڭ الدىن الۋ ءۇشىن سىرقاتتارعا دياگنوستيكانى ەرتە جۇرگىزۋگە كوڭىل بولە وتىرىپ، مۇگەدەكتەرگە وڭالتۋ كومەگىن كۇشەيتۋ، سالىنىپ جاتقان بارلىق وڭالتۋ ورتالىقتارىن ۋاقىتىلى پايدالانۋعا بەرۋدى قامتاماسىز ەتۋ تاپسىرىلدى. ۇكىمەت باسشىسى ءبىلىم مينيسترلىگىنە اكىمدىكتەرمەن بىرلەسىپ، كەلەسى جىلى بالالاردى ينكليۋزيۆتى بىلىممەن قامتۋدى 50%-عا دەيىن كەڭەيتۋدى، ءبىلىم بەرۋ باعدارلامالارىنىڭ مازمۇنىن جانە پەداگوگتاردى دايارلاۋدى وزەكتەندىرۋدى، تۇزەتۋ كابينەتتەرى جەلىسىن جانە پسيحولوگيالىق-مەديتسينالىق جانە پەداگوگيكالىق كوميسسيالاردىڭ قىزمەتىن كەڭەيتۋدى تاپسىردى. يندۋستريا مينيسترلىگىنە مەملەكەتتىك ورگاندارمەن جانە وڭىرلەردىڭ اكىمدىكتەرىمەن بىرلەسىپ، ۆوكزالداردى جاڭعىرتۋدى اياقتاۋ جانە قوعامدىق اۆتوبۋس پاركىن مۇمكىندىگى شەكتەۋلى جاندارعا قىزمەت كورسەتۋ تالاپتارىنا تولىق سايكەستەندىرۋ تاپسىرىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز