كيەلى تۇركىستاننان تاسىن تۇرتسە تاريحى سويلەيتىن تاراز قالاسىنا ات باسىن بۇرعان ەكسپەديتسيا توبى XI-XII عاسىرلارداعى ساۋلەت ونەرى ەسكەرتكىشتەرىنىڭ جاۋھارى, اڭىزدارعا سۇيەنسەك قوجا احمەت ءياساۋيدىڭ جانازاسىن وقىعان قاسيەتتى قارابۋرانىڭ ۇرپاعى ايشا ءبيبى جانە ونىڭ سەنىمدى سەرىگى بابادجا حاتۋن كەسەنەلەرىنە بارىپ, تاريحىمەن تانىستى.
ساپار بارىسىندا عالىمدار مەن زەرتتەۋشىلەردىڭ نازارىن وزىنە اۋدارعان سىرى مەن جۇمباعى كوپ اقىرتاس ساراي كەشەنىن ارالاعان ەكسپەديتسيا مۇشەلەرى تاجىريبە الماسۋ ماقساتىندا «ەجەلگى تاراز ەسكەرتكىشتەرى» مەملەكەتتىك تاريحي-مادەني قورىق-مۋزەيىندە اتقارىلىپ جاتقان جۇمىستارمەن تانىسىپ, ماماندارمەن پىكىر الماستى.
وسى ورايدا, ۇجىم قىزمەتكەرلەرى جامبىل وبلىسى اۋماعىندا ارنايى كەزدەسۋلەر ۇيىمداستىرىپ, «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ جامبىل وبلىسىنا باعىتتالعان ساپارىنىڭ ماقساتى مەن قورىق-مۋزەيدىڭ رۋحاني جاڭعىرۋ جولىنداعى تاريحي ىزدەنىستەرى مەن اتقارعان جۇمىستارى جايلى مالىمدەدى.
جيىن اياسىندا «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ديرەكتورى ن.احمەتجانوۆ پەن «ەجەلگى تاراز ەسكەرتكىشتەرى» تاريحي-مادەني قورىق-مۋزەيىنىڭ ديرەكتورى ن.بىقىباەۆ ۇجىمارالىق بايلانىستى نىعايتۋ, تاجىريبە الماسۋدى جانداندىرۋ تۋرالى بىرقاتار ماسەلەلەردى بىرلەسىپ شەشۋگە ۋاعدالاستى.
جوعارىداعى ساپار «كونە تاراز» قالاشىعى مەن ەجەلگى تاراز قالاسىنىڭ باتىس اۋماعىندا ورنالاسقان ءدىني مەموريالدىق كەشەندەر – ورتاعاسىرلىق قاراحان جانە داۋىتبەك كەسەنەلەرى جايلى تاريحي دەرەكتەرمەن تانىسۋعا ۇلاستى.
«ايتا كەتسەك, تۇركى الەمىنىڭ تۇلعاسى قوجا احمەت ءياساۋيدىڭ تاريحىن تۇگەندەۋ, بالالىق شاعىنان باستاپ شاكىرتتەرى مەن زامانداستارىنا دەيىنگى تولىققاندى مالىمەتتەردى توپتاستىرۋ, تىڭ دەرەكتەر ىزدەۋ ماقساتىندا ۇيىمداستىرىلعان ەكسپەديتسيا الداعى ۋاقىتتا ءياساۋيدىڭ ۇستازدارى مەن قازاقستانداعى جانە 100-گە جۋىق ەلگە تارالعان شاكىرتتەرى جايلى زەرتتەۋ جۇمىستارى ءارى قاراي جالعاسىن تابادى» دەيدى «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ءباسپاسوز قىزمەتى.
سۋرەتتەردە: ايشا ءبيبى كەسەنەسى مەن اقىرتاس قۇرىلىس كەشەنى
