جارىس شىمىلدىعىن 49 كيلو سالماقتاعى بىلعارى قولعاپ شەبەرلەرى ءتۇردى. ءدال وسى سالماقتا قازاقستاننىڭ بەس دۇركىن جەڭىمپازى اتانىپ, ءتۇرلى حالىقارالىق دودالاردا اتوي سالىپ جۇرگەن كوكشەتاۋلىق تەمىرتاس ءجۇسىپوۆ ءتۋرنيردى ءساتتى باستادى. الماتىلىق مۇحامەدجان ابدىراسىلوۆپەن جۇدىرىقتاسقان ءجۇسىپوۆ قارسىلاسىنا ەش مۇمكىندىك قالدىرماي, تورەشىلەردىڭ شەشىمىمەن جەڭىسكە جەتتى. سونىمەن قاتار چەمپيوندىققا باستى ۇمىتكەر سانالعان ەلوردالىق اسحات ءجۇسىپوۆ, جامبىلدىق ەرمەك ماديەۆ, الماتى وبلىسىنىڭ وكىلى جاندوس نەسىپجانوۆ جانە تاعى باسقا بوكسشىلار كەلەسى كەزەڭگە سۇرىنبەي ءوتتى.
52 كيلو سالماقتا العاشقى كۇننەن-اق ۇزدىك قارسىلاستار ءبىر-بىرىنە تاپ بولىپ, جارىس كورىگىن قىزدىردى. اتاپ ايتار بولساق, 2017 جىلى گەرمانيادا وتكەن الەم چەمپيوناتىندا 49 كيلودا ەل قورجىنىنا قولا جۇلدە سالعان تۇركىستان وبلىسىنىڭ وكىلى ەرجان جومارت جارىس جولىنان شىعىپ قالدى. 2017 جىلى 52 كيلودا ەل چەمپيونى اتانعان اتىراۋلىق ولجاس باينيازوۆ 4 راۋندتا مىقتىلىق تانىتىپ, 4:1 ەسەبىمەن جەڭىسكە جەتتى.
جاستار اراسىندا ازيا چەمپيونى اتانىپ, مامانداردىڭ كوزىنە تۇسكەن شىمكەنتتىك سابىرحان ماحمۇت تا ەرەسەكتەر اراسىنداعى ەل چەمپيوناتىن ءساتتى باستادى. سولتۇستىكقازاقستاندىق دانيار جاراسوۆپەن قولعاپ تۇيىستىرگەن ول قارسىلاسىنان ەكىنشى راۋندتا تەحنيكالىق نوكاۋتپەن باسىم ءتۇستى.
سونداي-اق 60 كيلودا 2017 جىلى جاستار اراسىندا ازيا چەمپيونى اتانعان ءساماتالى تولتاەۆ, 56 كيلودان 60 كيلوعا اۋىسقان لوندون وليمپياداسىنىڭ قاتىسۋشىسى ءىلياس سۇلەيمەنوۆ, 2013 جىلعى ەل چەمپيونى ادىلەت قۇرمەتوۆ باپكەرلەر سەنىمىن اقتاپ, كەلەسى كەزەڭگە جولداما الدى. سۇلەيمەنوۆ قارسىلاسىن نوكداۋنعا ءتۇسىرىپ, جەكپە-جەكتى مەرزىمىنەن بۇرىن اياقتاعانىن ايتا كەتەيىك.
ەكىنشى جارىس كۇنىن 57 كيلو سالماقتاعى جىگىتتەر باستادى. ناۋرىز ايىندا يوردانياداعى توكيو وليمپياداسىنا جولداما بەرۋشى جارىستا ليتسەنزيا يەلەنگەن پاۆلودارلىق سەرىك تەمىرجانوۆ العاشقى «سىناقتان» سۇرىنگەن جوق. سونداي-اق وسى سالماقتا بىلتىر چەمپيوناتتا جۇلدەگەر اتانعان ورازبەك اسىلقۇلوۆ كەلەسى كەزەڭگە شىقتى.
63 كيلو سالماقتىڭ ۇزدىكتەرى ءبىرىنشى اينالىمنان بوساتىلعان. اتاپ ايتار بولساق, زاكىر سافيۋللين, ءدىلمۇرات ميجيتوۆ جانە بەكداۋلەت يبراگيموۆ جارىستى ەكىنشى كەزەڭنەن باستايدى. ەكىنشى اينالىمدا سافيۋللين ءالي اقەدىلوۆپەن, ميجيتوۆ ازامات نۇركەنمەن, ال يبراگيموۆ ايتجان اشىرحانمەن قولعاپ تۇيىستىرەدى.
وليمپيا ويىندارىندا «قازاقتىڭ» سالماعى اتانىپ كەتكەن 69 كيلودا وسى سالماقتىڭ سەركەسى – ابىلايحان ءجۇسىپوۆتىڭ العاشقى قارسىلاسى بەلگىلى بولدى. ەكىنشى اينالىمدا ءجۇسىپوۆ ءبىرىنشى كەزەڭدە تۇركىستاندىق تۇرار تىلەۋقابىلدان باسىم تۇسكەن سابىرجان بەكبەرگەنوۆپەن جۇدىرىقتاسادى. 2013 جىلى 69 كيلودا قازاقستان چەمپيونى اتانىپ, كەيىننەن كاسىپقوي بوكسقا بەت بۇرعان جامبىلدىق ساعادات راحمانقۇل بيىلعى ەل چەمپيوناتىندا باق سىناپ جاتىر. العاشقى اينالىمدا ول تەمىرجان بايمولدانى 5:0 ەسەبىمەن ەش قيىندىقسىز جەڭدى. سونىمەن قاتار 64 كيلودا ەل چەمپيونى اتانىپ, بيىل 69 كيلوعا اۋىسقان جاستار اراسىنداعى ازيا چەمپيونى ءساناتالى تولتاەۆ قارسىلاسى قۋان قۋاتوۆتان ۇپاي سانىمەن جەڭىلىپ, جارىستى ەرتە اياقتاۋعا ءماجبۇر بولدى. 2018 جىلى اقتاۋدا وتكەن چەمپيوناتتىڭ كۇمىس جۇلدەگەرى اسلانبەك شىمبەرگەنوۆ جارىستى ەكىنشى كەزەڭنەن باستايدى. ونىڭ قارسىلاسى – شىعىسقازاقستاندىق ازامات يبرايموۆ.
جارىستىڭ ەكىنشى كۇنى اۋىر سالماقتاعى بوكسشىلار دا رينگكە كوتەرىلدى. ءار جىلدارى ىشكى چەمپيوناتتىڭ جۇلدەگەرى اتانعان اتىراۋلىق ەركىن مۇحامەدجان ءا دەگەننەن-اق جامبىلدىق نۇرسۇلتان امانجولوۆتى جارىس جولىنان ىعىستىردى. ال مۇحامەدجان كەلەسى كەزەڭدە ۇلتتىق قۇرامانىڭ كاپيتانى ءارى ريو وليمپياداسىنىڭ كۇمىس جۇلدەگەرى قامشىبەك قوڭقاباەۆپەن كىم مىقتىنى انىقتايدى. سونداي-اق 2016 جىلعى اۋىر سالماقتاعى ەل چەمپيونى اتانعان ولجاس بۇقاەۆ جاسوسپىرىمدەر وليمپياداسىنىڭ كۇمىس جۇلدەگەرى دامير تويبايدان جەڭىلىپ, جارىستى ەرتە اياقتادى. ال بىلتىرعى سپارتاكيادانىڭ جەڭىمپازى نۇربولات سەرماحانوۆ ايبولدى داۋرەن ۇلىنان ايلاسىن اسىرا المادى. سونىمەن قاتار سپارتاكيادا ءفيناليسى ەرجان سەيتىمبەتوۆ تە جارىستى ەرتە اياقتادى.
