بىرىككەن ۇلتتار ۇيىمىنىڭ باس اسسامبلەياسى 2013-2022 جىلدار ارالىعىن مادەنيەتتەردى جاقىنداستىرۋدىڭ حالىقارالىق ونجىلدىعى دەپ جاريالاعانى امبەگە ايان. ءومىر ءسۇرۋ سالتى ءبىر-بىرىمەن مۇلدە قابىسپايتىن ءتۇرلى حالىقتاردى مادەنيەتتەر توعىسى ارقىلى بىرىكتىرۋدى كوزدەگەن جوبا وزىق ءبىلىم مەن بىلىكتى ادامزات يگىلىگىنە باعىتتاۋدى ماقسات تۇتتى. بيىل يۋنەسكو قولداۋىمەن حالىقارالىق دەڭگەيدە اتالىپ وتكەن ءال-فارابي مەن اباي مەرەيتويلارى وسىعان دالەل. ويشىلداردىڭ وركەنيەتتىڭ دامۋىنا قوسقان زور ۇلەسىن حالىقارالىق قاۋىمداستىق جوعارى باعالاپ, ابايدىڭ كەمەل ويلارىن الەمنىڭ كوپتەگەن عالىمدارى ادامشا ءومىر ءسۇرۋدىڭ ۇلگى-ونەگەسى رەتىندە تانىدى.
وسى يگى باستامالاردىڭ جالعاسى رەتىندە ەۋرازيالىق ۋنيۆەرسيتەتتەر جەلىسىن قۇرۋ ماقساتى ەرەكشە وزەكتىلىككە يە بولىپ وتىر. حالىقارالىق مادەنيەتتەردى جاقىنداستىرۋ ورتالىعىنىڭ ديرەكتورى, ايتۋلى اقىن ولجاس سۇلەيمەنوۆتىڭ يدەياسىنان تۋىنداعان باستاما جەتەكشى ءبىلىم وشاقتارىن ورتاق مەجە بيىگىنە بىرلەسە جەتۋگە جۇمىلدىرماق.
– ادامزات بالاسىنىڭ الدىنان كۇن سايىن شەشىمى كۇردەلى ماسەلەلەر كولدەنەڭدەپ شىعىپ جاتىر. بۇدان مۇقالماي ءوتۋ ءۇشىن رۋحاني بىرلىك كەرەك. ءبىلىم – ادامدى شىرقاۋ بيىككە كوتەرەتىن ۇلى كۇش. الەم جاستارى ادامي اسىل-قاسيەتتەردىڭ ءنارىن مادەنيەتتەر بايلانىسى ارقىلى سىڭىرەدى. ولاردى ىزگىلىككە بەيىلدەندىرۋ, ءبىر-ءبىرىن قۇرمەتتەۋگە ۇيرەتۋ ءۇشىن ورتاق الاڭ كەرەك. ءبىزدىڭ نەگىزگە الىپ وتىرعان ماقساتىمىز دا وسى, – دەيدى ولجاس سۇلەيمەنوۆ.
ولجاس ومار ۇلى تىلگە تيەك ەتكەندەي, ءاربىر مەملەكەتتىڭ كەلەشەگى سانالاتىن ستۋدەنت جاستاردىڭ بويىنا ادامزاتتىڭ تۇراقتى دامۋىنا باستايتىن قايرات قۇيىپ, ءبىلىم مادەنيەتىن قالىپتاستىرۋدىڭ ماڭىزى زور. ۋنيۆەرسيتەتتەردىڭ بىرلەسە جۇمىس ىستەۋى ادامزات وركەنيەتىنىڭ ورلەۋىنە ۇلەس قوساتىن ەتيكالىق جانە ازاماتتىق كوزقاراسى جوعارى ۇرپاق قالىپتاستىرادى دەگەن شەتەلدىك عالىمدار دا, اتالعان ۇسىنىستى ءبىراۋىزدان ماقۇلدادى.
ورتالىعى الماتىدا ورنالاسقان عىلىم مەن ءبىلىمدى دامىتۋ ينستيتۋتى جالپىادامزاتتىق قۇندىلىقتار مەن مادەني سان الۋاندىقتى نىعايتىپ, ورتاق ديالوگ ورناتۋعا جانە پلانەتارلىق سانانى تاربيەلەۋگە جاڭا سەرپىن بەرمەك. وسىعان بايلانىستى ونلاين جۇزدەسۋگە قاتىسۋشىلار ەۋرازيالىق ۋنيۆەرسيتەتتەر جەلىسىن ادامزاتتىق دەڭگەيدەگى گۋمانيستەر ءال-فارابي جانە اباي اتىمەن اتاۋدى قولدادى.
كەلەلى كەڭەستە قازۇۋ رەكتورى عالىمقايىر مۇتانوۆ, يۋنەسكو-نىڭ «اۆيتسەننا» كامپۋستارىنىڭ ۆيرتۋالدى جەلىسىنىڭ ۇيلەستىرۋشىسى موحامەد توحار ميلوۋدي, ممۋ جانىنداعى ازيا جانە افريكا ەلدەرى ينستيتۋتىنىڭ ديرەكتورى يگور ابۋلگازيەۆ, قازۇپۋ پرورەكتورى اقتولقىن تۇرلىحانقىزى, قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەباەۆ, س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ رەكتورى تالعات نۇرعوجين جانە تاعى باسقا وتاندىق جانە شەتەلدىك جوعارى وقۋ ورىندارىنىڭ باسشىلارى ءسوز سويلەدى.
ولجاس سۇلەيمەنوۆ جەتەكشىلىك ەتەتىن الماتىداعى مادەنيەتتەردى جاقىنداستىرۋ ورتالىعى مۋزەي قۇندىلىقتارى مەن تاريحي-مادەني مۇرانى انىقتاۋ, تولىقتىرۋ, زەرتتەۋ جانە ناسيحاتتاۋ جۇمىستارىمەن اينالىسادى. جاڭا قۇرىلعان ء«ال-فارابي – اباي» ۋنيۆەرسيتەتتەر جەلىسى» بۇل باعىتتاعى جۇمىستاردى جانداندىرىپ, ءتول مادەنيەتىمىزدى الەمگە تانىتۋعا ۇلەس قوسادى دەگەن سەنىمدەمىز.
