«ەگەر ءسىز داۋىس بەرۋ كۇنىندە 18 جاسقا تولعان جانە بەلسەندى سايلاۋ قۇقىعىنا يە قازاقستان رەسپۋبليكاسىنىڭ ازاماتى بولساڭىز, پارلامەنت ءماجىلىسىنىڭ جانە ءماسليحات دەپۋتاتتارىن سايلاۋعا قۇقىعىڭىز بار. ءسىزدىڭ سايلاۋشىلار تىزىمىندە بولۋىڭىز – سايلاۋعا قاتىسۋعا كونستيتۋتسيالىق قۇقىعىڭىزدىڭ ىسكە اسىرىلۋىنىڭ كەپىلى. سايلاۋشىلار ءتىزىمىن جەرگىلىكتى اتقارۋشى ورگاندار جاسايدى. ءسىزدىڭ ناقتى سايلاۋ ۋچاسكەسىنىڭ اۋماعىنداعى تۇرعىلىقتى جەرىڭىز بويىنشا تىركەلۋىڭىز ءسىزدى سايلاۋشىلار تىزىمىنە ەنگىزۋگە نەگىز بولىپ تابىلادى. سايلاۋ ۋچاسكەلەرىنىڭ شەكاراسى جەرگىلىكتى بۇقارالىق اقپارات قۇرالدارىندا 2020 جىلعى 5 قاراشادان كەشىكتىرىلمەي جاريالانادى», دەلىنگەن ورتالىق سايلاۋ كوميسسياسىنىڭ ۇندەۋىندە.
ورتالىق سايلاۋ كوميسسياسىنىڭ مالىمەتى بويىنشا ءار سايلاۋشى سايلاۋ تاعايىندالعان كەزدەن باستاپ ءتيىستى جەرگىلىكتى اتقارۋشى ورگاندا سايلاۋشى رەتىندە تىركەلۋگە قۇقىلى.
«سىزگە 2020 جىلعى 10 جەلتوقسانعا دەيىن سايلاۋ كۇنى تىركەلگەن جەرىڭىز بويىنشا داۋىس بەرۋگە ارنالعان ءۇي-جايعا كەلۋ مۇمكىندىگىڭىز بولمايتىنى بەلگىلى بولسا, باراتىن جەرىڭىزدەگى اكىمدىككە سايلاۋشىلاردىڭ ءتيىستى تىزىمىنە قوسۋ تۋرالى جازباشا وتىنىشپەن جۇگىنۋگە قۇقىڭىز بار. ەگەر ءسىز تۇراقتى تىركەلگەن جەرىڭىزدەن تىس ەلدى مەكەندە بولساڭىز جانە تۇرعىلىقتى جەرىڭىز بويىنشا ۋاقىتشا تىركەلگەن بولساڭىز, 2020 جىلعى 10 جەلتوقساننان كەشىكتىرمەي, سايلاۋ كۇنى ءوزىڭىز داۋىس بەرەتىن سايلاۋ ۋچاسكەسىنىڭ سايلاۋشىلار تىزىمىنە ەنگىزۋ تۋرالى جازباشا وتىنىشپەن ۋاقىتشا بولاتىن جەردەگى اكىمدىككە جۇگىنۋگە قۇقىلىسىز», دەيدى كوميسسيا.
قازاقستاننىڭ ورتالىق سايلاۋ كوميسسياسى ازاماتتاردى سايلاۋشىلار تىزىمىنە ەنۋ بويىنشا بارلىق زاڭدى ارەكەتتەردى ورىنداۋعا ۇندەدى.
ء«وزىڭىزدى سايلاۋشىلار تىزىمىنە ەنگىزۋ بويىنشا زاڭدى ماڭىزدى ارەكەتتەردى ۋاقتىلى قابىلداۋىڭىز قاجەت. 2020 جىلعى 26 جەلتوقساننان باستاپ سىزگە ءوز سايلاۋ ۋچاسكەڭىزدەگى سايلاۋشىلار تىزىمىنەن ءوزىڭىز تۋرالى دەرەكتەردى تەكسەرۋ مۇمكىندىگى بەرىلەدى», دەپ تۇيىندەدى وسك.
