قركف بايقاۋشىلارى رەسپۋبليكالىق شتابىنىڭ توراعاسى – كاسىپوداقتار فەدەراتسياسى توراعاسىنىڭ ورىنباسارى نۇرلان وتەشەۆ 26 قاراشاداعى جاعداي بويىنشا قركف مەن ونىڭ مۇشەلىك ۇيىمدارىنان 5 762 تاۋەلسىز بايقاۋشى تىركەلگەنىن, ولار داۋىس بەرۋدى رەسپۋبليكا بويىنشا 3 726 سايلاۋ ۋچاسكەسىندە باقىلايتىنىن اتاپ ءوتتى.
– قازاقستان رەسپۋبليكاسى كاسىپوداقتار فەدەراتسياسى اتقارۋ كوميتەتىنىڭ 6 قاراشاداعى شەشىمىمەن كاسىپوداقتار سايلاۋ پروتسەسىنە بايقاۋشىلار رەتىندە قاتىسادى. ءبىز الدىمىزعا ەكى مىندەت قويدىق – ۇزاق مەرزىمدى جانە قىسقا مەرزىمدى. بىرىنشىدەن, ءبىز ءۇشىن ازاماتتاردىڭ ءوز تاڭداۋىن جاساۋ ەركىندىگى جۇمىس بەرۋشىلەر وكىلدەرىنىڭ تاراپىنان قانداي-دا ءبىر قىسىممەن بۇزىلماۋى ماڭىزدى. ەكىنشىدەن, ءبىز سايلاۋ پروتسەسىنىڭ ەلدىڭ زاڭناماسىنا سايكەس ءوتۋىن بايقايمىز, – دەپ اتاپ ءوتتى ول.
رەسپۋبليكالىق شتابتىڭ مۇشەسى – «مەملەكەتتىك, بانك مەكەمەلەرى جانە حالىققا قىزمەت كورسەتۋ قىزمەتكەرلەرىنىڭ قازاقستاندىق كاسىپوداعى» قوعامدىق بىرلەستىگى توراعاسىنىڭ ورىنباسارى اتاقوزى نۇرلانوۆ اتالعان سالالىق كاسىپوداقتىڭ كاسىپوداقتار فەدەراتسياسىنىڭ ەڭ ءىرى مۇشەلىك ۇيىمدارىنىڭ ءبىرى جانە ارقاشان ەلدەگى ەڭ ماڭىزدى ىشكى ساياسي پروتسەستەردىڭ الدىڭعى قاتارىندا ەكەنىن جەتكىزدى. ونىڭ ايتۋىنشا, قازىرگى كەزدە سالالىق كاسىپوداق, ونىڭ فيليالدارى مەن جەرگىلىكتى كاسىپوداق ۇيىمدارىنىڭ مۇشەلەرى بايقاۋشىلاردىڭ وبلىستىق جانە اۋماقتىق شتابىنىڭ قۇرامىنا كىردى.
– ىنتىماقتاستىققا نەگىزدەلگەن الەۋمەتتىك ارىپتەستەرىمىزبەن بىرلەسكەن جۇمىس بىزگە ەڭبەك ادامىنىڭ سايلاۋ بوستاندىعىنا كونستيتۋتسيالىق قۇقىعى سياقتى نەگىزگى دەموكراتيالىق قۇندىلىقتاردى ساقتاۋدا ايتارلىقتاي جەتىستىكتەرگە جەتۋگە مۇمكىندىك بەرەدى, – دەدى ا.نۇرلانوۆ.
ءوز كەزەگىندە رەسپۋبليكالىق شتابتىڭ مۇشەسى – «قازاقستاندىق ءبىلىم جانە عىلىم قىزمەتكەرلەرىنىڭ سالالىق كاسىپوداعى» قب ءتورايىمىنىڭ ورىنباسارى ءاليا ابيەۆا جۋرناليستەرگە اتالعان سالالىق كاسىپوداقتىڭ قركف-نىڭ ءىرى مۇشەلىك ۇيىمدارىنىڭ ءبىرى ەكەندىگىن, ونىڭ مۇشەلەرى دە بايقاۋشىلاردىڭ رەسپۋبليكالىق جانە ايماقتىق شتابتارىنىڭ قۇرامىنا كىرگەنىن ايتتى.
– ءبىزدىڭ سالالىق كاسىپوداق كاسىپوداقتار فەدەراتسياسىنىڭ سايلاۋ كۇنى سايلاۋ پروتسەستەرىنىڭ اشىقتىعىن باقىلاۋدى قامتاماسىز ەتۋ جونىندەگى باستاماسىن قولدايدى. ءبىز سايلاۋدىڭ اشىق, ەركىن جانە دەموكراتيالىق تۇردە ءوتۋى ءۇشىن بايقاۋشىلار رەتىندە بۇعان ىقپال ەتەمىز, – دەدى ءاليا ابيەۆا.
نۇر-سۇلتان قالاسى بويىنشا ايماقتىق شتابىنىڭ مۇشەسى – «Senim» دەنساۋلىق ساقتاۋ جۇيەسى جۇمىسكەرلەرىنىڭ سالالىق كاسىپتىك وداعى» رقب ەلوردالىق فيليال توراعاسى رۋسلان ساتىبالديەۆتىڭ ايتۋىنشا, استاناداعى 248 سايلاۋ ۋچاسكەسىندە سايلاۋ بارىسىن جۇزدەن استام كاسىپوداق مۇشەسى باقىلايتىن بولادى.
نۇر-سۇلتان قالاسى بويىنشا ايماقتىق شتابىنىڭ مۇشەسى, مادەنيەت, سپورت جانە اقپارات قىزمەتكەرلەرىنىڭ قازاقستاندىق سالالىق كاسىپوداعىنىڭ باستاۋىش كاسىپوداق ۇيىمىنىڭ مۇشەسى زەينەگۇل بازانوۆا بولسا, سايلاۋ ناۋقانىنا العاش رەت بايقاۋشى رەتىندە قاتىساتىنىن مالىمدەدى. بۇگىننەن باستاپ كاسىپوداقتار فەدەراتسياسى اۋماقتىق بايقاۋشىلار شتابىنىڭ مۇشەلەرى ءۇشىن بىرقاتار ونلاين-وقىتۋ سەمينارلارىن وتكىزەدى.
ەسكە سالايىق, قازاقستان پرەزيدەنتى قاسىم-جومارت توقاەۆتىڭ جارلىعىمەن قازاقستان رەسپۋبليكاسى پارلامەنتى ءماجىلىسى جانە ءماسليحاتتارى دەپۋتاتتارىنىڭ سايلاۋى 2021 جىلدىڭ 10 قاڭتارىنا بەلگىلەندى.
