اراداعى ۇلكەن ۇزىلىستەن كەيىن اتالعان قور بىلتىر ءوزىنىڭ شىعارماشىلىق قىزمەتىن قايتا باستادى. وسى ۋاقىت ىشىندە ءومىرىن ونەرمەن ۇشتاستىرىپ, قۋانىشىن قىلقالامنان تاپقان حانىمدار شىعارماشىلىق جانە ۇيىمداستىرۋشىلىق جۇمىستا جاڭا تاجىريبە جيناپ, كاسىبي ءوسۋ كەزەڭدەرىنەن ءوتتى. بۇگىنگى تاڭدا قوردا قازاقستان, وزبەكستان, تۇركىمەنستان, تاجىكستان, قىرعىزستان, اۋستريا, گەرمانيا, كانادا, اقش, تۇركيا ەلدەرىنىڭ كاسىبي كوركەمونەر سالاسىندا جوعارى بىلىمدەرى بار كەسكىندەمە, گرافيكا, ساندىك-قولدانبالى ونەر, ءمۇسىن سياقتى ءتۇرلى ونەر سالاسىندا جۇمىس ىستەيتىن, باسقا دا ەلدەردىڭ كاسىبي سۋرەتشىلەرى بار. كورمە ۇنەمى جاڭا باعىتتاردى, فورمانىڭ, پلاستيكا مەن كومپوزيتسيانىڭ مانەرلىلىگىن, ءوزىنىڭ كوركەم ءتىلىن ىزدەپ جۇرگەن تالانتتى جاس سۋرەتشىلەردىڭ شىعارماشىلىعىن كورسەتەدى.
«تاڭ-شولپان» قورىنىڭ پرەزيدەنتى سۋرەتشى ءجاميلا تاكەننىڭ پايىمىنشا, نازىك جاندى سۋرەتشىلەردىڭ شىعارماشىلىعى تەك ءوز تۇتاستىعى مەن دارالىعىن ساقتاي بىلۋمەن شەكتەلمەيدى. ءوزىن قۇرمەتتەۋگە جانە سۇيۋگە تەرەڭ ءمان بەرگىزىپ, ۇيلەسىمدى ءومىر ءسۇرۋ قابىلەتىن قۋاتتاي تۇسەدى. سونىمەن بىرگە ايەل – سۋرەتشى-شەبەر, جاسامپاز, كرەاتيۆتى ويلايتىن جانە ومىرگە وزىندىك اسەرمەن قارايتىن, بارلىق قيالدارى, ويلارى مەن تاجىريبەلەرىن ءوز شىعارماشىلىق جۇمىسىندا بەينەلەيتىنىن تۇسىنۋگە جانە مويىنداۋعا ىنتالانادى.
– بيىل الەمدە بولىپ جاتقان وقيعالار ادامداردىڭ ومىرىنە اسەر ەتتى. COVID-19 پاندەمياسىنا بايلانىستى ءبىز ومىرگە دەگەن كوزقاراسىمىزدى وزگەرتتىك, قۇندىلىقتاردى باعالاۋدى ۇيرەندىك, الەم باسقاشا كەيىپكە ەندى. ادامزات ءومىر سالتىن تۇبەگەيلى وزگەرتتى, ءبىز دامۋدىڭ جاڭا كەزەڭىن باستان وتكەرىپ جاتىرمىز جانە بۇرىنعىداي ءومىر ءسۇرۋ مۇمكىن ەمەس. تۇيىق كەڭىستىكتە بولۋدى ۇيرەندىك, ونلاين وقىتۋ, لوكداۋن جانە تاعى باسقالاردىڭ نە ەكەنىن بىلدىك. ءبىز وزگەردىك. ءبىز ادەتتەگىدەن ادەمى كورۋدى جانە باعالاۋدى ۇيرەندىك. ءومىرىمىز بەن شىعارماشىلىعىمىز جالعاسۋدا. سۋرەتشى ايەلدەر ءومىرىنىڭ, وقيعالاردىڭ, بۇكىل ىشكى الەمىنىڭ وزگەرۋى – وسىنىڭ ءبارى اتالعان كورمەگە قاتىسۋشىلاردىڭ شىعارماشىلىعىندا بار, – دەيدى ءجاميلا تاكەن.
ارمانشىل حانىمداردىڭ قيالىنا قانات بىتىرگەن ونلاين-كورمەگە 100-گە جۋىق ۇزدىك كەسكىندەمە جانە گرافيكالىق جۇمىس, ساندىك-قولدانبالى ونەر تۋىندىسى قويىلعان. ولاردىڭ قاتارىندا الەم جانە قازاقستان بەينەلەۋ ونەرىنە ءوز سوقپاعىن سالۋعا تالپىنعان ساۋلە باپانوۆا, ءاسيا حايرۋللينا, راۋشان بازارباەۆا, ءجاميلا تاكەن, گۇلجامال تاعەنوۆا, گۇلجانات قابيجانوۆا, ديلوروم مامەدوۆا (وزبەكستان), روزا جانعاراچەۆا (قىرعىزستان), گالينا شۆايگەر (گەرمانيا), مارليس لەپيچنيك (اۆستريا), ايگەرىم روناحەر (اۆستريا), لەيلا احمەت-وسمان (اقش) سىندى دارىندى سۋرەتشىلەر بار.
