تابيعات بايلىقتارىن قورعاۋدا جۇرتشىلىقتىڭ بەلسەندىلىك تانىتۋى ماڭىزدى

ەكولوگيا • 26 قاراشا، 2020

تابيعات بايلىقتارىن قورعاۋدا جۇرتشىلىقتىڭ بەلسەندىلىك تانىتۋى ماڭىزدى

7 رەت كورسەتىلدى

ەكولوگيا، گەولوگيا جانە تابيعي رەسۋرستار مينيسترلىگىنىڭ رەسمي Facebook پاراقشاسىندا ماڭعىستاۋ وڭىرىندەگى تابيعي نىسانداردى قورعاۋ شارالارى بويىنشا وتكەن تىكەلەي ەفيردەگى سۇحباتتا اۋماقتىق ينسپەكتسيا باسشىسى عابباس دوساتوۆ وسىلاي دەدى، دەپ حابارلايدى Egemen.kz.

Marzhan Tileubekova

ەفير بارىسىندا ول وڭىرلىك ينسپەكتسيانىڭ باستى مىندەتتەرىنە توقتالىپ ءوتتى.

«اۋماقتىق ينسپەكتسيانىڭ نەگىزگى مىندەتى – وبلىستاعى جانۋارلار مەن وسىمدىكتەردى قورعاۋ، ەرەكشە قورعالاتىن تابيعي اۋماقتار، اڭشىلىق، بالىق شارۋاشىلىقتارىن مەملەكەتتىك باقىلاۋمەن قامتاماسىز ەتۋ بولىپ تابىلادى. وبلىستا 12 ەرەكشە قورعالاتىن تابيعي اۋماق (كولەمى 2،8 ملن گا)، 9 اڭشىلىق شارۋاشىلىعى جانە 18 بالىق شارۋاشىلىعىمەن اينالىساتىن مەكەمەلەر تىركەلگەن. وبلىستاعى ەرەكشە قورعالاتىن تابيعي اۋماقتار جەرى 2،8 ملن گەكتاردى الىپ جاتىر»،- دەدى ينسپەكتسيا باسشىسى.

ع.دوساتوۆ وسىمدىكتەر مەن جانۋارلارعا قاتىستى قانداي دا ءبىر زاڭسىزدىقتىڭ كۋاسى بولعان جاعدايدا مىندەتتتى تۇردە اۋماقتىق ينسپەكتسياعا حابار بەرۋدى ءوتىندى.

ء«بىز بەيجاي قالماۋىمىز كەرەك. تابيعات بايلىقتارىن ساقتاۋ تەك ءتيىستى مەكەمەلەردىڭ ەمەس، جۇرتشىلىقتىڭ بىرلەسە ىستەيتىن شارۋاسى. ءبىزدى تۇرعىندارىمىزدىڭ قورشاعان ورتانى قورعاۋ سالاسىندا بەلسەندى بولۋى قۋانتادى»،- دەپ ايتتى ول.

ەفير بارىسىندا براكونەرلىكپەن كۇرەس ماسەلەلەرى دە تالقىلاندى. سپيكەردىڭ سوزىنشە، بيىلعى جىلى بەينەۋ جانە قاراقيا اۋداندارىندا قىزىل كىتاپقا ەنگەن قاقاقۇيرىق جانۋارىن زاڭسىز اۋلاۋ بويىنشا ەكى ءىس تىركەلگەن. ەكى ءىس بويىنشا دا كىنالىلەر قىلمىستىق جاۋاپكەرشىلىككە تارتىلىپ، 3 جىل باس بوستاندىعىنان ايىرىلعان.

«سوڭعى جىلدارداعى ساناق بويىنشا ارقار مەن قاراقۇيرىقتىڭ سانى ءوسىپ جاتقانىن بايقادىق. بۇل تابيعاتتى قورعاۋ ۇيىمدارى مەن اكىمدىكتىڭ بىرلەسكەن جۇمىسىنىڭ ناتيجەسى. كورشى ەلدەر اۋماعىنان لەوپاردتىڭ كەلۋى دە وعان قورەك بولاتىن جانۋارلاردىڭ كوبەيىپ، قولايلى ورتانىڭ قالىپتاسۋىنىڭ بەلگىسى»،- دەدى ينسپەكتسيا باسشىسى.

ايتا كەتەيىك، وسى ۋاقىتقا دەيىن الەۋمەتتىك جەلىلەردە ماڭعىستاۋ وڭىرىنە ۇشىپ كەلگەن قوقيقازدار قىزۋ تالقىعا تۇسكەن بولاتىن. عابباس دوساتوۆ بۇل ماسەلەگە قاتىستى ينسپەكتسيانىڭ پوزيتسياسىن ءتۇسىندىرىپ ءوتتى.

«قوقيقاز ايماققا كوكتەم جانە كۇز مەزگىلدەرىندە كەلەدى. بيىل قالا ماڭىنداعى قاراكولگە كەلىپ تۇراقتاعان. قاناتتى قۇستار مۇندا اقمولا وبلىسىنداعى قورعالجىن مەملەكەتتىك تابيعي قورىعى اۋماعىنداعى تەڭىز-قورعالجىن كولدەرىنەن ۇشىپ كەلگەن. مامانداردىڭ ايتۋى بويىنشا قوقيقازدار ماڭعىستاۋدان ارمەن قاراي، تۇركىمەنستان، يران مەملەكەتتەرىنە بەت الادى ەكەن. بۇل قۇستاردىڭ قاراكولگە كەلۋ سەبەبى - كولدىڭ سۋى جىلى ءارى قورەكتىك زاتتارعا باي بولۋىنان. قوقيقاز قونعان كول قاراقيا قاۋمالىندا. ەرەكشە قورعالاتىن اۋماقتار تۋرالى زاڭعا، پاسپورتقا سايكەس قاۋمال اۋماعىندا اڭ-قۇستى ءجونسىز مازالاۋعا بولمايدى. زەرتتەۋ جۇمىستارى دا كەلىسىممەن، رۇقساتپەن جۇزەگە اسىرىلادى»،- دەدى ول.

تىكەلەي ەفيردە بۇدان بولەك وڭىردە سيرەك كەزدەسەتىن جانۋارلار، ەكوتۋريزمنىڭ دامۋ تەندەنتسيالارى جايلى سۇراقتار قامتىلىپ، كورەرمەندەر تاراپىنان قويىلعان ساۋالدارعا جاۋاپتار الىندى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز