ەلورداداعى ۇلتتىق اكادەميالىق كىتاپحانادا وتكەن «كىتاپحاناداعى پوەزيا ءتۇنى» الەۋمەتتىك-مادەني اكتسياسىنىڭ «جاۋھار جىر پلانەتاسىنا تۇنگى ساياحات» اتتى ءىس-شاراسى «كىتاپحانا شاقىرادى, پوەزيا شاقىرادى» اتتى لازەرلىك شوۋدان باستالدى.
ەلورداداعى ۇلتتىق اكادەميالىق كىتاپحانادا وتكەن «كىتاپحاناداعى پوەزيا ءتۇنى» الەۋمەتتىك-مادەني اكتسياسىنىڭ «جاۋھار جىر پلانەتاسىنا تۇنگى ساياحات» اتتى ءىس-شاراسى «كىتاپحانا شاقىرادى, پوەزيا شاقىرادى» اتتى لازەرلىك شوۋدان باستالدى.
كىتاپ وقۋدى ناسيحاتتاۋ, ادامگەرشىلىك تاربيە مەن رۋحاني بايلىق, الەمدى تانۋ مەن بىلىمگە جەتەلەيتىن ورتا – كىتاپحاناعا كەلۋدى قوعامنىڭ رۋحاني داستۇرىنە اينالدىرۋدى ماقسات ەتكەن باسقوسۋعا ەلوردانىڭ شىعارماشىلىق جانە زيالى قاۋىم, ۇلتتىق ەتنومادەني بىرلەستىكتەردىڭ وكىلدەرى, سونىمەن قاتار, جاس اقىندار, وقىتۋشىلار, كىتاپحاناشىلار مەن ستۋدەنتتەر قاتىستى.
شارا بارىسىندا مادەنيەت جانە اقپارات مينيسترلىگى مادەنيەت كوميتەتى تاريحي-مادەني مۇرالار باسقارماسىنىڭ باسشىسى بازارباي التاەۆ ءوتىپ جاتقان يگىلىكتى ءىستىڭ ءمان-ماعىناسىنا توقتالىپ, كىتاپحاناعا گەرمانيادا شىققان كورمە كاتالوگى كىتابىنىڭ ەكى تومدىعىن تابىس ەتسە, بۇل سياپاتتى قابىل العان ۇلتتىق اكادەميالىق كىتاپحانانىڭ باس ديرەكتورى, جازۋشى الىبەك اسقار مۇنداي ءبىر مەزگىلدە بىرنەشە ءىس-شارانى قاتار قامتىعان باسقوسۋدىڭ استانادا تۇڭعىش رەت وتكىزىلىپ وتىرعانىن ايتىپ, جينالعان كوپشىلىككە ريزاشىلىعىن ءبىلدىردى.
بيىلعى جىل «ءبىر ەل – ءبىر كىتاپ» اكتسياسى اياسىندا فاريزا وڭعارسىنوۆانىڭ تۋىندىلارىن قامتىعاندىقتان كىتاپحاناداعى پوەزيا ءتۇنىنىڭ جىر ءبولىمى اقىن شىعارماشىلىعىنا ارنالدى. «شاڭىراق» ەتنوگرافيالىق زالىندا فاريزا وڭعارسىنوۆانىڭ تۋعان جەرى «ماناش» اۋىلى ورنىقسا, «مۋزىكالىق مەيمانجايدا» «جۇرەكتەرگە ءبىر جىلۋ اكەلەيىن...» اتتى جىر كەشى ءوتتى. كەش كۇي اتاسى قۇرمانعازىنىڭ «اداي» كۇيىمەن اشىلىپ, اقىندار مارجان ەرشۋ, قۇرالاي جۇماقانوۆا مەن گۇلسارا شالقار اقىن اپالارىنىڭ ولەڭدەرىن وقىپ, ءانشى كلارا تولەنباەۆا فاريزا وڭعارسىنوۆانىڭ سوزىنە جازىلعان تابىلدى دوسىموۆتىڭ «قىز مۇڭى» ءانىن توگىلتە شىرقادى. فيلولوگيا عىلىمدارىنىڭ دوكتورى جانات اسكەربەكقىزى اقىن اپاسىنىڭ ولەڭ سيقىرىنىڭ سىرلى الەمىن بايانداپ, «كالەيدوسكوپ» اتتى فاريزا وڭعارسىنوۆا تۋرالى ولەڭدەر جيناعىنىڭ قۇراستىرۋشىسى, اقىن ۆلاديمير پەتروۆ ارناۋ ولەڭىن وقىپ, جاس اقىندار ولگا پوسوحوۆا مەن قىمبات بۇحارباەۆا اپالارىنىڭ ولەڭدەرىن ورىس تىلىندە وقىدى. اقىن اپامىزدىڭ ليريكاسىنا ارنالىپ «تارتىنباي سويلەر اسىلمىن...» ادەبي سايىسى مەن «قىرمىزى بوياۋلار سويلەسىن...» تاقىرىبىندا جاس سۋرەتشىلەر اللەياسى جاساقتالىپ, «كوگىلدىر» زالدا «اقبەرەننىڭ اقىندىق الەمى» اتتى «دارىن» جانە «سەرپەر» جاستار سىيلىعىنىڭ يەگەرى اقبەرەن ەلگەزەكپەن سۇحبات كەشى بولىپ ءوتتى. سونداي-اق, جينالعان كوپشىلىك وسىنداعى كىتاپحانا قورىنان الىنعان ەڭ ۇلكەن, ەڭ كىشكەنتاي, ەڭ سيرەك جانە ەڭ جاڭا كىتاپ كورمەسىن, «مەنىڭ قولتاڭبام» اتتى مۇمكىندىگى شەكتەۋلى وقىرمانداردىڭ وزدەرى قولدان جاساعان بۇيىمداردىڭ كورمەسىن, «دومبىرا party» كەشى مەن «ادەبي كاراوكە» مۋزىكالىق شەرۋىن تاماشالاپ, «East-West» كۆارتالىندا ءۇندىستان, فرانتسيا مەن كورەيا ەلدەرىنىڭ سالت-داستۇرلەرى مەن مادەنيەتى تۋرالى كەڭ ماعلۇماتتار الا ءبىلدى. ال «كوركەم ادەبيەت ابونومەنتى» زالىندا ءارتۇرلى جاستاعى وقىرماندار قاتىساتىن «ادەبيەت الەمى» اتتى جۇزدەسۋدە ەڭ كوپ وقيتىن وقىرماندى ماراپاتتاۋ ءراسىمى بولىپ, سايتتاردا ىزدەۋ جۇيەسىندە بەرىلگەن رەسۋرستاردى جىلدام تاپقان ەڭ تاپقىر وقىرماندارعا جۇلدەلەر تابىس ەتىلدى.
بەرىك سادىر,
«ەگەمەن قازاقستان».
