تىرشىلىكتىڭ دىبىسىن ءوز قۇلاعىڭمەن ەستۋ دە ءبىر باقىت. قورشاعان ورتانىڭ اسەرى مە, الدە تۇقىم قۋالاۋشىلىق پا, ايتەۋىر قازىرگى تاڭدا جاس بالالاردىڭ اراسىندا ەستۋ قابىلەتىنەن ايىرىلعاندار سانى كوبەيىپ تۇر. سونداي كەمشىلىكتەرمەن كۇرەسىپ, تالاي سابيگە تىرشىلىكتىڭ دىبىسىن ەستۋ مۇمكىندىگىن جاساعان №5 قالالىق-كلينيكالىق اۋرۋحاناسىنىڭ دارىگەرلەرىنە ەلدىڭ ايتار العىسى بولەك.
تىرشىلىكتىڭ دىبىسىن ءوز قۇلاعىڭمەن ەستۋ دە ءبىر باقىت. قورشاعان ورتانىڭ اسەرى مە, الدە تۇقىم قۋالاۋشىلىق پا, ايتەۋىر قازىرگى تاڭدا جاس بالالاردىڭ اراسىندا ەستۋ قابىلەتىنەن ايىرىلعاندار سانى كوبەيىپ تۇر. سونداي كەمشىلىكتەرمەن كۇرەسىپ, تالاي سابيگە تىرشىلىكتىڭ دىبىسىن ەستۋ مۇمكىندىگىن جاساعان №5 قالالىق-كلينيكالىق اۋرۋحاناسىنىڭ دارىگەرلەرىنە ەلدىڭ ايتار العىسى بولەك.
№5 قالالىق-كلينيكالىق اۋرۋحانادا اۋىز-قۇلاق قۋىستارى مەن جاق-بەت سۇيەك اقاۋلارىن قالپىنا كەلتىرە بىلەتىن بىلىكتى ماماندار توبى بارشىلىق. ءبىر اۋىسىمدا 375 سىرقاتتى قابىلداي الاتىن ايەلدەرگە ارنالعان ەمحاناسى دا بار. قازىر ەل ۇكىمەتى مۇگەدەك جاندارعا نازار اۋدارۋدى مىقتىلاپ جولعا قويدى. سوڭعى كەزدەرى №5 قالالىق-كلينيكالىق اۋرۋحاناعا ەستۋ قابىلەتى ءتۇرلى دەڭگەيدە ناشارلاعان سىرقاتتار لەگى تولاستاماي تۇر, سولاردىڭ دەنى جاس بالالار. وسىعان وراي اتالمىش اۋرۋحانادا ەستۋ كەمىستىگى بار بالالار ءۇشىن سۋردولوگيالىق كومەك, ياعني, قولدىڭ كومەگىمەن ىمداپ سويلەسۋ جۇيەسى تەرەڭدەتىلىپ وقىتىلۋدا.
2007 جىلدان باستاپ ورتالىقتا ەرەسەكتەر مەن بالالاردىڭ ەستۋ اقاۋىن انىقتاۋ ءتارتىبى زاماناۋي تاسىلدەرمەن جۇزەگە اسىرىلادى. جاس بالانىڭ نەمەسە شالا تۋعان ءسابيدىڭ ەستۋ مۇمكىندىگىن دە ناقتىلاۋ قازىر قيىندىق تۋدىرمايتىن بولعان. سۋردو-فونياتريكالىق ورتالىقتىڭ ماماندارى تەك الماتى قالاسىنىڭ تۇرعىندارىن عانا ەمەس, سونىمەن قاتار «دەنساۋلىق ساقتاۋدىڭ بىرىڭعاي جۇيەسى» اياسىندا بارشا قازاقستاندىقتارعا دارىگەرلىك كومەگىن ايامايدى.
قازىر №5 قالالىق-كلينيكالىق اۋرۋحانانىڭ ءدارىگەرلەرى ەستۋ قابىلەتىن قالىپقا كەلتىرۋ ىسىمەن اينالىساتىن الەمدىك الدىڭعى قاتارلى ەمحانالارمەن تىعىز بايلانىس ورناتىپ وتىر. اتالمىش مەكەمەنىڭ ماماندارى عىلىمي-بىلىكتىلىك باعدارلاماسىنا ءسايكەس گەرمانيا, اۆستريا, ۇلىبريتانيا, يزرايل, وڭتۇستىك كورەيا, اقش, جاپونيا جانە يتاليا, پولشا, تۇركيا, دانيا سياقتى مەملەكەتتەردىڭ اۋرۋحانالارى مەن ەمحانالارىندا بولىپ, سول ەلدەردەن اكەلىنەتىن ەستۋ اپپاراتتارىنىڭ قولدانۋ ءتاسىلدەرىن دە جەتىك مەڭگەرۋ ۇستىندە.
2010 جىلدان باستاپ №5 قالالىق-كلينيكالىق اۋرۋحانانىڭ دارىگەرلەرى اسا كۇردەلى وتا جاساۋ ءىسىن دە ءوز قولىنا الدى. 2011 جىلدان بەرى تۇراقتى تۇردە وتاندىق ورتالىقتىڭ بىلىكتى ماماندارى ەلىمىزدىڭ شالعاي وڭىرلەرىنە بارىپ, جەرگىلىكتى دارىگەرلەردىڭ بىلىكتىلىگىن كوتەرۋ ءىسىن دامىتىپ ءجۇر.
ادامنىڭ ەستۋ قابىلەتىن قالپىنا كەلتىرۋدىڭ ءبىر جولى «كوحلەارلىق يمپلانتاتسيا» دەپ اتالادى. بۇل جاس سابيلەرگە جاسالاتىن وتا. قالالىق-كلينيكالىق اۋرۋحانادا وسى كۇنگە دەيىن جاسالعان 348 وتانىڭ 99-ى بالالارعا جاسالىپ وتىر. الايدا, وتا ءساتتى جاسالعانىمەن ادامنىڭ سويلەۋ مانەرىن قالپىنا كەلتىرۋ كوپتەگەن قيىندىقتاردى تۋدىرىپ جاتادى. سول سەبەپتى ورتالىقتىڭ سۋردوپەداگوگتارى, لوگوپەدتەرى مەن فونياتور ماماندارى وتا جاسالاتىن سىرقاتپەن كۇن ىلگەرى جۇمىس جاساپ, ولاردىڭ قاتارعا قوسىلىپ كەتۋىنە كوپ ىقپال ەتەدى.
سۋردوپەداگوگتاردىڭ جۇمىسىنا ەستۋ قابىلەتى شەكتەلگەن بالالاردىڭ اتا-انالارىمەن تىعىز بايلانىستا بولىپ, ولارعا ءوز ءسابيىنىڭ ەستۋ قابىلەتى دۇرىس جولعا قويىلۋ جولدارىن قامتاماسىز ەتۋ ءتاسىلىن ۇيرەتۋ ءىسى دە جاتادى. قۇلاعى ەستىپ, ءتىلى سويلەۋگە يكەمدەلگەن, كەلە-كەلە جالپى ءبىلىم بەرۋ مەكتەپتەرىندە ءبىلىم الۋ مۇمكىندىگىنە يە بولعاندار دا كوپتەپ كەزدەسەدى.
دەنساۋلىق ساقتاۋ مەكەمەسىندە مامان ساياساتىن دۇرىس قولدانا ءبىلۋ دە ونەر. قازىر اتالمىش ەم ورتالىعىندا 2 مەديتسينا عىلىمدارىنىڭ دوكتورى, 13 مەديتسينا عىلىمدارىنىڭ كانديداتى, جوعارى كاسىبي كاتەگورياعا يە 52 دارىگەر, 3 «التىن بەلگى» يەگەرى جانە ءار جىلداردا «ۇزدىك مەديتسينا قىزمەتكەرى» اتانعان جاس دارىگەرلەر جۇمىس ىستەيدى.
قانات ەسكەندىر,
«ەگەمەن قازاقستان».
الماتى.
