قازاقستان رەسپۋبليكاسىنىڭ تۇڭعىش پرەزيدەنتى, «نۇر وتان» پارتياسىنىڭ توراعاسى نۇرسۇلتان نازارباەۆ – ءۇشىنشى مىڭجىلدىقتا جاڭا قارقىنمەن العا باسقان مەملەكەتىمىزدى, قوعامىمىزدى ءبىر شاڭىراق استىنا توپتاستىرۋشى باستى تۇلعا. الەمدە ورىن الىپ جاتقان ءارتۇرلى جاھاندىق قاۋىپ-قاتەرلەردەن ءبىزدىڭ قازاقستان ەلباسىنىڭ ۇستانعان سىندارلى ساياساتىنىڭ ارقاسىندا امان-ەسەن ءوتىپ كەلەدى.
قازاقستان رەسپۋبليكاسىنىڭ تۇڭعىش پرەزيدەنتى, «نۇر وتان» پارتياسىنىڭ توراعاسى نۇرسۇلتان نازارباەۆ – ءۇشىنشى مىڭجىلدىقتا جاڭا قارقىنمەن العا باسقان مەملەكەتىمىزدى, قوعامىمىزدى ءبىر شاڭىراق استىنا توپتاستىرۋشى باستى تۇلعا. الەمدە ورىن الىپ جاتقان ءارتۇرلى جاھاندىق قاۋىپ-قاتەرلەردەن ءبىزدىڭ قازاقستان ەلباسىنىڭ ۇستانعان سىندارلى ساياساتىنىڭ ارقاسىندا امان-ەسەن ءوتىپ كەلەدى.
«نۇر وتان» پارتياسى كوشباسشى پارتيا رەتىندە مەملەكەتىمىزدىڭ دامۋ جولىندا قازاقستان پرەزيدەنتىنىڭ ستراتەگيالىق باستامالارىنىڭ نەگىزگى تىرەگىنە اينالدى. ءبىزدىڭ پارتيالاستار ەل الدىنداعى جاۋاپتى قىزمەتتەرىن ابىرويمەن اتقارىپ, قوعامنىڭ بۇكىل تىنىس-تىرشىلىگىندە بەلسەندىلىك تانىتۋدا.
«قازاقستان-2050» ستراتەگياسىن ىسكە اسىرۋدا «نۇر وتان» پارتياسىنىڭ ءرولى ايرىقشا. وسى ورايدا, ءبىزدىڭ پارتيا اۋقىمدى رەفورمالاردى جۇزەگە اسىرۋ ءۇشىن كەلەشەكتەگى باعىت-باعدارىن, اتقاراتىن مىندەتتەرىن ايقىنداپ وتىر. ەلباسىنىڭ ستراتەگيالىق باستاماسىن ىسكە اسىرۋ جولىندا جاڭا ساياسي دوكترينا قابىلداندى. وسى ۋاقىتقا دەيىن قازاقستاندا اۋقىمدى ساياسي دوكترينا ۇسىنعان ساياسي پارتيا بولعان ەمەس. مۇنداي دوكترينا تاريحتا بولماعان, ءبىرىنشى رەت قابىلدانىپ وتىر.
جالپى, وسى دوكترينانىڭ باستى ماقساتى مەن نەگىزگى ميسسياسى قانداي دەسەك, ول وسى قۇجاتتا «نۇر وتان» پارتياسىنىڭ جاڭا ساياسي يدەولوگيالىق باعىت-باعدارى كورىنىس تاپقانىن ايتار ەدىم. وسىعان بايلانىستى, پارتيا ءتوراعاسىنىڭ باستاماسىمەن ءازىرلەنگەن دوكترينادا اتاپ كورسەتىلگەن ءبىزدىڭ ەڭ باستى, نەگىزگى بايلىعىمىز ول – تاۋەلسىزدىگىمىز! وسى تاۋەلسىزدىكتى ءارى قاراي قورعاۋ, مەملەكەتتى جاڭا سيپاتتا دامىتۋ – ەلدىك مۇددەمىز!
«نۇر وتان» پارتياسىنىڭ XV سەزىندە ەلباسى 2050 ستراتەگياسىن جۇزەگە اسىرا وتىرىپ, ءبىزدىڭ ەلىمىز تۇبەگەيلى جاقسارۋعا ءتيىس ەكەنىن, ول وزگەرىستەر ءبارىن دە قامتيتىنىن ايتتى. «وسىنداي اسا اۋقىمدى جۇمىستىڭ باسىندا دا «نۇر وتان» پارتياسى تۇرۋعا ءتيىس! بۇل سەزدىڭ ءتۇيىندى مىندەتى – ءXحى عاسىردىڭ ورتا شەنىندەگى ءبىزدىڭ بارشا ۇلى ماقساتتارىمىزعا قول جەتكىزۋدەگى «نۇر وتان» پارتياسىنىڭ الار ورنى مەن ساياسي ماڭىزىن ايقىنداۋ», دەدى ەل پرەزيدەنتى.
پارتيا سەزىندە قابىلدانعان بۇل ماڭىزدى قۇجات تاۋەلسىز ەلىمىزدىڭ دامۋ جولىنا, وركەندەگەن, باسەكەگە قابىلەتتى جانە الەۋمەتتىك تۇرعىدان باعدارلانعان مەملەكەت بولىپ نىعايا تۇسۋىنە ەرەكشە ۇلەس قوسادى دەپ ەسەپتەيمىن. اسىرەسە, ادىلەتتى قوعام قۇرۋ قاعيداتتارىن ىسكە اسىرۋعا ۇمتىلۋ جولىنداعى باستى ماقساتتار مەن قۇندىلىقتارىمىز كورىنىس تاپقان مىندەتتەردى شەشۋدە وڭ ىقپال ەتەدى دەگەن سەنىمدەمىن. بولاشاقتا پارتيانىڭ باعدارلامالارى, ناقتى جۇمىس جوسپارلارى وسى دوكترينانىڭ نەگىزىندە جاسالادى دەپ ويلايمىن.
جاڭا دوكترينا – ىرگەلى قۇجات, وندا تەك قانا «نۇر وتان» پارتياسىنىڭ عانا ەمەس, بۇكىل ەل دامۋىنىڭ نەگىزگى ماقساتتارى مەن مىندەتتەرى, قول جەتكىزەتىن جەتىستىكتەرى مەن تابىستارى قامتىلعان. بۇل قۇجات ازاماتتارىمىزدىڭ ابىرويى مەن ەركىندىگىن, ەلدىڭ بىرلىگى مەن ىنتىماعىن, زاڭنىڭ ءادىل ورىندالۋىن, حالقىمىزدىڭ مادەنيەتى مەن ىزگى سالت-داستۇرلەرىنىڭ ساقتالۋىن, وتباسى قۇندىلىقتارىنىڭ قورعالۋىن قامتاماسىز ەتۋدى كوزدەيدى. اتاپ ايتار بولساق, دوكترينادا ايقىندالعان ماقساتتار مىنالار:
– ەلدىڭ ەكونوميكالىق ءوسىپ-ءوركەندەۋىنە باعىت الۋ;
– تۇراقتى الەۋمەتتىك كەپىلدىكتەر;
– باسەكەگە قابىلەتتى جانە الەۋمەتتىك باعىتتالعان مەملەكەت ورناتۋ.
دوكترينانىڭ اتاۋى «نۇر وتان. نۇرلى بولاشاق جولىندا» دەپ اتالادى. «نۇرلى بولاشاق جولىندا» دەگەنىمىز – ادام كاپيتالى نەگىزگى رولگە يە بولاتىن الەۋمەتتىك يگىلىكتەردى الۋ ءۇشىن بولاشاقتا باسىمدىقتار مەن ادىلەتتىلىكتى كوزدەيتىن دامۋ سالاسى. ونىڭ جيناقتالۋى ادامنىڭ ءوزىن دە, قوعامنىڭ قۇرىلىمدارىن دا وزگەرىستەرگە بەيىمدەي وتىرىپ, تۇپتەپ كەلگەندە, الەۋمەتتىك ساياساتتى جان-جاقتى جاڭعىرتۋ ءۇشىن سەنىمدى تۇعىردى قالىپتاستىراتىن بولادى. ءبىزدىڭ پارتيا بىرلىككە, ىسكەرلىككە, جايلى ءومىر سۇرۋگە شاقىرادى.
قازىر «بىرەۋ ماعان ءبارىن جاساپ بەرەدى» دەگەن ۇعىمنان ارىلاتىن كەز كەلدى. نەمەسە ۇكىمەتكە الاقان جاياتىن ۋاقىت تا كەلمەسكە كەتتى. بۇگىنگى نارىق زامانىندا ەشكىم باسقا بىرەۋدىڭ جۇمىسىن ىستەپ بەرمەيدى. اركىم ءوز تىرلىگىن جاساي بىلگەنى ءجون. اۋىلدىق نە قالالىق جەردە تۇرسا دا, ەڭبەكتىڭ كوزىن تابۋى كەرەك. سوندا عانا بىزدە ىلگەرىلەۋ ۇدەرىستەر جۇزەگە اسادى. «ىزدەگەن جەتەر – مۇراتقا» دەگەن حالقىمىز.
وتانعا دەگەن پاتريوتتىق سەزىم, ۇلتتىق قۇندىلىقتاردى قۇرمەتتەۋ قاسيەتتەرى ادامعا ءتالىم-ءتاربيەمەن بەرىلەدى. ءبىزدىڭ ءاربىر ازاماتىمىزدىڭ جۇرەگىندە مەنىڭ مەملەكەتىم, ەلىمنىڭ جەتىستىكتەرى, مەنىڭ حالقىمنىڭ مادەنيەتى مەن ونەرى جانە ادەت-عۇرىپتارى – باستى بايلىعىمىز دەگەن ۇعىم بولۋى كەرەك. تاۋەلسىزدىكتى قۇرمەتتەۋدىڭ ءبارى وتاندى سۇيۋدەن باستالادى. اتا-انا بالاسىنا قالاي تاربيە بەرسە, ول ازاماتتىڭ ءومىر جولى سول باعىتتا قالىپتاسادى. ادامنىڭ ەڭ ۇلكەن پارىزى ءوز بالالارىنا دۇرىس تاربيە بەرۋى كەرەك ەكەنى قۇراندا دا جازىلعان. ەلباسى ءوز سوزىندە جاستارعا پاتريوتتىق تاربيە بەرۋ, ءوز وتانىن سۇيەتىن ازاماتتاردى ءتاربيەلەپ شىعارۋ ماسەلەسىن ءجيى كوتەرەدى. ادامگەرشىلىك قاسيەتتەر, سالاماتتى ءومىر سالتىن ۇستانۋ, ءوز ءىسىنىڭ ناقتى مامانى بولۋعا بەيىمدەلۋ – ءبارى دە بەرىلگەن تاربيەمەن تىعىز بايلانىستى.
وتباسىنىڭ قوعامداعى ءرولى «نۇر وتان» پارتياسىنىڭ دوكتريناسىندا ەرەكشە ايتىلعان. وسى دوكترينادا: «وتباسى – ءبىزدىڭ قوعامىمىزدىڭ قۇندىلىقتارىن ساقتاۋدىڭ اسا ماڭىزدى ينستيتۋتى. ۇرپاقتار ساباقتاستىعى, جاسى ۇلكەندەرگە قۇرمەت كورسەتۋ, بالالارعا قامقور بولۋ, ءوزارا قولداۋ ءداستۇرى, ەڭبەكسۇيگىشتىك پەن بىلىمگە قۇشتارلىق ءدال وتباسىندا قالىپتاسادى. وتباسىن نىعايتۋ مەن داستۇرلەردى ساقتاۋ – مەملەكەتتىلىگىمىزدى دامىتۋدىڭ كەپىلى. سوندىقتان دا ءبىز وتباسىنىڭ مەرەيىن بارىنشا ۇستەم ەتە بەرۋىمىز كەرەك», دەپ اتاپ وتىلگەن. ەلباسى ۇستانعان باعىتتى جانە پارتيانىڭ وسى ۇستانىمىن ءار وتباسىنا جەتكىزۋ – پارتيانىڭ ءار مۇشەسىنىڭ الدىنا قويىلىپ وتىرعان مىندەت. كەلەشەك ۇرپاق الدىنداعى ءار اتا-انانىڭ جاۋاپكەرشىلىگى.
مەملەكەت ءۇشىن دە, حالىق ءۇشىن دە ەڭ باستى قۇندىلىق – تاۋەلسىزدىك. ەلباسىمىز بابالارىمىز سان عاسىرلار بويى اڭساعان ارمانعا قول جەتكىزگەنىمىزدى ماقتان ەتە ءبىلۋىمىز كەرەك ەكەنىن, ۇلتىمىزدىڭ ۇلى تاريحىنىڭ جاڭا تاراۋى قۋاتتى دا تابىستى تاۋەلسىز مەملەكەتتىڭ شەجىرەسى بولىپ جازىلىپ جاتقانىن اتاپ ءوتتى. «ەلىمىز وسى جىلداردا ەرلىك پەن بىرلىكتىڭ ۇلگىسىن كورسەتتى. تاۋەلسىزدىكتىڭ قيىنشىلىقپەن كەلگەنىن, ونى ۇستاپ قالۋ وڭاي ەمەس ەكەندىگىن حالقىمىز ءبىلدى. وسىنى ءتۇسىنىپ وتىرعان, ءبىر جۇدىرىقتاي جۇمىلىپ وتىرعان حالقىما شىن جۇرەگىمنەن العىسىمدى ايتامىن», دەدى شىنايى ريزاشىلىعىن جەتكىزىپ.
ءبىزدىڭ الدىمىزداعى مىندەت – ۇلتتىق جانە مەملەكەتتىك ءمۇددەنى جوعارى قوياتىن ىسكەر ازاماتتارىمىزدى پارتيانىڭ توڭىرەگىنە بىرىكتىرۋ. بارشا حالىقتى «قازاقستان-2050» ستراتەگياسىن ىسكە اسىرۋعا جۇمىلدىرۋ, بارلىق كۇشتى ءبىر ارناعا باعىتتاۋ. وسى ورايدا, پارتيانىڭ ءار مۇشەسى ۋاقىتپەن ساناسپاي ءجۇرىپ, دوكترينا ماقساتىن حالىققا ءتۇسىندىرۋ, ولاردى ءوز ورتاسىنا تارتۋ باعىتىندا جۇمىس ىستەۋى كەرەك. مىسالى, قازىر بىزدە شاعىن جانە ورتا كاسىپكەرلىكپەن اينالىسۋعا وتە كوپ مۇمكىندىكتەر جاسالعان. زاڭمەن قاراستىرىلعان جەڭىلدىكتەر بار. سالا-سالا بويىنشا جەڭىلدىكپەن بەرىلەتىن نەسيەلەر بار. كاسىپكەرلىكپەن اينالىسۋ ءۇشىن ادامدا ىسكەرلىك, قايراتكەرلىك, توزىمدىلىك قاسيەتتەرى بولعانى ءجون. بەرەكەلى بايلىق وڭايلىقپەن كەلمەيتىنى انىق. ەلباسى پارتيا سەزىندە ەلىمىزدە شاعىن جانە ورتا بيزنەستىڭ ءونىمى 20 پايىز كولەمىندە ەكەنىن ايتتى. ال دامىعان ەلدەردە بۇل كورسەتكىش 60-70 پايىزعا جەتەدى. ءبىز ورتا ءجانە شاعىن بيزنەستى قولداپ, دامىتىپ, ونىڭ ۇلەسىن 50 پايىزعا دەيىن جەتكىزۋىمىز كەرەك. سوندا عانا دامىعان 30 ەلدىڭ قاتارىنا كىرەمىز.
قازاقستان – كوپۇلتتى مەملەكەت. سوندىقتان ۇلتارالىق ماسەلەگە دە تەرەڭ ءمان بەرىپ قاراۋىمىز قاجەت. دوكترينادا قازاقستاننىڭ تابىستى دامۋىنىڭ سەنىمدى ىرگەتاسى – حالىقتىڭ ءبىرلىگى مەن قوعامدىق كەلىسىم ەكەنى انىق جازىلعان. قازىرگى ءبىزدىڭ قوعامىمىزدا كەلىسىم مەن تۇراقتىلىقتى ساقتاۋدىڭ تۇجىرىمدامالىق جاڭا مەحانيزمىن قالىپتاستىرۋ كەرەك. ويتكەنى, قازاقستان كونفەسسياارالىق كەلىسىمنىڭ ۇلگىسى, دىندەر ۇنقاتىسۋىنىڭ الەمدىك ورتالىعى بولىپ تابىلادى. دوكترينادا ءبىزدىڭ قوعامداعى كەلىسىمدى قالىپتاستىرۋدىڭ جاڭا, زاماناۋي فورمالارىن پايدالانۋ كەرەك, كەلىسىمدى كۇشتەپ ەمەس, ادامداردىڭ ساياسي مادەنيەتىن قالىپتاستىرۋ ارقىلى قامتاماسىز ەتۋ كەرەك دەگەن تەزيستەر بار. دوكترينادا «بارلىق ۇلتتاردىڭ وزىندىك ەرەكشەلىگىن ساقتاي وتىرىپ, قازاق ءتىلىن, مادەنيەت پەن ءداستۇردى دامىتۋ ءبىزدىڭ ستراتەگيالىق باسىمدىعىمىز بولىپ تابىلادى», دەپ اتاپ كورسەتىلگەن. پارتيا سەزىندە ەلباسى ءبىزدىڭ ۇرانىمىز «ءبىر ەل – ءبىر حالىق – ءبىر تاعدىر» ەكەنىن, بۇل ءبىزدىڭ ناقتى ومىردە دايەكتىلىكپەن جۇزەگە اسىرىپ كەلە جاتقان اسا ماڭىزدى قاعيداتىمىز بولىپ وتىرعانىن ايرىقشا ايتىپ ءوتتى. ءبىزدىڭ حالىق ءوز جانىنا وزگە ۇلتتاردى توپتاستىرىپ, ەلدى بىرىكتىرۋدە نەگىزگى ۇيىتقى بولادى.
دوكترينادا كورسەتىلگەن تاعى دا ءبىر قۇندىلىق – زاڭنىڭ ءۇستەمدىگى. بۇل – مەملەكەتىمىز ءۇشىن وتە وزەكتى ماسەلەلەردىڭ ءبىرى. قۇجاتتا اتاپ كورسەتىلگەندەي, زاڭ قانداي دا ءبىر ادامنىڭ مارتەبەسىنە جانە الەۋمەتتىك شىعۋ تەگىنە قاراماستان, مۇلتىكسىز ورىندالۋى كەرەك دەپ ناقتى جازىلعان. دوكترينادا: «زاڭنىڭ ۇستەمدىگى ءادىل قوعام قۇرۋعا, بارشانىڭ ءمۇمكىندىكتەرىنىڭ تەڭدىگىن قامتاماسىز ەتۋگە جاعداي تۋعىزادى», دەپ جازىلعان. سوندىقتان دەموكراتيالىق جولدى تاڭداعان قازاقستاننىڭ بولاشاعى زاڭنىڭ ۇستەمدىگىنە تىكەلەي بايلانىستى. وسى جولدا, بىزدەرگە – پارلامەنت دەپۋتاتتارىنا دا ۇلكەن مىندەتتەر جۇكتەلىپ وتىر. 2 قىركۇيەك كۇنى ءۇشىنشى سەسسيانىڭ اشىلۋىندا مەملەكەت باسشىسى زاڭ شىعارۋ ىسىندەگى نەگىزگى باعىتتاردى ايقىنداپ بەردى. بۇگىنگى تاڭدا پارلامەنت ماجىلىسىندە زاڭ جوبالارىمەن جۇمىس جاساۋ وتە قارقىندى جۇرگىزىلۋدە. جاڭا زاڭ جوبالارى كوميتەت پەن جۇمىس توپتارىنىڭ وتىرىستارىندا تالقىلانىپ جاتىر. ءبىزدىڭ ماقسات – قوعامعا قاجەتتى ساپالى زاڭدار شىعارۋ.
«نۇر وتان» پارتياسى حالىقتى ءبىر ماقسات جولىنا بىرىكتىرۋدىڭ ۇيلەستىرۋشىسى بولۋى كەرەك. ءبىزدىڭ پارتيا ەلىمىزدىڭ جەتەكشى ساياسي كۇشى رەتىندە, ەڭ الدىمەن, ءاربىر ايماق, تۇرعىلىقتى جەر تۇرعىندارىمەن ىنتىماقتاسا جۇمىس ىستەيتىن جەرگىلىكتى ۇيىمدارى مەن بولىمشەلەرىنە سۇيەنەدى. سوندىقتان ءبىزدىڭ ءبىرىنشى ماقساتىمىز – بارلىق ساياسي قۇرىلىمداردىڭ جۇمىسىن جاڭا ساپالى دەڭگەيگە كوتەرۋ. بۇگىندە جەرگىلىكتى جانە ايماقتىق فيليالداردى نىعايتۋ ماقساتىندا بارلىق جاعدايلار جاسالۋدا. ارينە, حالىقپەن جۇمىس جاساۋدىڭ, ناسيحات جۇرگىزۋدىڭ, ەلدى ءبىر ماقسات جولىنا بىرىكتىرۋدىڭ نەگىزگى سالماعى وڭىرلەردەگى پارتيالاستارىمىزدىڭ يىعىنا جۇكتەلەتىنى انىق. سوندىقتان جاڭا ساياسي دوكترينادا ايقىندالعان «نۇر وتان» پارتياسىنىڭ يدەيالارى مەن قۇندىلىقتارىن قوعامدا جۇزەگە اسىرۋدىڭ باستى جاۋاپكەرشىلىگى پارتيا مۇشەلەرىنە جۇكتەلىپ وتىر.
ءبىزدىڭ پارتيامىزدىڭ جاڭا ساياسي دوكتريناسىنىڭ نەگىزىندە قازاقستاندىقتىڭ ءوز ارماندارى مەن يدەيالارى جاتىر. ءبىزدىڭ قوعامداعى ءاربىر ادامنىڭ جەتىستىگى – ەلدىڭ جەتىستىگى. سوندىقتان مەملەكەت دەڭگەيىندە ادامعا ءوز مۇمكىندىگىن اشۋعا, ءوزىنىڭ وتباسى ءۇشىن قىزمەت اتقارۋعا جانە ءال-اۋقاتىن ارتتىرۋعا بارلىق جاعدايلار جاسالعان. ءبىزدىڭ ماقساتىمىز – قوعامىمىزدىڭ ءاربىر مۇشەسىنە, ءوز مۇمكىندىكتەرىن اشا وتىرىپ, جەتىستىككە جەتۋىنە باعىت-باعدار بەرۋ.
پارتياعا ۇلكەن جاۋاپكەرشىلىك جۇكتەلىپ وتىر. ەلباسى «نۇر وتان» قاشاندا ازاماتتىق قوعامنىڭ كوشباسشىسى بولۋى قاجەت ەكەنىن ايتتى. ويتكەنى, پارتيا ۇكىمەتتىك ەمەس قوعامدىق ۇيىمدارمەن, باسقا دا ساياسي, مادەني ۇيىمدارمەن تىعىز ارىپتەستىك بايلانىس ورناتىپ, ولاردىڭ پىكىرىنە دە نازار اۋدارىپ, ۇتىمدى ۇسىنىستارعا ساراپتاما جاساپ, بارلىق كۇشتى ءبىر ورتاعا بىرىكتىرۋى قاجەت. ەلباسىنىڭ ايتۋىنشا, بۇل جۇمىستى بوساڭسىتۋعا بولمايدى, ويتكەنى, ءبىزدىڭ پارتيا ەلدىڭ بولاشاققا قادام باسۋىنىڭ يادروسى بولىپ تابىلادى.
مەملەكەت باسشىسى: «پارتيالىق كوشباسشىلىقتىڭ باستى ماسەلەلەرىنىڭ ءبىرى – ەكونوميكالىق جانە الەۋمەتتىك يننوۆاتسيالاردىڭ جالپىۇلتتىق ەپيتسەنترى بولۋ. ءبىزدىڭ پارتيامىز قوعام مەن مەملەكەتتى دامۋدىڭ باتىل, يننوۆاتسيالىق يدەيالارىمەن ءنارلەندىرۋى ءتيىس», دەپ اتاپ ءوتتى.
قازىر ىسكە اسىپ جاتقان يندۋستريالىق-يننوۆاتسيالىق دامۋ باعدارلاماسى ەلىمىزدىڭ ءبۇكىل ەكونوميكاسىن دامىتۋدىڭ لوكوموتيۆى بولۋى قاجەت. ەكونوميكا جەتىستىكتەرى يننوۆاتسيالار جانە عىلىمي جاڭالىقتار نەگىزىندە العا باساتىنى انىق. «ءححى عاسىردا تابىستىڭ ماڭىزدى شارتى كرەاتيۆتىلىك بولىپ تابىلاتىنىن اتاپ كورسەتەمىن. سوندىقتان «نۇر وتان» كرەاتيۆتى پارتيا بولۋى ءتيىس. شىعارماشىل ينتەلليگەنتسيامەن جۇمىستى ايتارلىقتاي كۇشەيتۋ كەرەك», دەگەن ەلباسى زيالى قاۋىمعا ۇلكەن سەنىم ارتىپ وتىر. ينتەلليگەنتسيا – قوعامداعى ۇلكەن كۇش. «نۇر وتان» پارتياسى ساياسي-ناسيحات ىسىندە زيالى قاۋىممەن تىعىز جۇمىس ىستەپ, حالىق ءۇشىن جۇزەگە اسىرىپ جاتقان وڭ باستامالارىن ەلگە جەتكىزە ءبىلۋى كەرەك. وسى ورايدا, ەل پرەزيدەنتى ءبىز قوعامىمىزدىڭ ەرەكشەلىكتەرىن ارتىقشىلىققا اينالدىرا بىلدىك, ءارالۋاندىعىمىز – بايلىعىمىزعا, ءبىرلىگىمىز – تابىسىمىزعا اينالدى, دەدى. وسىنى ۇلت زيالىلارى ۇنەمى ەستە ۇستاپ, جاستارعا ءاردايىم ىنتىماقتىڭ ۇلگىسىن كورسەتكەنى ءجون.
قازىر بىرنەشە مەملەكەتتىك باعدارلامالار جۇزەگە اسىرىلۋدا: بيزنەس جول كارتاسى-2020, جۇمىسپەن قامتۋ-2020, ءونىمدىلىك-2020. ءبىزدىڭ ازاماتتاردىڭ كاسىپكەرلىك بەلسەندىلىگىن قولداۋدىڭ 100-دەن استام تەتىكتەرى جۇمىس جاسايدى. مۇنىڭ بارلىعىن ءبىز قوعامعا جەتكىزۋىمىز قاجەت.
پارتيانىڭ ەندىگى شەشىمدەرى وسى دوكتريناعا سۇيەنىپ قابىلدانۋى كەرەك. ءبىز حالىققا قانداي جەتىستىككە جەتكەنىمىزدى, قانداي كەدەرگىلەر بولۋى مۇمكىن ەكەنىن, قانداي باعىتتى ۇستانامىز, قانداي ماسەلەلەر شەشۋدى قاجەت ەتەتىنىن اشىق ايتۋىمىز قاجەت. سىبايلاس جەمقورلىقپەن كۇرەستى كۇشەيتۋگە ءتيىسپىز. حالىقتى سىبايلاس جەمقورلىقتان قورعاۋ قاجەت. مەملەكەتتىك قازىنادان ءبىر تەڭگە دە باسقا جاققا كەتپەۋى كەرەك.
«نۇر وتان» پارتياسىنىڭ ءتوراعاسى ءوز سوزىندە ءبىزدىڭ پارتيا مەملەكەتىمىزدىڭ باستى سىرتقى ساياسي قۇندىلىقتارىن بەلسەندى جاقتاپ جانە العا باستىرۋى كەرەك ەكەنىن ايتتى. ارينە, الەمدىك قوعامداستىققا مۇشە بولىپ وتىرعان قازاقستان حالىقارالىق ماسەلەدە ۇلكەن بەدەلگە يە. ساۋدا-ەكونوميكالىق بايلانىستا ءتيىمدى جاعىن انىق ءبىلىپ وتىرۋىمىز كەرەك. سىرتقى ساياساتتا ىنتىماقتاستىق نەگىزدەرىن بەرىك ۇستانىپ, مادەني-رۋحاني بايلىعىمىزدى, ۇلتتىق قۇندىلىقتارىمىزدى الەمگە تانىتۋىمىز قاجەت. «نۇر وتان» پارتياسى وسى ىسكە دە اتسالىسىپ, ءوزىنىڭ ساياسي قارىم-قاتىناستاعى شەبەرلىگىن كورسەتە بىلگەنى ءجون.
ءبىزدىڭ دوكترينا – قازاقستان-2050 ستراتەگياسىن قولداۋدىڭ جالپىۇلتتىق جوباسى. دوكترينادا «نۇر وتان» پارتياسىنىڭ باستى ساياسي كۇش رەتىندە ءرولىنىڭ ارتۋى, ول ەلباسىنىڭ ساياسي باعىتىن قولداۋدىڭ نەگىزى بولاتىندىعى ايقىندالعان.
وسى دوكترينا قوعامدا دۇرىس قۇندىلىقتاردى قالىپتاستىرۋعا جۇمىس ىستەيدى دەگەن سەنىمدەمىز. ەكىنشىدەن, وسى دوكترينا «نۇر وتاننىڭ» جۇمىسىن جۇيەلى, تولىققاندى ۇيىمداستىرۋعا ءمۇمكىندىك بەرەدى. ۇشىنشىدەن, ورتاق قۇندىلىقتاردى انىقتاپ الۋ ارقىلى پارتيانىڭ ىشىندەگى ءبىرلىكتى, تۇتاستىقتى قامتاماسىز ەتۋگە جۇمىس ىستەيدى دەپ سەنەمىز.
ءبىزدىڭ پارتيا ەلباسى ۇستانعان باعىت-باعداردىڭ توڭىرەگىنە ىنتىماقتاسۋعا, بىرىگۋگە ۇندەيدى. ءبىز ەلباسىنىڭ ساياسي باعىتىنىڭ ساباقتاستىعى مەن تۇراقتىلىعىن قولدايمىز. ەلباسى ن.ءا.نازارباەۆ: «پارتيا قاشاندا جالپىۇلتتىق بىرلىكتىڭ ورتالىق بۋىنى بولۋى ءتيىس. بىرىنشىدەن, «نۇر وتان» – حالىقتى توپتاستىرۋشى پارتيا», دەدى. سوندىقتان پارتيانىڭ كوشباسشىلىق قابىلەتىن ونىڭ ءاربىر مۇشەسى ءوز ورتاسىندا تانىتا ءبىلۋى كەرەك جانە سوعان وراي جاۋاپكەرشىلىككە دە يە بولادى.
بۇگىنگى تاڭدا نۇرسۇلتان نازارباەۆتىڭ جۇرگىزىپ وتىرعان كەمەل ساياساتىنىڭ ناتيجەسىندە ءتاۋەلسىز ەلىمىز ءوز تاريحىندا بولماعان جەتىستىكتەرگە قول جەتكىزدى. ال دوكترينانىڭ مىندەتى – ەلدىڭ تابىسىن ودان ءارى ارتتىرىپ, بيىك بەلەستەردى باعىندىرۋ. بۇل قۇجاتتا كوزدەلگەن ماقساتقا قول جەتكىزەتىندەر – جاستار. ەل ازاماتتارىنا جاڭا ستراتەگيالىق باعىت بويىنشا قارقىندى جۇمىس ىستەيتىن مۇمكىندىك تۋىپ تۇر. ونى ۇيىمداستىرۋ «نۇر وتان» پارتياسىنىڭ الدىندا تۇرعان جاۋاپتى مىندەت, مۇددەلى ماقسات!
ءۋاليحان بيشىمباەۆ,
اكادەميك, پارلامەنت
ءماجىلىسىنىڭ دەپۋتاتى.
