اقتوبەدە بۇلدىرشىندەرگە جاساپ وتىرعان جاعدايى جانتۇرشىكتىرەتىن جەكەمەنشىك بالا باقشاسى تابىلدى. ءبىر ايتارلىعى, اتالمىش باقشاسىماق بۇدان ەكى اي بۇرىن سوتتىڭ شەشىمىمەن جابىلعان ەكەن.
اقتوبەدە بۇلدىرشىندەرگە جاساپ وتىرعان جاعدايى جانتۇرشىكتىرەتىن جەكەمەنشىك بالا باقشاسى تابىلدى. ءبىر ايتارلىعى, اتالمىش باقشاسىماق بۇدان ەكى اي بۇرىن سوتتىڭ شەشىمىمەن جابىلعان ەكەن.
بىراق ونىڭ اقشاعا قۇنىققان يەلەرى توبەدەي سوتتىڭ تورەلىگىنە قۇلاق اسپاي, جۇمىسىن جاسىرىن تۇردە جالعاستىرا بەرگەن. بالكىم, اشىقتان-اشىق جۇمىس جاساعان دا شىعار. سەبەبى, مۇندا جۇرت بالالارىن جەردىڭ استىمەن جەتەلەپ نەمەسە ءتۇن قاراڭعىسىن جامىلىپ جەتكىزبەيدى عوي.
ال بۇل جولعى دۇرلىگىس وسىندا استىرتىن ۇيىمنىڭ مۇشەلەرى سياقتانىپ كەلىپ جۇرگەن بالاقايلاردىڭ باستارى بيتتەپ كەتكەنىنەن كەيىن كوتەرىلگەن. بۇدان شوشىنعان اتا-انا بىردەن «sos» دابىلىن قاعىپ, سانيتارلىق-ەپيدەميولوگيا قىزمەتكەرلەرىن شاقىرعان. الايدا, بۇلدىرشىندەردىڭ قالاي بيتتەپ ءجۇرگەنىن ازىرگە ەشكىم ءتۇسىندىرىپ بەرە الار ەمەس.
سانيتار ماماندار بالاباقشانىڭ جاسىرىن جۇمىس ىستەپ جاتقانىن وبلىستىق اۋرۋحاناداعى ارىپتەستەرىنەن ەستىپتى. سەبەبى, ەمدەۋ مەكەمەسىنە سول بالاباقشاعا بارىپ جۇرگەن ءبىر ءبۇلدىرشىن جۇقپالى دەرتپەن ءتۇسىپتى. دەرەۋ تەكسەرۋگە كىرىسكەن ولار بيتتەن وزگە, بالالارعا بەرىلەتىن تاماقتان دا قاۋىپتى تاياقشا تاپقان.
«بۇل بالاباقشانىڭ تاعامدارىنان ادام اعزاسىنا قاۋىپتى ستافيلاكوكك تاياقشاسى تابىلعاننان كەيىن ءىسى سوتقا جىبەرىلىپ, وسىعان بايلانىستى ونىڭ جۇمىسىن توقتاتۋ تۋرالى شەشىم شىققان», – دەيدى وبلىستىق سانيتارلىق-ەپيدەميولوگيالىق قاداعالاۋ دەپارتامەنتىنىڭ باس مامانى گۇلشات قۇربانعاليەۆا.
جالپى, ءبىر جىلدىڭ ىشىندە اقتوبە قالاسىندا وسىلايشا جاسىرىن جۇمىس جاساپ جاتقان 22 بالاباقشا انىقتالعان. ولاردىڭ ەكپىنىن باسۋعا قالانىڭ مەكتەپكە دەيىنگى مەكەمەلەرى قاۋقارسىز. باستى قيىندىق, قازىر بالاباقشا اشۋ ءۇشىن ليتسەنزيانىڭ تالاپ ەتىلمەۋى. دەمەك, بۇل تاراپتا اركىم ويىنا كەلگەنىن ىستەي الادى دەگەن ءسوز. سوندىقتان شەنەۋنىكتەر زاڭعا وزگەرىس ەنگىزۋ كەرەكتىگىن ايتىپ وتىر.
مۇرات ايتقوجا.
