نۇر-سۇلتانداعى باسەكەدە يۋري ميحايليس شاكىرتتەرى بەس ويىنعا سوزىلعان ساتسىزدىك سەرياسىنا نۇكتە قويىپ, وزدەرى دە, جانكۇيەرلەرى دە تاعاتسىزدانا كۇتكەن العاشقى جەڭىسىنە قول جەتكىزدى. ءبىرىنشى كەزەڭنىڭ 13-مينۋتىندا «بارىس» ساپىنان كەرتيس ۆولك ەسەپتى اشىپ, كومانداسىن العا شىعاردى. ەكىنشى كەزەڭدى جوعارى كوڭىل كۇيدە باستاعان جەرلەستەرىمىز ويىن تىزگىنىن قولدارىنا الىپ, 37-مينۋتتا ەسەپتى ەسەلەي ءتۇستى. بۇل جولى ياكوب ليليا جانكۇيەرلەردىڭ قوشەمەتىنە بولەندى.
ءۇشىنشى كەزەڭدە ەسەپ ايىرماسىن قىسقارتۋعا بارىن سالعان ماسكەۋلىك كوماندا كەزەڭنىڭ اياقتالۋىنا ساناۋلى ۋاقىت قالعاندا دەگەندەرىنە جەتتى. 55-مينۋتتا يوري لەحتەريادان پاس العان سەرگەي شيروكوۆ «بارىس» قاقپاشىسى حەنريك كارلسسوندى قاپى قالدىردى. قالعان بەس مينۋتتا كوماندالار ءبىر-ءبىرىنىڭ قاقپاسىنا گول سوعا المادى. ناتيجەسىندە ەلوردا كومانداسى 2:1 ەسەبىمەن جەڭىسكە جەتتى.
تۇراقتى بىرىنشىلىكتىڭ تۋرنير كەستەسىندە «بارىس» 27 ويىننان كەيىن 27 ۇپايمەن 9-ورىندا كەلەدى. جەرلەستەرىمىز كەلەسى كەزدەسۋىن بۇگىن ءسوچيدىڭ «سوچي» كومانداسىمەن وتكىزەدى.
