ساباقتىڭ ماقساتى – تىڭداۋشىلارعا قازاق حالقىنىڭ ادەت-عۇرىپتارى مەن سالت-داستۇرلەرىنىڭ ماڭىزدىلىعىن جان-جاقتى اشىپ كورسەتۋ, ادامي قارىم-قاتىناس ءرولىنىڭ ەرەكشەلىگىنە ماڭىز بەرۋ, ادەپتىلىكتى دارىپتەۋ, باتا, تىلەكتى ناسيحاتتاۋ. ساباققا ەلوردا ەتنومادەني بىرلەستىكتەرىنىڭ وكىلدەرى جانە ءتىلدى مەڭگەرۋگە نيەت بىلدىرگەن ەرىكتىلەر قاتىستى.
مەملەكەتتىك ءتىلدى مەڭگەرۋگە باسا ءمان بەرگەن ەلوردا ەتنومادەني بىرلەستىكتەرى وكىلدەرىنە, ەرىكتىلەرگە بۇل جولى وقىتۋشى ساعىم ەستەمىسوۆا ەجەلدەن كەلە جاتقان قۇندىلىقتارىمىز تۋرالى تولىمدى مالىمەتتەر ايتىپ بەردى.
ساباق ساتىندە تاقىرىپتى تەرەڭ اشۋ ءۇشىن ارنايى ينتەراكتيۆتى تاقتا مەن بەينەكورىنىس ارقىلى قۇندى دەرەكتەر تىڭداۋشىلارعا تانىستىرىلدى. «ۇلت دەگەنىمىز – بەلگىلى ءبىر ايماقتا تاريحي قالىپتاسقان ادامدار توبىنىڭ الەۋمەتتىك-ەتنوستىق بىرلەستىگى. قازاق ۇلتى سوناۋ عاسىرلار تەرەڭىنەن, رۋ-تايپالىق دارەجەدەن باستاپ, XIV-XV عاسىرلاردا تۇتاس حالىقتىق دارەجەگە جەتكەنشە تالاي سالت-داستۇرلەردى باسىنان وتكىزدى. ء"داستۇردىڭ وزىعى بار, داۋرەنى وتكەن توزىعى بار" دەگەندەي, بىزگە جەتكەن تاربيەلىك ءمانى زور بۇگىنگى ۇلتتىق سالت-داستۇرلەر حالقىمىزدىڭ ەڭ قىمبات قازىناسى», دەدى س.ەستەمىسوۆا.
باتا بەرۋ, تىلەك جانە ارناۋ ايتۋ – ۇلتتىق داستۇرلەرىمىزدى ۇلىقتايتىن جاhۇتتارىمىز رەتىندە سانالادى. وسى قۇندىلىقتارعا جەكە-دارا توقتالعان وقىتۋشى ءاربىر ءسوزدىڭ ماڭىزى بار ەكەنىن جەتكىزدى. سونىمەن بىرگە جۇرەككە جىلى اسەر ەتەتىن قۇندىلىقتاردىڭ جاس ۇرپاقتى وتانسۇيگىشتىككە, تاريحي دۇنيەلەردى قادىرلەي بىلۋگە, ادامگەرشىلىكتى ۇلىقتاي بىلۋگە ۇندەيتىنىن ايتتى. وقىتۋشى تىڭداۋشىلارعا تاپسىرما بەرۋ ارقىلى ساباقتىڭ ماڭىزىن پىسىقتاپ, ولاردىڭ ۇلتتىق قۇندىلىقتاردى جەتىك بىلۋلەرىنە ەرەكشە ءمان بەردى.
